މާލެއާއި ހުޅުމާލޭގެ މިސްކިތްތައް ފޮޅާ ސާފުކޮށް، ސުޕަރވައިޒްކޮށް އަދި މަރާމާތުކޮށް ބަލަހައްޓާނެ ދިވެހިން ހޯދަން މާލޭ ސިޓީ ކައުންސިލުން އިއުލާން ކޮށްފިއެވެ.
މިސްކިތްތަަކަށް ދިވެހިން ހޯދަން އިއުލާން ކުރުމަށްފަހު ކުރެއްވި އެކްސް ޕޯސްޓެއްގައި މޭޔަރު އާދަމް އާޒިމް ވިދާޅުވި މިފަހަރު މީ މިސްކިތްތަކަށް ބޭނުންވާ ދިވެހިން ހޯދަން އިއުލާން ކުރެވުނު 3 ވަނަ ފަހަރު ކަމުގައެވެ. އަދި އޭނާ ވިދާޅުވީ ވީހާވެސް ގިނަ ދިވެހި ފިރިހެނުންނާއި އަންހެނުން މި ވަޒީފާތަކަށް ކުރިމަތިލުމަށް އެދޭކަމަށާއި، ދިވެހި ރާއްޖޭގެ މިސްކިތްތައް ދިވެހިން އަތުން ސާފުކޮށް ބެލެހެއްޓުމަކީ ލިބޭ ފަޚުރަކަށް ހެދުމަށް އެދޭކަމުގައެވެ.
މާލޭ ސިޓީ ކައުންސިލުން ކޮށްފައިވާ އިއުލާންގައިވާގޮތުން މާލޭ އަދި ހުޅުމާލޭގެ މިސްކިތްތަކަށް އިއުލާން ކޮށްފައިވާ ވަޒީފާތަކުގެ ތެރޭގައި މޭސަނުން، ވެލްޑަރުން، ކާޕެންޓަރުން، ޕްލަމްބަރުން، ކަރަންޓު މަސައްކަތް ކުރާ މީހުން، ޓެކްނީޝަނުން، އަދި ސުޕަވައިޒަރުން އަދި ފޮޅާ ސާފުކުރާ މީހުން ހިމެނެއެވެ.
މި ވަޒީފާތަކަށް ކުރިމަތިލެވޭ އެންމެ ފަހު ތާރީހަކީ މި މަހުގެ 28 އެވެ.
ސިޓީ ކައުންސިލުން އަލުން މި ވަޒީފާތަކަށް އިއުލާން ކޮށްފައިވަނީ، މިސްކިތްތައް ފޮޅާ ސާފުކުރުމަށް 114 މީހުން ހޯދުމަށް ފާއިތުވި މަހު އިއުލާން ކޮށްގެން އެކަށީގެންވާވަރަށް މީހުން ކުރިމަތި ނުލުމާއި ގުޅިގެންނެވެ.
މޭޔަރު އާޒިމް ވިދާޅުވެފައިވާ ގޮތުގައި 114 ވަޒީފާއަށް އިއުލާން ކުރުމުން ކުރިމަތީ އެންމެ 14 ދިވެހިންނެވެ. އޭނާ ފާހަގަ ކުރެއްވި ގޮތުގައި މި މަސައްކަތަށް ދިވެހިން ލިބުމަށް ކުރިމަތިވާ ގޮންޖެހުމެއްގެ ގޮތުގައި ފާހަގަވެފައިވަނި އެއް އަހަރަށް ކޮންޓްރެކްޓް ކުރުމެވެ.
އިންޓަވިއު އަށް އައިސްފަވެސް ބައެއް މީހުން ވަޒީފާ ބޭނުން ނުވޭ އެއް އަހަރުދުވަހަށް ކޮންޓްރެކްޓު ހަދާތީ. އެހެންވީމަ މި އުސޫލު ބަދަލުކުރީމަ ދިވެހީން ލިބޭނެ ކަމަށް އަޅުގަނޑު އުއްމީދު މި ކުރަނީ.
އާޒިމް ވިދާޅުވިއެވެ.
މިމަހު 20 ވަނަ ދުވަހު ބޭއްވި ސިޓީ ކައުންސިލްގެ ބައްދަލުވުމުގައި އާޒިމްވަނީ ސިޓީ ކައުންސިލުން އެއް އަހަރުދުވަހަށް ނަގާ މުވައްޒަފުން 3 އަހަަރަށް ނަގާގޮތަށް ފާސްކުރުމަށް ހުށަހަޅުއްވާފައެވެ. އަދި ސިޓީ ކައުންސިލުންވަނީ އެގޮތަށް ބަދަލު ކުރުމަށް ފާސް ކޮށްފައެވެ.
މީގެ ކުރިން މިސްކިތަތައް ސާފުކޮށް ބަލަހައްޓަނީ އިސްލާމިކް މިނިސްޓްރީގެ ބެލުމުގެ ދަށުން ކަމުގައި ވީނަމަވެސް، މިސްކިތްތަށް ސާފުކޮށް ބެލެހެއްޓުމާއި އެންމެހާ ކަންކަން މިހާރުވަނީ ސިޓީ ކައުންސިލްގެ ބެލުމުގެ ދަށަށް ބަދަލު ކޮށްފައެވެ.
