މާލޭގެ ޕަބްލިކް ޕާކެއް ކަމަށްވާ ސަލްޓަން ޕާކުގައި ހުރި ސައިން ބޯޑުތަކަށް ގެއްލުންދިން މީހުން ހޯދުމުގެ މަސައްކަތް ސިޓީ ކައުންސިލުން ފުލުހުންނާ ގުޅިގެން ދަނީ ކުރަމުންނެވެ.
މި ހާދިސާ ހިނގާފައިވަނީ ހުކުރު ދުވަހުގެ ރޭގެ ވަގުތެއްގައެވެ. ސިޓީ ކައުންސިލުން ބުނެފައިވާ ގޮތުގައި މި ހާދިސާ ހިނގާފައިވަނީ ތަރާވީހު ނަމާދު ވަގުތުގައި ޕާކުގައި ސެކިއުރިޓީ އެއް ނެތް ވަގުތާއި ދިމާކޮށް ކަމަށެވެ. ސިޓީ ކައުންސިލުން ބުނެފައިވަނީ މި މައްސަލާގައި ތުހުމަތު ކުރެވޭ މީހުންނަކީ ގާތްގަނޑަކަށް 18 އަހަރުގެ ހަތަރު މީހުން ކަމަށެވެ.
ސިޓީ ކައުންސިލުން ކޮށްފައިވާ އެކްސް ޕޯސްޓުގައި ބުނެފައިވަނީ ސަލްޓަންް ޕާކުގައި ހަރުކޮށްފައި ހުރި ބޯޑުތަކަށް ރޭގެ ވަގުތެއްގައި ބަޔަކު ވަނީ ގެއްލުން ދީފައި ވާކަމަށާއި، އެ ކަން ކުރި ބަޔަކު ހޯދުމުގެ މަސައްކަތް ފުލުހުންނާއި ގުޅިގެން މިހާރު ކުރެވެމުންދާކަމުގައެވެ.
ސިޓިކައުންސިލުން ބުނެފައިވަނީ، ސައިން ބޯޑުތަކަށް ގެއްލުން ދިން ކަމަށް ތުހުމަތު ކުރެވޭ ހަމަ މީހުން ޕާކުގެ ސެކިއުރިޓީ ގާޑުންނާ ކުރިމަތިލީ ޓްރެމްޕޮލިން އަށް އަރައި ފޭބުން ހުއްޓުވަން މަސައްކަތް ކުރުމުން ކަމަށެވެ.
