ކުރީ ސަރުކާރުން ދިރާސީ އަހަރަށް ބަދަލު ގެނައީ އޭރު ޚިޔާލު ހޯދި 30،000 މީހުންގެ %70 ވިސްނުމާއި ދެކޮޅަށް ކަމުގައި އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެއެވެ.
މިނިސްތަރު ޝަފީއު މިފަދައިން ވިދާޅުވީ މިނިސްޓަރު މިއަދު މަޖިލީހަށް ހާޒިރުވެވަޑައިގަތުމުން އިތުރު ސުވާލުގެ ވަގުތުގައި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ކުރެއްވި ސުވާލަށް ޖަވާބު ދެއްވަމުންނެވެ.
މެންބަރު ހަސަން ލަތީފްގެ ސުވާލު ކުރައްވާފައިވަނީ ދިރާސީ އަހަރު ދުރާލާ ވަކި ގޮތަކަށް އަތުރާ ތާވަލުކޮށް ދަރިވަރުންނާއި ބެލެނިވެރިންނާ ޓީޗަރުންނާ މުޅި ނިޒާމް އެގޮތަށް ތަރުތީބުވެ ތަންވީޒުވެފައި އޮއްވާ އަދި އިމްތިހާނުތައް ކުރިއާލާ ވަކި ގޮތަކަށް ތާވަލުވެ އެއަށް ދަރިވަރުންނާއި ބެލެނިވެރިންނާ ޓީޗަރުންނާ މުޅި ނިޒާމު އެގޮތަށް ބައްޓަން ވެފައި އޮއްވާ ކުއްލިއަކަށް ކުރު ގަޅުވާލާފައި މަދު ހަފްތާތަކެއްގެ ތެރޭގައި އެތައް ހާސް ދަރިވަރުންނާއި ބެލެނިވެރިންނާ ޓީޗަރުންނަށް ކޮށްފާނެ އަސަރެއް، ވެދާނެ ގެއްލުމެއް އަދި ނުކުމެދާނެ ނުރަނގަޅު ނަތީޖާއެއް ބަލާލުމެއް ދިރާސާކުރުމެއް ނެތި ކުއްލި ކުއްލިއަށް ތާރީޚްތަކާއި ދިރާސީ ކަލަންޑަރާއި ކުޅުއްވަނީ ކީއްވެގެންތޯއެވެ.
މި ސުވާލަށް ޖަވާބު ދެއްވަމުން މިނިސްޓަރު ޝަފީއު ވިދާޅުވީ ދިރާސީ އަހަރަށް ބަދަލު ގެންނަން ނިންމި ބަދަލާއި ގުޅިގެން ވަރަށް ގިނަ ކަންތައްތަކަށް ބެލުމަށްފަހު ކަމަށެވެ. އެގޮތުން އޭނާ ވިދާޅުވީ މީގެ ކުރިން އަހަރުތަކުގައި ދިރާސީ އަހަރު އޮތް ގޮތާއި ފަހުން ދިރާސީ އަހަރަށް ގެނައި ބަދަލުން ކުރި ފައިދާ އާއި ގެއްލުމަށްވެސް މިނިސްޓްރީން ބަލާފައިވާ ކަމަށެވެ.
އެގޮތުން އޭނާ ވިދާޅުވީ މިނިސްޓްރީ ބެލިބެލުމުން އެގުނު ގޮތުގައި މިދިޔަ ސަރުކާރުން އެކަޑެމިކް ކަލަންޑަރަށް ގެނައި ބަދަލުން ލިބޭ ފައިދާއަށްވުރެ ބޮޑު ގެއްލުންތަކެއް ލިބެމުންދާކަން އެގެން އޮތް ކަމަށެވެ.
އެކަޑެމިކް ކަލަސްޑަރާއި ކުޅޭކަށް ރައްޔިތުންނެއް ނޭދޭ، ޓީޗަރުންނެއް ނޭދޭ އަދި ދަރިވަރުންގެ ފަރާތުން ނެގިފައިހުރި މައުލޫމާތަށް ބަލާއިރުގައި ދަރިވަރުންވެސް ނޭދޭ.
މިނިސްޓަރު ޝަފީއު ވިދާޅުވިއެވެ.
އޭނާ ވިދާޅުވީ ދިރާސީ އަހަރު ބަދަލު ކުރުމުގެ ކުރިން ކުރީ ސަރުކާރުން 30،000 ރައްޔިތުންގެ ޚިޔާލު ހޯދިކަން އެގެން އޮންނައިރު އޭގެ ތެރެއިން %70 ތާއީދު ކޮށްފައިވަނީ ދިރަސީ އަހަރަށް ބަދަލު ނުގެނައުމަށް ކަމުގައެވެ.
މިނިސްޓަރ ޝަފީޢު ވިދާޅުވީ ދިރާސީ އަހަރަށް ބަދަލު ގެންނަނީ ކޯވިޑް19 ގައި ދަރިވަރުންނަށް ގެއްލުނު 6 އިއާދަ ކުރެވޭނެ ގޮތް ހަޖެއްސުމަށްފަހު ކަމަށެވެ.
ރައީސުލްޖުމުހުރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅާއި އެއްގޮތަށް މި ސަރުކާރުގެ ވަޒީރުންގެ މަޖިލީހުން ވަނީ 2026 ވަނަ އަހަރުން ފެށިގެން ދިރާސީ އަހަރު ޖެނުއަރީ މަހުން ފަށާގޮތަށް ބަދަލު ގެނެސްފައެވެ.
