އަންނަ މަހު 12 ގައި އޮލިމްޕަހުގައި ރިލީޒްކުރުމަށް ނިންމާފައިވާ ފިލްމު "ލަސްވިޔަސް"ގެ ޓިކެޓް އޮލިމްޕަހުގައި ވެސް ވިއްކަން ފަށައިފި އެވެ.
މި ފިލްމުގެ 64 ޝޯ އޮލިމްޕަހުގައި ދެއްކުމަށް ވަނީ ހަމަޖެހިފައިއެވެ. އަދި މި ފިލްމްގެ ޓިކެޓް އޮލިމްޕަހުގެ އިތުރުން އޮންލައިންކޮށް ވެސް ޓިކެޓް ގަތުމުގެ ފުރުސަތު ވަނީ ހުޅުވާލާފަ އެވެ.
އެގޮތުން ފިލްމުގެ ޓިކެޓް ގަންނަން ލިބޭނީ މި ފިލްމަށް ހާއްސަކޮށްގެން ތައްޔާރުކޮށްފައިވާ ވެބްސައިޓް ކަމަށްވާ "ލަސްވިޔަސް ޑޮޓްކޮމް" އިންނެވެ. މި ފިލްމުގެ ޓިކެޓް ވިއްކުމަށް ހަމަޖެހިފައިވަނީ 160 ރުފިޔާ އަށެވެ.
ކާމިޔާބު ފިލްމް "ދެރިޔާ" ގެ ހުނަރުވެރި ޑައިރެކްޓަރު މުހައްމަދު ނިޔާޒު (ޓެޑްރީ) ގެ ދެވަނަ ފިލްމަކީ ޓެޑްރީ، ލިޔެ، ޕްރޮޑިއުސްކޮށް އަދި ޑައިރެކްޓްކޮށް ގެނެސްދޭން ހަމަޖެހިފައިވާ ފިލްމެކެވެ.
View this post on Instagram
މި ފިލްމް ގެ ލީޑުން ފެނިގެންދާ ތަރިންގެ ތެރޭގައި ހިމެނެނީ ހުނަރުވެރި މޮޅު އެކްޓިންއެއް ދަައްކަމުން އަންނަ ވާޝިޔާ މުޙައްމަދު (ޝިޔާ)، ހުނަރުވެރި އެކްޓަރ އަޙްމަދު އީސާ (އާނަންދު)ގެ އިތުރުން ކުރީގެ އެކްޓްރެސް ނިޢުމާ މުޙައްމަދުގެ ދަރިފުޅު ޒޯޔާ ޙަސަން އިބްރާހީމް އެވެ.
މި ފިލްމުން މަޝްހޫރު އެކްޓްރެސް މަރްހޫމް ފައުޒިއްޔާ ފެނިގެންދާނެ އެވެ. މީގެ އިތުރުން ރާއްޖޭގެ އެންމެ މަޝްހޫރު އެކްޓަރު ރީކޯ މޫސާ މަނިކްވެސް ފެނިގެންދާނެ އެވެ. މާ ދިގު ނޫން ނަމަވެސް މުހިންމު ރޯލަކުން މޫސަ ފެނިގެންދާއިރު، މޫސަ ވަނީ ޓެޑްރީގެ ފިލްމު "ދެރިޔާ" ގައިވެސް މަސައްކަތް ކޮށްފައެވެ.
