ކުޑަކުދިީންނަށް ޖިންސީ ގޯނާކުރުމުގެ ތުހުމަތުގައި ހައްޔަރުކޮށް، އަދި ހުކުމްކުރާ މީހުންނަށް ލުއިދިނުން ބައެއް ނުގަންނަކަމަށް ރައީސް މުއިއްޒު ވިދާޅުވެއްޖެއެވެ.
އެމަނިކުފާނު ކުރެއްވި އެކްސް ޕޯސްޓެއްގައި ވިދާޅުވީ، ކުޑަކުދިީންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ނުވަތަ ޙުކުމް ކޮށްފައިވާ މީހުންނަށް މަޢާފުދިނުން، ނުވަތަ ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނޭ ކަމެއްނޫން ކަމުގައެވެ.
އަދި މިގޮތަށް ނިންމާ ނިންމުންތައް ލަސްނުކޮށް އިސްތިޢުނާފު ކުރުމަށް ސަރުކާރުން ޕީޖީ ގައި ދަންނަވަމުންދާ ކަމުގައިވެސް ރައީސް މުއިއްޒު ވިދާޅުވިއެވެ.
މި ދިވެހި މުޖުތަމަޢަކީ އެފަދަ ނުބައި ފަރާތްތަކުގެ ނުބައި ވަކިތަކުން ސަލާމަތްވެފައިވާ މުޖުތަމަޢަކަށް ހެދުމަށް އެންމެން އެކުގައި މަސަކަތް ކުރަމާތޯ!
ރައީސް މުއިއްޒުގެ އެކްސް ޕޯސްޓުގައި ވިދާޅުވެފައި ވެއެވެ.
ކުޑަކުދިީންނަށް ޖިންސީ ގޯނާކުރުމުގެ ތުހުމަތުގައި ހައްޔަރުކޮށް، އަދި ހުކުމްކުރާ މީހުންނަށް ލުއިދިނުން ބައެއް ނުގަންނަކަމަށް ރައީސް މުއިއްޒު ވިދާޅުވެފައިވާއިރު އަމިއްލަ ކާފަ ދަރިފުޅަށް ޖިންސީ ގޯނާކޮށްގެން ހައްޔަރުކޮށްފައި ހުރި މީހަކު ކޯޓުން ދޫކޮށްލި މައްސަލައަކަށް ގިނަބައެއްގެ ފާޑިކިއުން އަމާޒުވެފައި ވެއެވެ.
ގިނަ ބަޔަކު ތުހުމަތު ކޮށްފައިވަނީ ކޯޓުން ދޫކޮށްލި ތ. ވޭމަންޑޫ މީހާ އެރަށު މެޖިސްޓްރޭޓް ކޯޓުން ދޫކޮށްލީ އެ ދާއިރާގެ ސަރުކާރު ކެނޑިޑޭޓްޑަށް ތާއީދު ހޯދުމަށް ސިޔާސީ ނުފޫޒުގެ ބޭނުން ކޮށްގެން ކަމުގައެވެ.
ވޭމަންޑޫ އިން އެ މީހާ ހައްޔަރުކުރީ އުމުރުން 13 އަހަރުގެ އަންހެން ކާފަ ދަރިފުޅަށް ޖިންސީ ގޯނާކުރުމުގެ ކުށުގައި މިދިޔަ އަހަރުގެ އޮގަސްޓުމަހުގެ ތެރޭގައެވެ.
މި މީހާގެ މައްޗަށް ދައުވާ ކުރެވި ޝަރީއަތް ހިނގަމުން ދަނިކޮށް ވޭމަންޑޫ މެޖިސްޓްރޭޓް ކޯޓުން މި މީހާ ދޫކޮށްލީ ޝަރުތުތަކަކާ އެކު އެވެ.
ޖިންސީ ޝިކާރައަށްވި އަންހެން ކުއްޖާ ދިރިއުޅޭ ރަށަށް މި މީހާ ދޫކޮށްލުމާ ގުޅިގެން ސޯޝަލްމީޑިއާގައި އެތައް ބަޔަކު ދަނީ ކަންބޮޑުވުން ފާޅުކުރަމުންނެވެ.
ޕީޖީ އޮފީހުން ބުނީ މި މީހާ ދޫކޮށްލި މައްސަލަ ހައިކޯޓުގައި ވަރަށް އަވަހަށް އިސްތިއުނާފް ކުރާނެ ކަމަށެވެ.
ކޮމެންޓު ފޮނުވާ