މަސައްކަތްތަކާ ގުޅޭގޮތުން އެލަވަންސް ތަޢާރަފް ކުރުމުގެ ގޮތުން ކުރިންދެމުންއައި އެލަވަންސްތަކަށް ބަދަލުގެނެވިފައިވާނެ ކަމަށް ޗީފް ސްޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވެއްޖެއެވެ.
އޭނާ މިހެން ވިދާޅުވީ ފުލުހުންނަށް ކުރިން ލިބެމުން އައި ގިނަ އެލަވަންސްތައް އުވާލައި އޮނިގަނޑަށް ބޮޑު ބަދަލެއް ގެނެސްފައިވާކަމަށް ބައެއް މީޑިއާތަކުގައި ކޮށްފައިވާ ރިޕޯޓުތަކަށް ރައްދު ދެއްވާ ކުރެއްވި އެކްސް ޕޯސްޓެއްގައެވެ.
ޝިފާންގެ އެކްސް ޕޯސްޓުގައި އޭނާ ވިދާޅުވީ ފުލުހުންގެ މުސާރަ މިމަހުން ފެށިގެން %35 ސަރުކާރުން ބޮޑުކޮށްދެއްވާފައިވާ ކަމަށާއި، އާ މުސާރައިގެ އޮނިގަނޑުގައި ހިމެނެނީ ބޭސިކް ސެލެރީގެ އިތުރުން، މަޤާމުގެ އެލަވަންސް، ޖޮބް އެލަވަންސް އަދި ކުރާ މަސައްކަތާއި ގުޅޭގޮތުން ދެވޭ އެލަވަންސެއްކަމުގައެވެ.
އަދި އޭވާ ވިދާޅުވީ މިއީ 2009 ވަނަ އަހަރުގެ ފަހުން އަސާސީ މުސާރާއާއިއެކު ފުލުހުންގެ މުސާރަ ބޮޑު ކުރެވުނު ފުރަތަމަ ފަހަރު ކަމަށާއި، މުސާރަ އޮނިގަނޑު ޒަމާނީކޮށް ފުލުހުންކުރަމުންދާ މަސައްކަތްތަކާ ގުޅޭގޮތުން އެލަވަންސް ތަޢާރަފް ކުރުމުގެ ގޮތުން ކުރިންދެމުންއައި އެލަވަންސްތަކަށް ބަދަލުގެނެވިފައިވާނެ ކަމަށެވެ.
މިމަހުން ފެށިގެން ފުލުހުންނާއި ސިފައިގެން މުސާރަ ބޮޑުކުރައްވާނެ ކަމަށް ރައީސް ޑރ. މުޙައްމަދު މުއިއްޒު ވިދާޅުވީ ފެބްރުއަރީމަހުގެ 23ވަނަ ދުވަހުގެ ރޭ ސަރުކާރުން ކުރިއަށް ގެންދިޔަ "އަހާ ފޯރަމް"ގައި ވާހަކަ ދައްކަވަމުންނެވެ.
އެ ފޯރަމުގައި ފުލުހުންގެ މުސާރަ ބޮޑުވާނީ ކޮން އިރަކުންތޯ އާންމު ރައްޔިތަކު ކުރެއްވި ސުވާލަށް ޖަވާބުދެއްވަމުން ރައީސް މުއިއްޒު ވިދާޅުވީ، މާރޗްމަހުން މަހުން ފެށިގެން ފުލުހުންނާއި ސިފައިގެން މުސާރަ ބޮޑުކުރެެއްވުމަށް ނިންމަވައިފައިވާ ކަމަށެވެ.
ރިޔާސީ އިންތިޚާބުގެ ކެމްޕޭނުގެ ތެރެއިން ސެޕްޓެންބަރު 15ވަނަ ދުވަހުގެ ރޭ އާޓިފިޝަލް ބީޗުގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޑރ. މުއިއްޒު ވަނީ ސިފައިންނާއި ފުލުހުންގެ މުސާރަ ދެގުނައަށް ބޮޑުކޮށްދެއްވާނެ ކަމަށް ވައުދުވެ ވަޑައިގެންފައެވެ.
މިއީ އިންތިޚާބުން ބަލިވި ކުރީގެ ރައީސް އިބްރާހިމް މުޙައްމަދު ޞާލިހުގެ ވެސް ވައުދުފުޅެކެވެ. ޞާލިހު ވައުދުވެވަޑައިގަތީ ޖެނުއަރީން ފެށިގެން ބޮޑުކުރުމަށެވެ.
ނަމަވެސް އާ ސަރުކާރުން ވެރިކަމާ ހަވާލުވީއިރު މާލީ ހާލަތު ދަށްވުމުން އަހަރު ފެށުނުއިރު ނިންމީ މާޗު ހިސާބުގައި މުސާރަތައް ބޮޑުކުރުމަށެވެ.
ކޮމެންޓު ފޮނުވާ