ބަރަކާތްތެރި ރަމަޟާންމަހު އުންމަތަށް ދެއްވި އެންމެ ބޮޑު އެއް ނަސްރަކީ ބަދުރު ހަނގުރާމާގައި މުސްލުމުންނަށް ދެއްވި ނަސްރު ކަމުގައި މިއަދު ހުކުރު ޚުޡުބާގައި ވިދާޅުވެއްޖެއެވެ.
"ކާމިޔާބީތަކެއްގެ މައްސަރު" މި މައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުޡުބާގައި ވިދާޅުވީ ރަމަޟާން މަހަކީ ބަރަކާތުން ފުރިގެންވަ މައްސަރެއް ކަމަށާއި، އެ މައްސަރުގައި އުއްމަތަށް ގިނަގުނަ ކާމިޔާބީތަކެއް ދެއްވާފައިވާ ކަމުގައެވެ. އޭގެ ތެރެއިން އެއް ކާމިޔާބީއަކީ ހިޖުރައިން ދެވަނަ އަހަރުގެ ރަމަޟާންމަހު، ބަދުރު ހަނގުރާމާގައި މުސްލިމުންނަށް ދެއްވި ނަސްރު ކަމުގައި ޚުޡުބާގައި ވިދާޅުވިއެވެ.
މުސްލިމް އަޚުންނޭވެ! މި ހަނގުރާމައި ލިބޭ އެއް ފިލާވަޅަކީ ޢަދުލުވެރިކަމުގެ ފިލާވަޅެވެ. މާތް ނަބިއްޔާ އެހެން ބައެއްގެ މައްޗަށް އަދުލުވެރިކަން ހިންގެވުމުގެ ކުރިން ޚުދު އެކަލޭގެފާނުގެ ނަފުސުގެ މައްޗަށް އަދުލުވެރިކަން އިސްކުރެއްވިއެވެ.
ޚުޡުބާގައި ވިދާޅުވިއެވެ.
ޚުޡުބާގައި އިތުރަށް ވިދާޅުވީ ބަދުރު ހަނގުރާމައިން ލިބޭ އެހެން ފިލާވަޅުތަކަކީ މަޝްވަރާ ކުރުމުގެ މަތިވެރި ފިލާވަޅާއި، އިސްލާމް ދީނު އަގީދާ ހިތުގައި ވަރުގަދައަށް އަށަގެންފިނަމަ އެމީހަކަށް ދެންހުރި ހުރިހާ ކަމެއް ފަސޭހަވާނެކަމުގެ ފިލާވަޅު ކަމުގައެވެ.
ޚުޡުބާގައި ވިދާޅުވެފައިވަނީ މިހާރު މިވަނީ ރަމަޟާންމަސް ނިމުމަކާ ގާތްވެފައި ކަމަށެވެ. އަދި އަހަރުގެ ތެރޭގައި އަންނަ އެންމެ މާތް ރޭގެ ދަރުމަ ލިބޭތޯ ރޭ އަޅުކަން އިތުރުކުރުމަށް މަސައްކަތް ކުރުމަށް ޚުޡުބާގައި ނަސޭހަތްތެރި ވެފައި ވެއެވެ.
