މިހާރު ޓާގެޓަކީ މާލެ އަދި ވިލިމާލޭގެ މަގުތައް ހެދުމުގެ މަސައްކަތް މިއަހަރު ފަހުކޮޅު ފެށިގެން ދިއުންކަމުގައި އިންފްރާސްޓްރަކްޗަރ މިނިސްޓަރ މުއްތަލިބު ވިދާޅުވެއްޖެއެވެ.
އޭނާ މިހެން ވިދާޅުވީ އިންފަރާސްޓްރަކްޗަރ މިނިސްޓްރީން މިހާރު ކުރިޔަށް ގެންދާ މަޝްރޫޢުތަކާއި ގުޅޭގޮތުން މައުލޫމާތު ދެއްވުމަށް މިއަދު ބޭއްވު ނޫސްވެރިންގެ ބައްދަލުވުމުގައި ނޫސްވެރިންނަށް މައުލޫމާތު ދެއްވަމުންނެވެ.
މުއްތަލިބު ވިދާޅުވީ އެ މަސައްކަތްތަކަކީ ސަރުކާރު ބަޖެޓުން ކުރާ މަސައްކަތްތަކެއްނަމަ މިހާރުވެސް މަސައްކަތް ފެށިގެން ދާނެކަމަށާއި، އެހެންނަމަވެސް ރައީސް މުއިއްޒު އެންމެ ފަހުން ޗައިނާއަށް ކުރެއްވި ދަތުރުފުޅަށްފަހު، ޗައިނާއިން ދޭ ހިލޭ އެހީގެ ދަށުން އެމަސައްކަތް ކުރުމަށް ނިންމަވާފައިވާ ކަމުގައެވެ.
އެހެންނަމަވެސް އެމަސައްކަތް ޗައިނާއިން ދޭ ގްރާންޓު އެއިޑުން ކުރިޔަށް ގެންދިއުމަށް ނިންމާފައިވާތީ މިހާރު ކުރިޔަށް ދަނީ ގްރާންޓް ހަމަޖެއްސުމަށް ކުރާންޖެހޭ މަސައްކަތްތައް ކަމުގައި މުއްތަލިބު ވިދާޅުވިއެވެ.
އަޅުގަޑުމެން ޕްރޮޕޮސަލް ސަބްމިޓް ކޮށްގެން، ޗައިނާ އެއިޑް އޭޖޭންސީން މިކޮޅަށް އައިސް ފީސިބިލިޓީ ހަދާފަ، އެބޭފުޅުން ޗައިނާގަ ޓެންޑަރކޮށް ކޮންޓްރެޓަރުން ހޯދުމުގެ މަސައްކަތްވެސް ކުރާނީ. އެހެންވީ މިވަގުތަށް އޭތި.. އަޅުގަޑުމެން ދައުލަތުގެ ބަޖެޓުން ކުރާނަމަ އަޅުގަޑުމެންނަށް މިހާރު މަސައްކަތް ފެށިގެން ކުރިޔަށްދާ ހިސާބުގަ އިނީ. އެހެންނަމަވެސް ޗައިނާގެ ހިލޭ އެހީގެދަށުން ކުރަން ރައީސުލްޖުމްހޫރިއްޔާ ކަނޑައެޅުއްވީމަ މިވަގުތު އެ މަސައްކަތްތައް ކުރިޔަށް ދަނީ.
މުއްތަލިބު ވިދާޅުވިއެވެ.
އޭނާ ވިދާޅުވީ ޗައިނާ ކޮންކްޓަރުން މަސައްކަތް ކުރާ ގޮތަށް ބަލާއިރު، މިއަހަރު ފަހުކޮޅު ފެށުނު ނަމަވެސ، މިދައުރުގެ ތެރޭގައި މާލޭ އަދި ވިލިމާލޭ ހުރިހާ މަގެއް ހަދާ ނިންމާލެވޭނެ ކަމުގައެވެ.
ދެން އަޅުގަޑުމެން ހަމަ ކުރިންވެސް ދެންނެވިގޮތަށް ޓާގެޓަކީ މިއަހަރު ތެރޭގަ، މިއަހަރު ފަހުކޮޅުގަ އަމަލީ މަސައްކަތްތައް ފެށިގެން ދިއުން. މިހާތަނަށް ޗައިނާ ކޮންޓްރެކްޓަރުން މަސައްކަތް ކޮށްފަހުރި ގޮތަށް ބަލާކަމަށް ވަންޏާމު މަސައްކަތް ފަށައިގެން ޕްލޭން ކޮށްގެން ދާއިރުގަ އިރާދަކުރެއްވިއްޔާމު ވީހާވެސް އަވަހަކަށް، ތިން ހަތަރު އަހަރެއްގެ ތެރޭގަ، މި ދައުރު ނިމުމުގެ ކުރިން، މާލޭގެ އަދި ވިލިމާލޭގެ ހުރިހާ މަގެއްގެ މަގުތައް ރަގަޅު ފެންވަރަކަށް ހެދިގެން ދާނެ.
މުއްތަލިބު ވިދާޅުވިއެވެ.
ރައީސް މުއިއްޒު އެންމެ ފަހުން ޗައިނާއަށް ކުރެއްވި ދަތުރުފުޅުގައި ދިވެހިރާއްޖެއާއި ޗައިނާއާ ދެމެދު ވަނީ މުހިންމު 20 އެއްބަސްވުމެއްގައި ސޮއިކޮށްފައެވެ.
އޭގެ ތެރޭގައި މާލެ އާއި ވިލިމާލެ މަގުތައް އަލުން ތަރައްޤީކުރުމުގެ މަޝްރޫވެސް ހިމެނެއެވެ. މިމަޝްރޫއު ހިންގުމުގެ އެއްބަސްވުމުގައި ސޮއި ކޮށްފައިވަނީ، ޗައިނާގެ ޗައިނާ އިންޓަރނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީއާއި، ރާއްޖޭގެ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއާ ދެމެދުއެވެ.
