ރައްޔިތުންގެ މަޖިލިހުގެ ނިލަންދޫ ދާއިރާގެ އިންތިހާބީ މެމްބަރު އަދި ރައީސް ޑރ. މުހައްމަދު މުއިއްޒުގެ ކޮއްކޯފުޅު ފާތިމަތު ސައުދާ ރައްޔިތުންގެ މަޖިލީހުގެ ނައިބު ރައީސަކަށް ގެންނަން ސޯޝަލް މީޑިއާގައި ކެމްޕެއިނެއް ފެށުމުން، އެކަން އޭނާ ދޮގުކުރައްވައިފިއެވެ.
ސައުދާ މަޖިލިހުގެ ނައިބު ރައީސްގެ މަގާމަށް ގެންނަން ބޭނުންވާ ކަމަށް ބުނެ، "ސައުދާ ފޯ ޑެޕިއުޓީ" މި ނަމުގައި "އެކްސް" ގައި ވަނީ އެކައުންޓެއް ހުޅުވައި ކެމްޕެއިނެއް ފަށައިފައެވެ. ނަމަވެސް ސައުދާ ވަނީ އެކްސް އެކައުންޓަކީ އޭނާއާ އެއްވެސް ގުޅުމެއް ނެތް އެކައުންޓެއް ކަމަށް ވިދާޅުވެފައެވެ.
Mi X account akee alhugandaa evves gulhumrh oiy account eh noon.
Alhuganduge masaiykaiythah tharutheebu vegen dhanee adhi dhaanee PPM PNC ge leadership ge visnumaa ehgothah.
Alhuganduge namugai mifadha kan kan nukurumah varah bodah edhen. pic.twitter.com/hN9PIsRDZT— fathimathsaudha (@fathimathsaudha) May 6, 2024
"މި އެކްސް އެކައުންޓަކީ އަޅުގަނޑާ އެއްވެސް ގުޅުމެއް އޮތް އެކައުންޓެއް ނޫން. އަޅުގަނޑު މަސައްކަތް ތަރުތީބު ވެގެންދަނީ އަދި ދާނީ ޕީޕީއެމް ޕީއެންސީގެ ލީޑަޝިޕްގެ ވިސްނުމާ އެއްގޮތަށް،" ސައުދާގެ ރަސްމީ އެކްސް އެކައުންޓުގައި ވިދާޅުވިއެވެ.
ސައުދާ ވިދާޅުވީ އޭނާގެ ނަމުގައި މިފަދަ ކަންކަން ނުކުރެއްވުމަށް އެދިވަޑައިގަންނަވާ ކަމަށެވެ.
ސައުދާގެ މި ވާހަކައިގައި އޭނާ މަޖިލިހުގެ ނައިބު ރައީސް ކަމަށް ޝައުގުވެރިވެވަޑައިގަންނަވާ ކަމެއް ނުވަތަ ނޫން ކަމެއް ވެސް ވިދާޅެއް ނުވެއެވެ.
ވިހި ވަނަ މަޖިލިހަށް އިންތިހާބުވެވަޑައިގެންނެވި މެމްބަރުން މި މަހުގެ 28 ވަނަ ދުވަހު ހުވާ ކުރައްވަން ހަމަޖެހިފައިވާ އިރު، މަޖިލީހުގެ ރައީސްކަމާއި ނައިބު ރައީސްކަމަށް ގެންނާނެ ބޭފުޅުންނާ ބެހޭގޮތުން، ވެރިކަން ކުރާ މައި ޕާޓީ، ޕީއެންސީން އެއްވެސް މަޝްވަރާއެއް ނުކުރެއެވެ. އެކަމަކު، ބެލެވޭ ގޮތުގައި މަޖިލިހުގެ ރައީސް ކަމަށް ގެންނަނީ ފޮނަދޫ ދާއިރާގެ އިންތިހާބީ މެމްބަރު އަބްދުއްރަހީމް އަބްދުﷲ އެވެ.
ނައިބު ރައީސްގެ މަގާމަށް ގެންނާނެ ބޭފުޅަކާ މެދުގައި ސީދާ ގޮތެއްގައި އަދި އެއްވެސް ބަހުސެއް ނުހިނގައެވެ.
މިފަހަރު މަޖިލިހުގައި ތިއްބަވާނީ އެންމެ ތިން އަންހެން މެމްބަރުންނެވެ. އެއީ ސައުދާގެ އިތުރުން މާފަންނު މެދު ދާއިރާއަށް އިންތިހާބުވެވަޑައިގެންނެވި އެ ދާއިރާގެ ކުރީގެ މެންބަރު އަސްމާ ރަޝީދާއި ހުރާ ދާއިރާއަށް އަމިއްލަ ގޮތުން ވާދަކުރައްވައިގެން އިންތިހާބުވި އަނާރާ ނައީމެވެ. އަސްމާ ޕީއެންސީގެ ޓިކެޓުގައި އިންތިހާބު ކާމިޔާބު ކުރެއްވިއިރު، އަނާރާ ވަނީ އިންތިހާބުވެވަޑައިގެންނެވި ފަހުން ޕީއެންސީ އަށް ސޮއި ކުރައްވައިފައެވެ.
