މި ސަރުކާރުން ބަދަލުގެބަދަލު 81 މިލިއަން ރުފިޔާގެ ބަދަލު ދިނީ ކުރީ ސަރުކާރުގައި އިންޓަނޭޝަނަލް އާރބިޓްރޭޝަންއިން ނިމިފަ އޮތް މައްސަލައެއްގައި ކަމުގައި ފިނޭންސް މިނިސްޓްރީން ބުނެފިައެވެ.
ދައުލަތުން ބަދަލު ދިނުމަަށް މިއަހަރު ކަނޑައެޅި ބަޖެޓްގެ މިއަހަރުގެ ފުރަތަމަ 3 މަސްތެރޭ ހޭދަ ކޮށްފައިވާކަން، ފިނޭންސް މިނިސްޓްރީގެ ތަފާސް ހިސާބުތަކުން ދައްކާފައިވާ މައްސަލާގަ ކަން ހިނގާދިޔަ ގޮތް ސާފުކުރުމަށް ފިނޭންސް މިނިސްޓްރީން ކުރި އެކްސް ޕޯސްޓުތަކެއްގައި ފިނޭންސްއިން ބުނީ، އެމައްސަލާގަ ފައިސާ ދޫކޮށް މިހާރު ނިންމާފައިވާ ކަމަށާއި، މި ސަރުކާރުން އަލަށް އަދި އެއްވެސް ފަރާތަކަށް ބަދަލު ދީފައި ނުވާކަމުގައެވެ.
ފިނޭންސްއިން ބުނީ މި މައްސަލާގައި ފައިސާ ދޫކޮށްފައިވާނީ އެޓާރނީ ޖެނެރަލްގެ އޮފީހުގެ ލަފާގެމަތިން ކަމަށާއި، އެފައިސާ ދޫކޮށް ނިންމާފައިވަނީ ފައިސާ ދޫކުރުން ލަސްވެއްޖެނަމަ އިތުރު ޖޫރިމާނާތައް އަރާނެކަމަށް ވާތީކަމަށެވެ.
އެހެންނަމަވެސް އެއީ ކޮންފަރާތެއްކަމެއް ފިނޭންސްއިން ހާމަކޮށްފައެއް ނުވެއެވެ.
ފިނޭންސް މިނިސްޓްރީން ފާއިތުވި މާރިޗްމަހުގެ 31 ވަނަ ދުވަހު އާންމުކޮށްފައިވާ މާލީ ތަފާސް ހިސާބުތަކުން ދައްކާ ގޮތުގައި، މިއަހަރު މިހާތަނަށް ބަދަލުގައި 82 މިލިއަން ރުފިޔާވަނީ ހޭދަ ކޮށްގައެވެ. އެއީ ބަދަލު ދިނުމަށް މިއަހަރުގެ ބަޖެޓްގައި ކަނޑައެޅި 101 މިލިއަން ރުފިޔާގެ %80 އެވެ.
ފާއިތުވި އަހަރުވެސް އޭރުގެ ސަރުކާރުން ބަދަލު ދިނުމަށް 101 މިލިއަން ރުފިޔާ ބަޖެޓް ކުރިއެވެ. އެހެންނަމަވެސް އަހަރު ނިމިގެން ދިޔައިރު ބަދަލުގެ ގޮތުގައި 557 މިލިއަން ރުފިޔާ ބަޖެޓުން ހޭދަ ކޮށްފައި ވެއެވެ.
މި ސަރުކާރު ވެރިކަމަށް އައުމަށްފަހު، ފާއިތުވި ފެބްރުއަރީމަހުގެ ނިޔަލަށް ގެއްލުމުގެ ބަދަލުގެ ގޮތުގައި 56 މިލިއަން ރުފިޔާ ދޫކޮށްފައިވާކަމަށް، ސަރުކާރުން އޭރު އާންމު ކޮށްފައިވާ ވީކްލީ ފިސްކަލް ޑިވެކޮޕްމަންޓް ރިޕޯޓު ދައްކާފައި ވެއެވެ.
