ކުރީގެ ރައީސް އަބްދުﷲ ޔާމީންގެ ޝަރީއަތުގެ ވާހަކަ މަޖިލީހުގެ ރައީސް އަދި ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމް ދެއްކެވެމުން، މާލެ ސިޓީ ކައުންސިލްގެ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު މިއަދު ރައްދު ދެއްވައިފިއެވެ.
ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑަރިން ކުށުގައި ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ 11 އަހަރުގެ ޖަލު ހުކުމްގެ އިސްތިއުނާފް ޝަރީއަތް ހައި ކޯޓާ ހިސާބުން ހުއްޓިފައި އޮތުމުން އެ މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ) އަށް ހުށަހަޅުއްވާނެ ކަމަށް އަސްލަމް ވަނީ ރޭގައި ވިދާޅުވެފައެވެ. އަސްލަމް ވިދާޅުވީ ކުރީގެ ރައީސުންނަށް ދޭން ޖެހޭ ފުރިހަމަ އިހުތިރާމު ދޭން ޖެހޭނެ ކަމަށާއި ވަކި ވެރިޔަކަށް ވަކި ވެރިކަމެއްގައި އިންސާފު ނުލިބުން ބަލައިނުގަނެވޭނެ ކަމަށެވެ.
އަސްލަމް @aslamdp ތިބޭފުޅާތީ އެންމެ ތާހިރު މީހާ ތިވާހަކަ ދައްކަން!ރައީސް ޔާމީންގެ މައްޗައް އިއްވާފައިވާ ހަރާމް ހުކުމް މައްސަލާގައި ތިބޭފުޅާ އާވެސް އަޅުގަނޑުމެން ގޮސް ވާހަކަ ދެއްކީމޭ ތިބޭފުޅާގެ ވެރިކަމުގަ.ދެއްވި ޖަވާބު ކަންފަތުގަ އެބަހުއްޓޭ ހަރުލާފަ.ތިބޭފުޅާ އެދުވަހު ވިދާޅުވީ… https://t.co/52ysSdoVfi
— Ibrahim Shujau (@IbrahimShujaau) April 13, 2024
އެ ވާހަކަތަކަށް ރައްދު ދެއްވައި ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ޕީއެންސީގެ ޓިކެޓުގައި ބާރަށު ދާއިރާ އަށް ވާދަ ކުރައްވާ ޝުޖާއު "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސް ޔާމީންގެ މައްޗައް އިއްވާފައިވާ "ހަރާމް" ހުކުމް މައްސަލައިގައި އަސްލަމްއާ ބައްދަލު ކުރެއްވި ކަމަށެވެ.
އޭރު އަސްލަމްގެ ޖަވާބަކަށްވީ ޖަލުގައި އޮންނަން ޖެހޭ ވާހަކަ ކަމުގައި ޝުޖާއު ވިދާޅުވިއެވެ.
"ތިބޭފުޅާ އާ ވެސް އަޅުގަނޑުމެން ގޮސް ވާހަކަ ދެއްކީމޭ ތިބޭފުޅާގެ ވެރިކަމުގައި. ދެއްވި ޖަވާބު ކަންފަތުގައި އެބަހުއްޓޭ ހަރުލާފައި. ތިބޭފުޅާ އެ ދުވަހު ވިދާޅުވީ ރައީސް ޔާމީން އޮންނަން ޖެހޭނީ ޖަލުގައި ކަމަށް. ގެއަށް ބަދަލު ކުރެވޭނީ [ކުރީގެ ރައީސް އިބްރާހީމް މުހައްމަދު ސޯލިހް] އިބޫއަށް ދެވަނަ ދައުރެއް ލިބުނީމަ ކަމަށް. ނަމަވެސް މިނިވަނެއް ނުކުރެވޭނެ ކަމަށް. މިއަދު ވެސް ތިބޭފުޅުންގެ އަތުގައި ބާރު އޮތީ." ޝުޖާއު ވިދާޅުވިއެވެ.
ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑްރިންގެ ކުށް ސާބިތުވެ، 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ޔާމީންގެ މައްޗަށް ޖަލު ހުކުމެއް އައީ ސޯލިހްގެ ވެރިކަމުގައި ޑިސެމްބަރު 25، 2022 ގައެވެ. އެއީ އޭރުގައި ވެރިކަމުގައި ތިއްބެވި ބޭފުޅުން ކޯޓުތަކަށް ނުފޫޒު ފޯރުވައިގެން ކުރި ހުކުމެއް ކަމުގައި މިހާރު ވެރިކަމުގައި ތިއްބެވި ބޭފުޅުން ގެންދަވަނީ ވިދާޅުވަމުންނެވެ.
ރައީސް ޔާމީންގެ މައްޗަށް ޖަލު ހުކުމެއް އިއްވާފައި ވީ ނަމަވެސ އެމަނިކުފާނު މިހާރު ހުންނެވީ މާލެ ބަންދުގައެވެ. އެއީ މިހާރުގެ ރައީސް ޑރ. މުހައްމަދު މުއިއްޒު، މިދިޔަ ރިޔާސީ އިންތިހާބު ކާމިޔާބު ކުރެއްވުމާ ގުޅިގެން ޔާމީނަށް ދެއްވި ލުޔެކެވެ.
