މި ސަރުކާރުން ވެރިކަމާ ހަވާލުވެ، ޓޫރިޒަމްގެ ސްޓޭޓް މިނިސްޓަރުގެ މަގާމަށް އައްޔަންކުރިތާ 3 ދުވަސްފަހުން މަގާމުން ވަކިކުރި މުއްނިމް އަނީސް އަލުން އެ މަގާމަށް އައްޔަންކޮށްފި އެވެ.
މުއްނިމް އަލުން އެ މަގާމަށް އައްޔަންކުރުމުން މިއަދު ޓޫރިޒަމް މިނިސްޓްރީން ވަނީ 'އެކްސް’ގައި މަރުހަބާގެ ޕޯސްޓެއް ހިއްސާކޮށްފަ އެވެ. މި ސަރުކާރުން ވެރިކަމާ ހަވާލުވުމަށްފަހު ޓޫރިޒަމް މިނިސްޓްރީގެ ސްޓޭޓް މިނިސްޓަރަކަށް މުއްނިމް އައްޔަންކުރުމަށްފަހު މަގާމުން ވަކިކުރީ އޭގެ 3 ދުވަސް ފަހުންނެވެ.
އެއީ މިދިޔަ ނޮވެމްބަރު މަހު 21 ގައި މަގާމަށް އައްޔަންކުރުމަށް ފަހު އެ މަހުގެ 23 ގައި އޭނާ މަގާމުން ވަކިކުރިއެވެ. ނަމަވެސް އޭރު އޭނަ މަގާމުން ވަކިކުރި ސަބަބެއް ރަސްމީކޮށް ސަރުކާރުން ހާމަކޮށްފައެއް ނުވެ އެވެ.
ޓޫރިޒަމް މިނިސްޓްރީ އަކީ މި ސަރުކާރުގައި ސިޔާސީ މަގާމުތަކުގައި އެންމެ ގިނައިން މުވައްޒަފުން ތިބި މިނިސްޓްރީ އެވެ. އޭގެ ތެރޭގައި 11 ޑެޕިއުޓީ މިނިސްޓަރުންނާއި ތިން ސްޓޭޓް މިނިސްޓަރުންނާއި ސީނިއާ ޕޮލިޓިކަލް ޑިރެކްޓަރުންގެ ގޮތުގައި ނުވަ މީހަކާއި ޕޮލިޓިކަލް ޑިރެކްޓަރުންގެ ގޮތުގައި ދެ މީހަކު ހިމެނެ އެވެ.
