ރާއްޖޭގެ މައި ވައިގެ ބަނދަރު ވެލާނާ އިންޓަނޭޝަނަލް އެއާޕޯޓް (ވީއައިއޭ)އިން މި އަހަރު ރާއްޖޭގައި ބާއްވާ އެއާ ސާވިސް ވޯލްޑް ކޮންގްރެސް 2024ގެ ޕާޓްނަރުންނާއެކު އެއްބަސްވުމުގައި ސޮއިކޮށްފިއެވެ.
ވެލާނާ އިންޓަނޭޝަނަލް އެއާޕޯޓުގެ ނޫވިލު ސީޕްލޭން ޓާމިނަލްގައި ބޭއްވި ރަސްމިއްޔާތެއްގައި މިކަމުގައި އެއްބަސްވުމުގައި އިއްޔެ ވަނީ ސޮއިކޮށްފައެވެ.
މިއީ އޭވިއޭޝަން ދާއިރާއިން، ބައިނަލްއަގްވާމީ، މިފަދަ ޝަރަފްވެރި އަދި ބޮޑު ހަރަކާތެއް ރާއްޖޭގައި ބާއްވާ ފުރަތަމަ ފަހަރެވެ.
މި ކޮންގްރެސް ބޭއްވުމަށް ހަމަޖެހިފައިވަނީ ޖުލައި މަހުގެ ނުވަ ވަނަ ދުވަހުން ފެށިގެން 11 ވަނަ ދުވަހުގެ ނިޔަލަށް ކުރުނބާ މޯލްޑިވްސްގައެވެ.
މި ކޮންގްރެސްގެ ތެރެއިން ދުނިޔޭގެ އެކި ކަންކޮޅުތަކުގެ އޭވިއޭޝަން ދާއިރާގެ މަންދޫބުންގެ މެދުގައި މަޝްވަރާތައް ކުރެވި، ދުނިޔޭގެ ވައިގެ ހިދުމަތުގެ ކުރިއެރުމާއި ގުޅޭގޮތުން މަޝްވަރާ ކުރުމަށް ޕްލެޓްފޯމެއް ލިބިގެންދާނެއެވެ.
އެ ރަސްމިއްޔާތުގައި އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުހައްމަދު ވިދާޅުވީ ވެލާނާ އެއާޕޯޓް ތަރައްގީ ކުރުމަށް ރައީސް މުހައްމަދު މުއިއްޒު އިސްކަންދެއްވާފައި ވަނީ ދުރުވިސްނުންތެރި މާސްޓާ ޕްލޭނަކާއެކު ކަމަށެވެ. އަދި މި ޕްލޭންގެ ސަބަބުން ރާއްޖޭގެ ފަތުރުވެރިކަމުގެ ދާއިރާއަށް އަންނަ ކުރިއެރުމާއި އެއްގޮތަށް، އޭވިއޭޝަން ދާއިރާއަށްވެސް ތަނަވަސްކަން ލިބިގެންދާނެ ކަމަށް ވިދާޅުވިއެވެ.
"ވެލާނާ އެއާޕޯޓަކީ، އަޅުގަނޑުމެންގެ ކުރިއަރަމުން އަންނަ އިގްތިސޯދާއެކު، މި ބަދަލުގެ މައިގަނޑު އަސާސަކަށް ވެގެންދާނެ. މިކަމުގެ ސަބަބުން މި އެއާޕޯޓާއި ދުނިޔެއާ ދެމެދު އިތުރު ގުޅުމެއް އުފެދިގެންދާނެ،". ޝަރީފް ވިދާޅުވިއެވެ.
އޭނާ ވިދާޅުވީ، އެއާ ސާވިސް ވޯލްޑް ކޮންގްރެސްގައި ތަފާތު ނެޓްވޯކިންގ އަދި ވިޔަފާރީގެ ފުރުސަތުތައް ފަހިވެގެންދާނެ ކަމަށެވެ.
"މި ހަރަކާތުގައި ބައިވެރިވެ، ދެމެހެއްޓެނިވި ވިޔަފާރީގެ ގުޅުންތައް ބަދަހިކޮށް، މުސްތަގުބަލުގައި ކާމިޔާބީ އަށް އަމިއްލަ ނަފްސަށް ޖާގަ ދޭނެ.". އޭނާ ވިދާޅުވިއެވެ.
އެއާ ސާވިސް ވޯލްޑް ކޮންގްރެސްގެ އިވެންޓް ޕާޓްނަރުންނަކީ
• ރިސޯޓް ޕާޓްނަރުން: ޝެރެޓަން، މަލަހިނި
• ވެނިއު ޕާޓްނަރު: ކުރުނބާ މޯލްޑިވްސް
• ޑިޖިޓަލް ޕާޓްނަރު: ދިރާގު
• ސީޕްލޭން ޕާޓްނަރު: ޓީއެމްއޭ
• އެއާލައިން ޕާޓްނަރު: އެމިރޭޓްސް
• އޭވިއޭޝަން ޕާޓްނަރު: މޯލްޑިވިއަން
• މީޑިއާ ޕާޓްނަރުން: އައިލެންޑް ޗީފް، އޯރްކާ މީޑިއާ، ހޮޓެލިއަރ މޯލްޑިވްސް، ދަ އެރައިވަލް، ޓްރެވެލިއުޝަން މީޑިއާ
އެއާ ސާވިސް ވޯލްޑް ކޮންގްރެސްގެ އެންޑޯސްމަންޓް ޕާޓްނަރުން:
• މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން (މޮޓްކާ)
• މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ)
• މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ)
މި ހަރަކާތުގައި ދުނިޔޭގެ އެކި ސަރަޙައްދުތަކުން 300 މަންދޫބުން ބައިވެރިވާނެ ކަމަށް ބެލެވޭއިރު، މީގެ ތެރޭގައި އެއާޕޯޓް އެންޑް ރޫޓް ޑިވެލޮޕްމަންޓް އެގްޒެކެޓިވްއިންނާއި އެއާލައިން އެގްޒެކެޓިވްއިންނާއި އެއާލައިން ނެޓްވޯކިން ޕްލޭނަރުންނާއި އޭވިއޭޝަން ސަޕްލަޔަރުންގެ އިތުރުން އޭވިއޭޝަން އަދި ޓޫރިޒަމް އިދާރާތަކުގެ އިސް ބޭފުޅުން ހިމެނެއެވެ.
