އިލެކްޝަންސް ކޮމިޝަންއިން އޭނާ ބޭރުކޮށްލަން، އަޑިގައި ތިބެގެން ރޭވީ އެމްޑީޕީން ކަމަށާއި، އެހެންނަަމެވެސް އޭނާއަށް މަގާމްގައި ދެމިހުރެވުނީ ޑިމޮކްރެޓްސް ޕާޓީގެ އެހީތެރިކަމާއެކު ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު މިއަދު ވިދާޅުވެއްޖެއެވެ.
ފުއާދު ތައުފީގު މިހެން ވިދާޅުވީ ރައްޔިތުންގެ މަޖިލިހުގެ މިނިވަން މުއައްސަސާތަކުގެ ކޮމިޓީގައި ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު އަދި މެދުހެންވޭރު ދާއިރާގެ މެމްބަރު އަލީ އާޒިމް ކުރެއްވި ސުވާލަކަށް ޖަވާބު ދެއްވަމުންނެވެ.
މިނިވަން މުއައްސަސާތަކުގެ ކޮމިޓީގައި މިއަދު ވާހަކަ ދައްކަވަމުން ފުއާދު ވިދާޅުވީ އެމްޑީޕީގެ ވެރިކަމުގައި އޭނާ އިލެކްޝަންސް ކޮމިޝަންގެ ރައީސްކަމުގެ ވަކިކުރަން މަސައްކަތް ކުރި އެކޮމިޝަންގެ ތިން މެމްބަރުންގެ ފަހަތުގައި ތިބީ އެމްޑީޕީ ކަން އޭނާއަށް އެގޭ ކަމަށާއި، އެހެންނަމަވެސް އެމްޑީޕީއަކީ އޭނާގެ އެއްބައި ގޮތަށް ދެކޭ ޕާޓީއެއް އެމްޑީޕީއެއް ކަމުގައެވެ.
އަޅުގަނޑަށް އެނގޭ ރިކޯޑު ކުރެވެމުންދާ އެއްޗެއްކަން. ޖެހިލުމެއް ވެސް ނުވޭ މި ވާހަކަ ދަންނަވާކަށް. އަޅުގަނޑަށް ހަމަ ކިތަންމެ ގޮތަކުން އެނގިފައިވީ އޭރު އަޅުގަނޑު ބޭރުކޮށްލަންވެގެން، އިލެކްޝަންސް ކޮމިޝަންގެ ރައީސް ކަމުން އެއްލާލަންވެގެން މަސައްކަތް ކުރި ތިން މެމްބަރުންގެ ފަހަތުގައި ތިބީ އެމްޑީޕީ ކަން. އެއީ އަޅުގަނޑުގެ އެއްބައި ގޮތަށް އަޅުގަނޑު ދެކޭ ޕާޓީއެއް އެމްޑީޕީއަކީ. އަޅުގަނޑު މިނިވަން މުއައްސަސާއެއްގައި ހުންނާތީ މިވަގުތު އެއްވެސް ޕާޓީއެއްގައި ނުހުރެވޭނެ..
ފުއާދު ވިދާޅުވިއެވެ.
ކޮމިޓީގައި ވާހަކަ ދައްކަވަމުން ފުވާދު ވިދާޅުވީ އެމްޑީޕީ އިންސާފުވެރިވާނެކަމަށް ގަބޫލު ކުރެއްވުނު ކަމަށާއި، އެހެންނަމަވެސް އެޕާޓީގެ ވެރިކަމުގައި މަގާމުގައި ދެމިހުރެވުނީ ހަމަ ކިރިޔާ ކަމުގައެވެ.
އަދި އޭނާ ވިދާޅުވީ އޭނާއަށް އިލެކްޝަންސް ކޮމިޝަންގެ ރައީސްކަމުގައި ދެމިހުރެވުނީ ޑީމޮކްރެޓްސް ޕާޓީން އެހީތެރިކަން ފޯރުކޮށް ދިނުމުން ކަމަށެވެ. ފުއާދު ވިދާޅުވީ އެހެންނަމަވެސް މިހާރުވެސް އޭނާގެ ހަށިގަޑު "ކޮނެ ބެލިޔަސް" އެގޭނީ އޭނާއަކީ އެމްޑީޕީއަށް ތާއީދުކުރާ މީހެއްކަން ކަމުގައެވެ.
އެކަމަކު އަޅުގަނޑުގެ އެތެރެހަށި ކޮނެލައިފިއްޔާ އަޅުގަނޑަށް ހީވަނީ އެހެން އެއްޗެއް ނުފެންނާނެ ހެން.
އޭނާއަކީ އެމްޑީޕީއަށް ތާއީދުކުރާ މީހެއްކަމަށް މޭރުން ކުރައްވަމުން ފުއާދު ވިދާޅުވިއެވެ.
