އެމެރިކާގެ އިންތިޚާބީ ރައީސް ޖޯ ބައިޑްން އަންނަ ހޯމަ ދުވަހު ކޯވިޑް19 ވެކްސިންގެ ފުރަތަމަ ޑޯޒް ޖައްސަވާނެކަމަށް، އެމަނިކްފާނުގެ ޕްރެސް ސެކެޓްރީ ހާމަ ކުރައްވައިފިއެވެ.
ޖޯ ބައިޑްނަ ހޯމަދުވަހު ވެކްސިން ޖެއްސެވުމަށް ނިންމަވާފައިވާއިރު، އެމެރިކާ ސަރުކާރުގެ އެންމެ އިސްއޮފިޝަލުން ކަމުގައިވާ، ނާއިބު ރައީސް މައިކް ޕެންސާއާއި، ސެނެޓްގެ މެޖޯރިޓީ ލީޑަރ މިޗް މެކޯނެލްއާއި އަދި ގާނޫނު ހަދާ މަޖިލީހުގެ ރައީސާ ނާންސީ ޕެލޯސީވެސް ހުކުރު ދުވަހު ވަނީ ކޯވިޑް ވެކްސިން ޖައްސަވާފައެވެ.
ބައިޑްން ހުވާ ކުރެއްވުމަށްފަހުވެސް، އެމެރިކާގެ ޕްރެސް ސެކެޓްރީކަން ކުރެއްވުމަށް ހަމަޖެހިފައިވާ ޖެން ސާކީ ވިދާޅުވި ގޮތުގައި، އިންތިޚާބީ ރައީސް ބައިޑްންގެ އަރިހުގައި އެމަނިކްފާނުގެ އަބިކަބަލުންވެސް ހޯމަ ދުވަހު ވެކްސިން ޖައްސަވާނެއެވެ. އަދި އިންތިޚާބީ ނާއިބު ރައީސާ ކާމަލާ ހެރިސްއާއި އެކަމަކާގެ ފިރިކަލުން ޑޮގް އެމްހޮފް މިހަފްތާގެ ފަހުކޮޅު ކޯވިޑް ވެކްސިން ޖައްސަވާނެއެވެ.
ޕްރެސް ސެކެޓްރީ ސާކި ވިދާޅުވި ގޮތުގައި ނާއިބް ރައީސް ޕެންސްއެކޭ އެއްގޮތަށް، އިންތިޚާބީ ރައީސް ބައިޑްންވެސް ވެކްސިން ޖައްސަވާނީ މީޑިއާގެ ހާޒިރުގައި ލައިވްކޮށެވެ. މަގުސަދަކީ، ވެކްސިނަކީ ރައްކާތެރި ވެކްސިނެއްކަން އެމެރިކާގެ ރައްޔިތުންނަށް ޔަގީން ކޮށްދިނުމެވެ.
އެމެރިކާގެ މުޅި ތާރީޚުގައިވެސް ކުރިޔަށް ގެންދެވޭ އެންމެ ބޮޑު ވެކްސިން ކެމްޕޭން ފެށިގެން ކުރިޔަށް ދާއިރު، ފާއިތުވެދިޔަ 5 ދުވަހު، އެމެރިކާގެ ރައީސް ޑޮނަލްޑް ޓްރަންޕް އާންމު އެއްވެސް ބައްދަލުވުމެއް ބާއްވާފައި ނުވެއެވެ. ޓްރަމްޕް މީގެ ކުރިންވަނީ ކޯވިޑް19 އާއި ގުޅިގެން ސައްޙަ ނޫން އަތަކެއް މައުލޫމާތެއް ފަރުރާފައެވެ. އަދި ކޯވިޑް ބައްޔާދެކޮޅަށް ހަގުރާމަ ކުރުމުގައި އެގައުމުގައި އިސްކޮށް ތިއްބެވި ސިއްޙީ މާހިރުންނާ ޓްރަމްޕާ އެތައް ފަހަރެއްގެމަތިން ގިނަ ކަންކަމުގައި ވަނީ ޚިޔާލުތަފާތުވުން އުފެދިގެން ގޮސްފައެވެ.
އެމެރިކާގައި ވެކްސިން ދޭން ފެށުމަށް މިހާތަނަށް އައިއިރު، ޓްރަމްޕް އިސްކޮށް ހުންނަވައިގެން، އެއްވެސް ބައްދަލުވުމެއް ބާއްވާފައި ނުވާއިރު، މިހާތަނަށް ޓްރަމްޕް އަދި ވެކްސިން ޖައްސާވަފައެއްވެސް ނުވެއެވެ. އަދި ފާއިތުވެދިޔަ 5 ވަރަކަށް ދުވަހުގެތެރޭގައި ޓުވީޓ ކުރައްވާފައިވަނީ ވެސް މަދު ފަހަރެއްގެ މަތިންނެވެ.
ވައިޓް ހައުސްގެ ޑެޕިއުޓީ ޕްރެސް ސެކެޓްރީ ހުކުރު ދުވަހު ވިދާޅުވެފައިވަނީ، އެމެރިކާގެ ރައީސް ޑޮނަލްޓް ޓްރަމްޕް މިހާރު ގެންދަވަނީ، ވެކްސިން ޖައްސަވާނެ ވަގުތަކާ ގުޅޭގޮތުން އޭނާގެ މެޑިކަލް ޓީމާ މަޝްވަރާ ކުރައްވަމުންނެވެ. އަދި ޓްރަމްޕް ހާލު ވަރަށް ރަގަޅު ކަމަށާއި، ޔަގީނުންވެސް ޓްރަމްޕް ވެކްސިން ޖައްސަވާނެކަމަށްވެސް ޑެޕިއުޓީ ޕްރެސް ސެކެޓްރީ ވިދާޅުވިއެވެ.
ޓްރަމްޕްވަނީ ފާއިތުވެދިޔަ އޮކްޓޯބަރު ކޯވިޑަށް ޕޮޒިޓިވްވެފައެވެ.
އެމެރިކާގެ ނާއިބުރައީސް، މައިކް ޕެންސް، ވަނީ ލައިވްކޮށް ޓީވީގެ ކުރިމަތީގައި ކޯވިޑް19 ވެކްސިން ޖައްސަވާފައެވެ. ވެކްސިން ޖެހުމަށްފަހު، ޕެންސް ވިދާޅުވީ، "ކަމެއް ވިހެންވެސް ހީ ނުވާ" ކަމުގައެވެ.
ވައިޓް ހައުސްއިން ބުނެފައިވަނީ، ނާއިބު ރައީސް ލައިވްކޮށް ކެމެރާ ކުރިމަތީގައި ވެކްސިން ޖެއްސެވީ "އެމެރިކާގައި ވެކްސިން ޕްރޮމޯޓު ކޮށްދީ، އަދި ވެކްސިން ޖެހުމަށް ހިތްވަރުދީ، ވެކްސިނަކީ ރައްކާތެރި އެއްޗެއްކަން އެމެރިކާގެ ރައްޔިތުންނަށް ޔަގީން ކޮށްދިނުން" ކަމުގައެވެ.
ވައިޓް ހައުސްއިން ވަގުތުން ދުރަށް ދެއްކި މި އިވެންޓުގައި، ޕެންސްގެ އަބިކަބަލުންނާއި އަދި ސާޖަން ޖެނެރަލް ޖެރޮމް އެޑަމްވެސް ވަނީ، ވެކްސިން ޖައްސަވާފައެވެ.
