އަންހެން ކުއްޖަކު ރޭޕްކުރި މައްސަލައިގައި ދައުލަތުން ދައުވާ އުފުލާފައި ވަނިކޮށް މިނިވަން ކޮށްފައިވާ އަނީސް ހިލްމީ އަލު ބަންދު ކުރުމަށް ހައިކޯޓުން އަމުރު ކޮށްފިއެވެ.

އަންހެން ކުއްޖަކު ރޭޕްކުރި މައްސަލައިގައި ދައުލަތުން ދައުވާ އުފުލާފައި ވަނިކޮށް މިނިވަން ކުރި އަނީސް ހިލްމީ އަލު ބަންދު ކުރުމަށް އެދި ޕީޖީ އޮފީހުން ހައި ކޯޓުގައި އިސްތިއުނާފް ކުރީ މިމަހުގެ 3 ވަނަ ދުވަހުއެވެ.

އަނީސް ހިލްމީ ކްރިމިނަލް ކޯޓުން ދޫކޮށްލީ ގާނޫނާ ހިލާފަށް ކަމަށް ހައިކޯޓުން މިއަދު ކަނޑައެޅީ މައްސަލަ ބެލި ތިން ފަނޑިޔާރުންގެ އިއްތިފާގުންނެވެ. އެ މައްސަލަ ހައި ކޯޓުގައި ބެއްލެވީ ފަނޑިޔާރު ދީބާނާޒް ފަހުމީ އާއި ފަނޑިޔާރު ހުޒައިފާ މުހައްމަދުގެ އިތުރުން ފަނޑިޔާރު މުހައްމަދު ފައިސަލެވެ. ބެންޗުގެ ރިޔާސަތު ބެލެހެއްޓެވީ ފަނޑިޔާރު ދީބާނާޒެވެ.

ހއ. ބާރަށު، ސިލްސިލާގެ އަނީސް ފުރަތަމަ، މީގެ ތިން އަހަރު ކުރިން ހައްޔަރު ކުރީ މާލޭގެ ގެސްޓްހައުސްއެއްގައި 11 އަހަރުގެ އަންހެން ކުއްޖަކު ރޭޕް ކުރި މައްސަލައިގައެވެ. އޭރު އޭނާ ބަންދުކުރީ ޝަރީއަތް ނިމެންދެނެވެ.

އޭނާގެ މައްޗަށް ދައުލަތުން އުފުލާފައި ވަނީ، ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދައުވާއާއި ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުމުގެ ކުށުގެ ދައުވާގެ އިތުރުން އޮރިޔާންކާޑު ގެންގުޅުމުގެ ދައުވާއެވެ.

އޮރިޔާން ކާޑު ގެންގުޅުމުގެ ކުށުގައި އޭނާ އެއްމަހަށް ޖަލަށްލާން ކުރި ހުކުމް ތަންފީޒުކޮށް ނިމިފައިވާއިރު، ދެން އުފުލާފައިވާ ދެ ދައުވާގެ ޝަރީއަތް ދަނީ ކުރިޔަށެވެ.

ކުރިމިނަލް ކޯޓުން އަމުރުކޮށްގެން އޭނާ ދޫކޮށްގައިވަނީ ފާއިތުވި ފެބްރުއަރީމަހުގެ 21 ވަނަ ދުވަހުއެވެ.

ޕީޖީ އޮފީހުން ބައެއް މީޑިއާތަކަށް މައުލޫމާތު ދީފައިވާ ގޮތުގައި އަނީސް ބަންދުން ދޫކޮށްލުމަށް ކްރިމިނަލް ކޯޓުން ނިންމާފައިވަނީ ޝަރީއަތް ކުރިއަށް ގެންދެވޭނެ ދުވަހެއް ނޭނގުމާއި، ކުށުގެ ރެކޯޑެއް ނެތުމާއި، ބަންދުގެ ހުރި މުއްދަތުގައި ކަރެކްޝަންސްގެ ފަރާތުން އެއްވެސް ޝަކުވާއެއް އައިސްފައި ނުވާތީ ކަމަށެވެ. އަދި އޭގެ އިތުރުން ހެކިންގެ ހެކިބަސް ނަގައި ނިމިފައިވާތީ ކަމަށްވެސް އޭނާ ދޫކޮށްލި ބަންދު އަމުރާ ހަވާލާދީ ޕީޖީ އޮފީހުން މައުލޫމާތު ދީފައި ވެއެވެ.