ނުކުޅެދުންތެރިކަން ހުންނަ މީހުންނާއި ކުދިންނަށް ހާއްސަކޮށްގެން ދައުލަތުގެ މީޑިއާ "ޕީއެސްއެމް"އިން ގެނެސްދެމުންދާ "އިޙުސާސް" ޕްރޮގްރާމް ދެން ކުރިޔަށް ގެންދާނީ އިތުރު ކަންކަމަށް ބެލުމަށްފަހު ކަމުގައި ޕީއެސްއެމްއިން ބުނެފިއެވެ.
މިކަން ހާމަ ކޮށްފައިވަނީ ޕީއެސްއެމްގެ މެނޭޖިން ޑިރެކްޓަރު ޒީނާ ޒާހިރު ބައެއް މީޑިއާތަކަށް މައުލޫމާތު ދެއްވަމުންނެވެ.
ކޮންމެ ރޯދަމަހަކުވެސް ޕީއެސްއެމްއިން ގެނެސްދެމުންދާ "އިޙުސާސް" ޕްރޮގްރާމް ސިލްސިލާކޮށް ކުރިޔަށް ގެންދަމުންދާތާ މިއީ 4 ވަނަ އަހަރެވެ. އެ ޕްރޮގްރާމް ހުށަހަޅާދެމުންދަނީ ޓީވީ ޕްރެސެންޓަރެއް ކަމުގައިވާ، މި ސަރުކާރުގެ ޖެންޑާ މިނިސްޓްރީގެ ނައިބުގެ މަގާމް އަދާކުރައްވަމުން ގެންދަވާ މަރިޔަމް ނަމްޒާއެވެ.
މި ޕްރޮގްރާމް ވަގުތީ ގޮތުން މެދު ކަނޑާލަން ޕީއެސްއެމްއިން ނިންމާފައިވަނީ، މިއަހަރުގެ ފުރަތަމަ ޕްރޮގްރާމްގައި، ނުކުޅެދުންތެރިކަން ހުންނަ ކުއްޖަކަށް ނިސްބަތްކޮށް، ދައްކައިގެން ނުވާނެ ބީދައަކުން ނަމްޒާ ވާހަކަ ދައްކާފައިވާކަމަށް ބުނެ ސޯޝަލް މީޑިއާގައި އަމާޒުވަމުންދާ ފާޑުކިޔުންތަކާއި ގުޅިގެންނެވެ.
މި ފާޑުކިޔުންތަކާއި ގުޅޭގޮތުން ބައެއް މީޑިއާތަކާއި ވާހަކަ ދައްކަމުން ޒީނާ ޒާހިރު ވިދާޅުވެފައިވަނީ އަމާޒުވި ފާޑުކިޔުންތަކާއި ގުޅޭގޮތުން ބެލިބެލުންތަކުން ރަނގަޅުކުރަން ޖެހިފައިވާ ކަންތައްތަކެއް ފާހަގަކުރެވިފައިވާކަމުގައެވެ.
އަދި އޭނާ ވިދާޅުވީ ސެންސިޓިވް ކޮންޓެންޓް ހިމެނޭ ޕްރޮގްރާމްތައް ދެން އޮންއެއަރ ކުރާނީ ވަރަށް ރަގަޅަށް ބެލުމަށްފަހު ކަމަށެވެ.
މި ރޯދަމަހުގެ ފުރަތަމަ ޕްރޮގްރާމްގައި ނަމްޒާ ދެއްކެވި ވާހަކަތަކާއި ގުޅިގެން ސޯޝަލް މީޑިއާގައި ފާޑުކިޔުން އަމާޒުވާން ފެށުމުން އޭނާވަނީ އޭނާގެ އެކްސް ހޭންޑްލް ޑިއެކްޓިވޭޓްވެސް ކޮށްފައެވެ.