17 ނޮވެމްބަރު 2023 ގައި، މި ސަރުކާރު ހަވާލުވިއިރު، ގެއްލުމުގެ ބަދަލުގެ ގޮތުގައި އެކި ފަރާތްތަކަށް ދައުލަތުގެ ބަޖެޓުން ޚަރަދުކުރުމަށް ނިންމާފައިވާ ނިންމުންތަކާއި ގުޅިގެން ދޫކުރުމަށް ހަމަޖެހިފައިވާ ފައިސާގެ އިތުރުން އިންޓަރނޭޝަނަލް އާބިޓްރޝަނުން ދައުލަތާ ދެކޮޅަށް ނިންމާފައިވާ މައްސަލަތަކާ ގުޅިގެން ބައެއް ފަރާތްތަކަށް ފައިސާ ދޫކުރުމަށް ނިންމާފައިވާ ކަމަށްވެސް ފިނޭންސް މިނިސްޓްރީން ކުރިން ބުނެފައި ވެއެވެ.
މި ސަރުކާރު ވެރިކަމަށް އައުމަށްފަހު، ފާއިތުވި ނޮވެމްބަރުމަހުގެ 21 ވަނަ ދުވަހު ވަނީ، ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކޮށް، ގެއްލުމުގެ ބަދަލު ދިނުމަށް އުފައްދާފައިވާ ސެޓްލްމަންޓް ކޮމެޓީ އުވާލައްވާފައެވެ.
"ސަރުކާރާ އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ޙައްލުކުރުމުގައި ޢަމަލުކުރާނެ ގޮތުގެ އުޞޫލު" ގެ ނަމުގައި 28 ނޮވެމްބަރު 2022 ން ފެށިގެން ޢަމަލުކުރަމުން ގެންދަނީ، ޤާނޫނީ އޮނިގަނޑެއްނެތި އަދި ޤާނޫނީ ބާރެއްނެތި އެކުލަވާލާފައިވާ އުޞޫލަކަށްކަމަށް ދައުލަތުގެ ބަންޑާރަ ނާއިބު ރައީސުލްޖުމްހޫރިއްޔާއަށް ލަފާދެއްވާފައިވާކަމަށް ރައީސް އޮފީހުން އޭރު ވިދާޅުވެފައި ވެއެވެ.
ރައީސް އޮފީހުން ވިދާޅުވެފައިވަނީ، 28 ނޮވެމްބަރު 2022 ން ފެށިގެން ޢަމަލުކުރަމުން ގެންދިޔަ މި އުޞޫލާއި މެދު ދައުލަތުގެ ބަންޑާރަ ނާއިބު ރައީސުލްޖުމްހޫރިއްޔާއަށް މިދެއްވި ލަފާގައި، މިއީ ޤާނޫނީ އޮނިގަނޑެއްނެތި އަދި ޤާނޫނީ ބާރެއްނެތި އެކުލަވާލާފައިވާ އުޞޫލެއްކަން ފާހަގަކުރެއްވުމުގެ އިތުރުން، މި އުޞޫލުގެ ދަށުން މައްސަލަތައް ޙައްލުކުރުމުގެ ނަމުގައި އެކި ފަރާތްތަކަށް މާލީ ބަދަލުތައް ދިނުން ފަދަ ކަންކަން ދައުލަތުގެ ބަންޑާރަ ނާއިބުގެ އޮފީހުގެ އެއްވެސް ބައިވެރިވުމެއް ނެތި، އަދި އެއްވެސް ލަފައެއްވެސް ނެތި ކުރިއަށް ގެންދިޔައީ، ޤާނޫނުއަސާސީގެ 133 ވަނަ މާއްދާގެ (ނ) އާއި ޚިލާފަށްކަން ފާހަގަކުރައްވާފައި ވާކަމަށެވެ.
ބަދަލުގެ ގޮތުގައި ސަރުކާރުން ވަކިވަކި ފަރާތްތަކަށް ދޫކުރަމުންދާ އަދަދުތަކުގެ މައުލޫމާތު ހާމަކުރަމުންނެއް ނުދެއެވެ. އޭގެ ސަބަބެއްކަމުގައި ސަރުކާރުން ބުނަމުން ދަނީ ބަދަލުދިން މުއާމަލާތްތަކަކީ ސިއްރު ހިފެހެއްޓުމުގެ އުސޫލުތަކުގެ ދަށުން ކުރިއަށް ގެންދެވޭ މުއާމަލާތްތަކަށް ވާތީކަމުގައެވެ.
