ގާޒާއަށް ޒަކާތު ފަންޑުން 1 ލައްކަ ޑޮލަރު ހަދިޔާ ކުރަން ނިންމައިފިއެވެ.
ރޭ އިސްލާމިކް މިނިސްޓްރީން ނެރުނު ބަޔާނެއްގައި ބުނެފައިވަނީ، އެގޮތަށް ނިންމާފައިވަނީ ރައީސް މުހައްމަދު މުއިއްޒުގެ އިރުޝާދުގެ ދަށުން ކަމުގައެވެ. އަދި އެ މިނިސްޓްރީން ބުނެފައިވަނީ ޒަކާތު ފަންޑުން ގާޒާއަށް ފޮނުވާ އިންސާނީ އެހީތެރިކަން ފޯރުކޮށްދޭނީ ގަތަރުގެ ރެޑްކްރެސެންޓް މެދުވެރިކޮށް ކަމަށެވެ.
އިސްލާމިކް މިނިސްޓްރީން ބުނެފައިވަނީ ގާޒާގެ ރައްޔިތުންގެ ކާބޯތަކެއްޗަށް ހޭދަކުރުމަށްޓަކައި ފޮނުވާ މި އެހީގެ ފައިސާ ފޮނުވާނީ ދެ ޕޭމަންޓަކަށް ބަހައިގެން ކަމަށާއި، ޒަކާތު ފަންޑުން ފުރަތަމަ މަރުހަލާގައި ފޮނުވަން ނިންމާފައިވަނީ 1 ލައްކަ ޑޮލަރު ކަމުގައެވެ.
ދިވެހި ޒަކާތު ފަންޑުން ގާޒާއަށް އެހީވާން ނިންމިކަން އިއުލާން ކުރައްވައި މީގެ ކުރިން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ޣައްޒާގެ އަޚުންނާއި އުޚުތުން ބަނޑަށް މަރުވާތަން ދެކެން ބޭނުން ނުވާކަމަށާއި، އަތުގައި ހުރި އެއްޗަކުން އެމީހުންނަށް އެހީތެރިކަން ފޯރުކޮށްދޭން ވާނެކަމުގައެވެ.
އަދި އެއީ ދިވެހި ރައްޔިތުންގެ އިހުސާސްތައް ކަމުގައިވެސް ޑރ. ޝަހީމް ވިދާޅުވެފައި ވެއެވެ.
ޑރ. ޝަހީމް އިތުރަށް ވިދާޅުވެފައިވަނީ މިއީ ރާއްޖޭގެ ޒަކާތު ފަންޑުން ބޭރަށް އެހީ ފޮނުވާ ފުރަތަމަ ފަހަރު ކަމަށާއި، އަދި މިއީ ޒަކާތަށް ހާއްސަ އިދާރާއެއް، ރާއްޖޭގައި ގާއިމުވުމާއި ތަނަވަސް ދިވެހިން، ޒަކާތު ހައުސްއަށް ޒަކާތް ދެއްކުމުގެ ނަތީޖާ ކަމަށެވެ.
އިސްރާއީލު ސިފައިން ޣައްޒާއަށް ދެމުންދާ އުދުވާނީ ހަމަލާތަކުގައި ފަލަސްތީނުގެ 32 ހާހަށްވުރެ ގިނަ މީހުން މިހާރުވަނީ ޝަހީދުވެފައެވެ. އަދި ޣައްޒާއަށް އެހީ ލިބުން އިސްރާއީލުން މަނާކޮށްފައިވުމާއި ގުޅިގެން، އެ ސިޓީގައި ވަނީ ބަނޑުހައިހޫނުކަން އާންމު ވެފައެވެ.
ކޮމެންޓު ފޮނުވާ