މާލެ ސަރަހައްދުގައި ކުނި ގިނަވަމުންދާތީ، މާލޭގެ މަގުމައްޗަށް ކުނި އަޅާ މީހުންގެ ފޮޓޯ އަދި ވީޑިއޯ ފޮނުވާ ނިޒާމު ޤާއިމުކޮށްފިއެވެ.
މާލޭގެ މޭޔަރު ކުރެއްވި އެކްސް ޕޯސްޓެއްގައި ވިދާޅުވީ، މާލޭ މަގުމަތީ ކުނި ބަހައްޓަމުންދާ ފަރާތްތައް ދަނީ ފާހަގަ ކުރެވެމުންކަމަށާއި، މި ގޮތަށް ކުނި ބަހައްޓާ ފަރާތްތަކުގެ ފޮޓޯ އަދި ވިޑިއޯ ކައުންސިލަށް ފޮނުވައި ދިނުން އެދޭ ކަމަށެވެ.
އެގޮތުން ގުޅއްވަން ޖެހޭ ނަންބަރަކީ 9341144 (ވައިބަރ /ވަޓްސްއެޕް ) ކަމަށް އާޒިމް ވިދާޅުވިއެވެ. އަދި ވެބްސައިޓު މެދުވެރިކޮށް މައުލުމާތު ފޮނުއްވޭނެކަމަށްވެސް އާޒިމް ވިދާޅުވިއެވެ.
ޚާއްސަކޮށް ރޯދަމަހާއި ދިމާކޮށް މާލޭގެ މަގުތަކަށް ކުނިއަޅާ ހަޑިކުރާ މައްސަލަ ބޮޑުވެ، ސިޓީ ކައުންސިލުންވަނީ މަލޭގެ މަގުތައް ސާފުކުރަން ފަށާފައެވެ.
އެގޮތުން މާލޭގެ މަގުތައް ސާފުކުރުމަށް ފުލުހުންނާއި ވެމްކޯ ގުޅިގެން މާލެ ސިޓީ ކައުންސިލުން ކުރަމުންދާ މަސައްކަތުގައި މާލޭގެ އެކި ސަރަހައްދުތަކުން ވަނީ ގިނަ އަދަދެއްގެ ކުނި ނަގާ ސާފުކޮށްފައެވެ.
ސިޓީ ކައުންސިލުން ދަނީ މާލޭގެ މަގުތަކުގައި ގަވައިދާ ޚިލާފަށް ކުނި ބަހައްޓާ ފަރާތްތައް ހޯދައި ޖޫރިމަނާ ކުރަމުންނެވެ. އެގޮތުން ބުރާސްފަތި ދުވަހު މަގުމަތީގައި ކުނި ބެހެއްޓި 8 ފަރާތެއް ވަނީ ޖޫރިމަނާކޮށްފައެވެ.
