އެފްއޭއެމްއިން ބުނެފައިވަނީ އެ އިދާރާގެ އިންތިހާބާ ގުޅޭ ގިނަ މައްސަލަތަކެއް ފެންމަތިވެ، އެކަމުގެ ޝަކުވާ ފީފާއަށް ހުށަހަޅާފައިވުމާއެކު މަޝްވަރާތައް މިހާރު ފަށާފައިވާ ކަމަށެވެ. އަދި ފީފާ އިން ސާފުކުރަން ބޭނުންވާ މައުލޫމާތު ސާފުކޮށްދޭން ދެ ފަރާތް އެކުވެ ވާހަކަދެކެވެމުންދާ ކަމަށްވެސް ބުނެފައި ވެއެވެ.

އެފްއޭއެމްގެ އިންތިޚާބު ހުއްޓުވާފައި އޮތީވެސް ފީފާއާއި އޭއެފްސީގެ އެންގުމަށް ކަމަށެވެ. އަދި ފީފާއާއި އޭއެފްސީގެ މަސައްކަތްތަކަށް ފުރިހަމައަށް އެއްބާރުލުންދީ ސައްހަ މައުލޫމާތު ފޯރުކޮށްދެމުންދާނެ ކަމަށް މެމްބަރު ކްލަބުތަކާއި އެންމެހާ ފަރާތްތަކަށް ޔަގީންކޮށް އަރުވާ ކަމަށް އެފްއޭއެމްއިން ބުނެފައި ވެއެވެ.

އެފްއޭއެމްގެ އިންތިހާބުގައި އެ އިދާރާގެ ރައީސް ކަމަށް ވާދަކުރައްވަނީ މިހާރުގެ ރައީސް ބައްސާމް އަދީލް ޖަލީލާއި ކުރީގެ އެފްއޭއެމްގެ ރައީސް އަދި މިހާރު މަހިބަދޫ ދާއިރާގެ މަޖިލިސް މެމްބަރު އަހުމަދު ތޯރިގް (ޓޮމް)އެވެ. އެކަން އެފްއޭއެމް އިން ވަނީ ޔަގީންކޮށްދީފައެވެ.

އިންތިހާބުގައި ވާދަކުރަން ކެންޑިޑެސީ ހުށަހެޅޭނީ ފުރަތަމަ ޑިވިޝަންގެ އަށް ކްލަބުގެ ތެރެއިން ތިން ކްލަބުގެ ތާއީދާއެކުއެވެ. މި ވަގުތު ކްލަބު ވެލެންސިއާ ސަސްޕެންޝަނެއްގައި އޮތުމުން، އެ ކްލަބަށް ވޯޓުލުމުގެ ހައްގެއް ނެތެވެ. އެހެންކަމުން ވެލެންސިއާގެ ތާއީދު ހިމަނައިގެން، ކުރިމަތިލާ ކެންޑިޑޭޓަކު، އެ ކްލަބު ނުލައި، ތިން ޓީމެއްގެ ތާއީދު އޮންނަންޖެހޭނެއެވެ.

މައުލޫމާތު ލިބިފައިވާ ގޮތުގައި ތޯރިގު ކެންޑިޑެސީ ހުށަހެޅީ ވެލެންސިއާވެސް ހިމަނައިގެންނެވެ. އަދި އޭނާ ވަނީ ވޯޓުލުމުގެ ހައްގު ލިބިފައިވާ 11 ކްލަބެއްގެ ސޮއި ހޯދައިފައެވެ. ތޯރިގު 11 ކްލަބެއްގެ ސޮއި ހޯދި ނަމަވެސް، އޭނާއަށް ފުރަތަމަ ޑިވިޝަނުން ތާއީދު ކުރި ކްލަބުތަކުގެ ތެރޭގައި ވެލެންސިއާ ހިމެނިފައި އޮތުމާއެކު، އޭނާ އެ ކްލަބުގެ ސޮއިއަށް ބަރޯސާވާން ޖެހިފައިވާ ކަމަށް ވަނީ އެނގިފައެވެ.

އެހެންކަމުން ތޯރިގުގެ ކެންޑިޑެސީ އަނެއްކާވެސް ބާތިލުވެދާނެ ކަމަށް ބެލެވިފައިވާ އިރު، ވެލެންސިއާ އިން ތުހުމަތު ކުރާ ގޮތުގައި އެ ކްލަބު ސަސްޕެންޑް ކުރީ، އެފްއޭއެމް އިންތިހާބުގެ ކަންކަން ރޭވުމެއްގެ ތެރެއިން ގެންދިއުމަށެވެ. އެފަދަ ކަންތައްތަކެއް ވެލެންސިއާގެ ސަސްޕެންޝަނުން ފެންނަންވެސް އެބަ އޮތެވެ.

