ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ވެރިކަން ކުރާ މައި ޕާޓީ، ޕީއެންސީގެ ކެނޑިޑޭޓުންގެ މާލޭ ކެމްޕޭންގެ ރައީސް މުއިއްޒު މާފަންނު ހުޅަނގު ދާއިރާއަށް އިއްޔެ ޑޯޓުޑޯއަށް ނިކުންނަވައިފިއެވެ.
އިއްޔެ މެންދުރުފަހު 14:00 ގައި ރައީސް މުއިއްޒުގެ އަރިހުގައި މާފަންނު ހުޅަނގު ދާއިރާއިން މަޖްލިސް އިންތިޚާބުގައި ވާދަކުރައްވާ ކެންޑިޑޭޓް މުޙައްމަދު މުސްތަފާ (މުސްތޮ) ބައިވެރިވެ ވަޑައިގެންނެވިއެވެ.
މި ޙަރަކާތުގެ ތެރެއިން މާފަންނު ހުޅަނގު ދާއިރާގެ ބައެއް ގެތަކަށް ރައީސް މުއިއްޒު ވަޑައިގެންނެވިއިރު، އެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން ބައިވެރިވެ ވަޑައިގެންނެވިއެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އަންނަމަހުގެ 21 ވަނަ ދުވަހުއެވެ.
ކުރިއަށް އޮތް މަޖިލިސް އިންތިހާބުގައި 600 އެއްހާ ފޮށި އެކި ސަރައްހަދުތަކުގައި ބަހައްޓާނެކަމަށް އިލެކްޝަންސް ކޮމިޝަނުން ވިދާޅުވެއެވެ. އަދި ކޮންމެ ފޮއްޓަކަށް ވޯޓްލާނީ ގިނަވެގެން 600 އެއްހާ މީހުންކަމަށްވެސް އިލެކްޝަން ކޮމިޝަނުން މީގެކުރިން ވަނީ ވިދާޅުވެފައެވެ.
ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަކަށް މެމްބަރުން އިންތިހާބުކުރާނެއެވެ. މި އިންތިހާބުގައި ސިޔާސީ ޕާޓީތަކާއި ޕާޓީތަކަށް ނިސްބަތްނުވާ ބޭފުޅުން ހިމެނޭގޮތަށް ޖުމްލަ 371 ކެންޑިޑޭޓުން ވާދަކުރެއެވެ.
