ރައްޔިތުންގެ މަޖިލިހުގެ މިއަދުގެ ޖަލްސާ ވެސް ކޯރަމް ހަމަނުވެގެން ބޭއްވޭ ގޮތް ނުވެ، އެންމެ ފަހުން ނިންމާލައިފިއެވެ.
މަޖިލިހުގެ ޖަލްސާ ފުރަތަމަ ފެށުމަށް ތާވަލްކޮށްފައި އޮތީ މިއަދު ހެނދުނު 9:00 ގައެވެ. އެ ގަޑީގައި ކޯރަމް ހަމަވާ ވަރަށް މަޖިލިހުގެ މެމްބަރުން ނެތުމުން ޖަލްސާ ފަސް ކުރީ ހެނދުނު 10:00 އަށެވެ. އެކަމަކު، ޖަލްސާ ފަސްކޮށްގެން ވެސް ބޭއްވޭ ގޮތެއް ނުވިއެވެ.
މަޖިލިހުގެ ޖަލްސާ ބޭއްވުމަށް ދެން ކަނޑައެޅި ހެނދުނު 11:00 ގައެވެ. ނަމަވެސް އެ ގަޑީގައި ވެސް ޖަލްސާ ބޭއްވޭ ގޮތެއް ނުވިއެވެ.
މަޖިލިހުގެ ޖަލްސާގެ އެޖެންޑާގައި އޮތީ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ހުށަހަޅުއްވާފައިވާ ގާނޫނުއަސާސީ އަށް އިސްލާހު ގެނައުމުގެ ބިލްގެ ބަހުސް ކުރިއަށް ގެންދިއުމެވެ.
ކޯރަމް ހަމަނުވެގެން މިއަދުގެ ޖަލްސާ ވެސް ނުފެށި ދިގުލައިގެން ދިޔައިރު، މަޖިލީހުގައި ނުނިމި ގިނަ މަސައްކަތްތަކެއް އެބަހުއްޓެވެ. އެގޮތުން މެމްބަރުން ވަޒީރުންނާ ކުރައްވަން ހުށަހަޅާފައި އޮތް 21 ސުވާލެއްގެ ޖަވާބު ނުލިބި އޮތްއިރު، މަޖިލީހަށް ހުށަހަޅާފައިވާ 322 ޝަކުވާގެ ސިޓީއަކަށް ވެސް ޖަވާބު ނުދެވި އެބައޮތެވެ.
މި ހިނގާ 19 ވަނަ މަޖިލީހުގެ ފަހު ޖަލްސާ ބާއްވަން ތާވަލުކޮށްފައި އޮތީ އަންނަ ހޯމަ ދުވަހުއެވެ.
ވިހި ވަނަ މަޖިލީހުގެ ދައުރު ފެށޭނީ މި މަހު 28 ގައި އެ މެމްބަރުން ގާނޫނީ ހުވާ ކުރެއްވުމުންނެވެ.