އެފްއޭއެމް އިން ވެލެންސިއާ ސަސްޕެންޑް ކުރީ ވެލެންސިއާގެ ހިންގާ ބޯޑު ގަވާއިދާ ހިލާފަށް އޮޅުވާލައިގެން ބަދަލުކުރި ކަމަށް ބުނެ، ވެލެންސިއާގެ ބައެއް ބޯޑު މެމްބަރުން ހުށަހެޅި މައްސަލައަކާ ގުޅިގެންނެވެ. އެ މައްސަލައިގައި ވެލެންސިއާގެ ޗެއާމަން އަބްދުﷲ އަޒްމީންއާ ދެކޮޅަށް އެ ކްލަބުން ވަކިކުރި ބޯޑު މެމްބަރުން ވަނީ ވަގުތީ އަމުރެއް ނެރެން ސިވިލް ކޯޓަށް ގޮސްފައެވެ. އެކަމަކު ސިވިލް ކޯޓުން އެ އަމުރު ނެރެނުދިނެވެ.

އެހެންކަމުން އެ ހިސާބުން ވެލެންސިއާގެ ބޯޑުން އެފްއޭއެމްގެ ރައީސް ބައްސާމްގެ ބާރު ގެއްލިފައިވުމާއެކު އިންތިހާބާ ދިމާކޮށް ވެލެންސިއާ ސަސްޕެންޑް ކުރަން އެފްއޭއެމް އިން ވަނީ ނިންމައިފައެވެ. އެ ސަސްޕެންޝަނަކީ ވަކި މަގުސަދަކަށް ކުރި ސަސްޕެންޝަނެއް ކަމަށް ފެންނަން އޮތްއިރު، ތޯރިގުގެ ކެންޑިޑެންސީ ބާތިލުކުރަން ނިންމައިފި ނަމަ، އަނެއްކާވެސް ފީފާއާއި އޭއެފްސީން އެ މައްސަލަ ބަލާނެ ކަމަށް ބެލެވެއެވެ.

މީގެ ކުރިން ޖެނުއަރީ 31 ވަނަ ދުވަހު ބާއްވަން އުޅުނު އެފްއޭއެމް އިންތިހާބުގައި ބައްސާމް ވާދަކުރައްވާފައެއް ނުވެއެވެ. ކޮރަޕްޝަނާއި މަނީ ލޯންޑަރިންގެ މައްސަލަތަކެއްގެ ތެރޭގައި ހުރި ބައްސާމްގެ މައްސަލަ ފުލުހުންވެސް ބަލަމުންދާ އިރު، އޭނާ މިފަހަރު ރައީސް ކަމަށް ނުނުކުންނަން މާ ކުރިންވެސް އޮތީ ނިންމައިފައެވެ. އެހެން ނަމަވެސް، މިހާރު އެ ވިސްނުން ބަދަލުކުރައްވާފައިވަނީ ދާދިފަހުން ބޭއްވި އެކްސްޓްރާ އޯޑިނަރީ ކޮންގްރެސްއެއްގައި އެފަދަ އިޝާރާތެއް ދެއްވުމަށްފަހުއެވެ.

އެފްއޭއެމްއިން މީގެ ކުރިން އަވަސް އަރުވާލައިގެން ބާއްވަން އުޅުނު އިންތިބާހު ހުއްޓުވީ ފީފާއާއި އޭއެފްސީ އަދި ސްޕޯޓްސް ކޮމިޝަނަރުވެސް އެ އިންތިހާބަށް ވަދެގެންނެވެ. އިލެކްޓޯރަލް ކޯޑާ އެއްގޮތަށް، އިންތިހާބާ ބެހޭ ކޮމިޓީތައް އެކުލަވާލައިފައި ނުވާތީ އެފަހަރު އިންތިހާބު ކެންސަލް ކުރީ ތޯރިގު ހުށަހެޅި މައްސަލަ ބެލުމަށް އެފްއޭއެމް ނުކުޅެދުމުންނެވެ. އެ އިދާރާ އޮތީ މާލީ ބޮޑެތި ގޮންޖެހުންތަކެއްގައެވެ. ހާއްސަކޮށް ރާއްޖޭގެ ފުޓުބޯޅަ އެކިއެކި ގޮތްގޮތުން ދަރާފައި އޮތް އިރު، ލީގުތައް ބާއްވަންވެސް ވަނީ ނުކުޅެދިފައެވެ.