ބޮލީވުޑްގެ ބްލެކް އެންޑް ވައިޓް ގެ ޒަމާނުގެ އެންމެ މަޝްހޫރު އަދި އެންމެ ކާމިޔާބު ބަތަލާ މަދޫބާލާގެ ބައޮގްރަފިކަލް ޑްރާމާ ހަދަން ވާހަކަ ދެކެވޭތާ ގިނަ ދުވަސްތަކެއް ފަހުން މިއަދު އެ ފިލްމު އިއުލާންކޮށް އޭގެ ޓައިޓްލް ޕޯސްޓަރު އާންމުކޮށްފި އެވެ.
މި ފިލްމު އުފައްދަނީ ސޮނީ ޕިކްޗާސް އިންޓަނޭޝަނަލް ޕްރޮޑަކްޝަންސް އިންނެވެ. އެ ޕްރޮޑަކްޝަނުން މި ފިލްމު އިއުލާންކުރީ މިދިޔަ ހުކުރު ދުވަހު ސޯޝަލް މީޑިއާގައި ކުރި ޕޯސްޓެއްގަ އެވެ.
View this post on Instagram
ޖަސްމީތު ކޭ ރީން ޑައިރެކްޓްކުރަން ހަމަޖެހިފައިވާ މި ފިލްމު ޕްރޮޑިއުސްކުރަނީ ސޮނީ ޕިކްޗާސް އާއި އާއި މަދޫބާލާ އިން އުފައްދާފައިވާ ފިލްމު ކުންފުނި މަދޫބާލާ ވެންޗާސް ޕްރައިވެޓް ލިމިޓެޑުންނެވެ.
ރިޕޯޓްތައް ބުނި ގޮތުގައި، މަދުބާލާގެ ހަޔާތަށް ހަދާ މި ފިލްމުގައި އޭނާގެ ދިރިއުޅުމާއި ފިލްމީ ދާއިރާގައި އޭނާއަށް މަޝްހޫރުކަން ލިބި ކުރިއަރައިގެން ދިޔަ ގޮތް ދައްކާނެ އެވެ.
"މަދޫބާލާ" އިއުލާންކުރި ނަމަވެސް ފިލްމުގައި އޭނަގެ ރޯލު ކުޅޭނެ ބަތަލާއަކާއި ފިލްމުގެ މަސައްކަތް ފަށާނެ އިރަކާއި ބެލުންތެރިންނަށް ފިލްމު ގެނެސްދޭނެ ތާރީހެއް އަދި އިއުލާނެއް ނުކުރެ އެވެ. މި ފިލްމުގެ ޕްރޮޑިއުސަރުންގެ ތެރޭގައި މަދުބާލާގެ ކޮއްކޮ މަދުރް ބްރިޖް ބުޝަން ވެސް ހިމެނެ އެވެ.
އުމުރުން ވަރަށް ހަގު އުމުރެއްގައި، އެންމެ 36 އަހަރުގައި 1969 ވަނަ އަހަރު މަދުބާލާ މަރުވީ ސިއްހީ އެކި މައްސަލަތަކުގައި ގިނަ ދުވަސްތަކެއް ވަންދެން ބަލިވެ އުޅުމަށް ފަހުގަ އެވެ.
