މި ސަރުކާރުން އެންމެ ބާރު ސްޕީޑުގައި ކުރަމުންދާ މަސައްކަތްތަކަކީ އެމްޑީޕީގެ ސަރުކާރުން ފެށި މަސައްކަތްތައް ހުއްޓުވުން ކަމުގައި އެމްޑީޕީގެ ރައީސް ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ ހދ. ކުޅުދުއްފުށި ސިޓީގައި ރޭ ބޭއްވި، ކުރިޔަށް އޮތް ރައްޔިތުންގެ މަޖިލިހުގެ ކެމްޕޭން ޖަލްސާގައި ވާހަކަދައްކަމުންނެވެ.
އެ ޖަލްސާގައި ވާހަކަ ދައްކަވަމުން ޝާހިދު ވިދާޅުވީ މި ސަރުކާރުން އެންމެ ބާރަށް ކުރާ ކަމަކީ އެޅިފަސްކޮޅު ގިރުވަމުންދިޔުން ކަމަށެވެ. އެގޮތުން ޝާހިދު ވިދާޅުވީ ކުރީ ސަރުކާރުން ހއ. ދިއްދޫ އާއި ހއ. އިހަވަންދޫގައި ހިއްކި ބިން މި ސަރުކާރުގެ ބާރު ސްޕީޑުގައި ކަނޑަށް ދިޔުމުގެ މަސައްކަތް މި ސަރުކާރުން މިހާރު ފަށާފައިވާ ކަމުގައެވެ.
އަދި ޝާހިދު ވިދާޅުވީ އެމްޑީޕީގެ ސަރުކާރުގައި ހިއްކި ބިންކޮޅުގެ ވަށައިގެން ތޮށި ލުމުގެ ހިތްވަރުވެސް މި ސަރުކާރުގައި ނެތްކަމަށާއި، ކަންކަން ކުރެވޭނެ ވިސްނުމެއް ވެސް ސަރުކާރުގައި ނެތްކަމަށެވެ.
މުއިއްޒު ސްޕީޑުގައި ކުރާ ކަމަކީ އަޅުގަނޑުމެން ފަށާފައި ހުރި މަސައްކަތްތައް ހުއްޓުވުން. އަނެއް ކަމަކީ އަޅުގަނޑުމެން ހިއްކަން ފަށާފައި ހުރި ތަންތަނުން ކަނޑަށް ގިރައިގެން އެ ދިޔަ ދިޔުން. މިއީ ކަންކަން ހުރި މިންވަރަކީ.
ޝާހިދު ވިދާޅުވި އެވެ.
ކުރިޔަށް އޮތް ރައްޔިތުންގެ މަޖިލިހުގެ އިންތިޚާބު ބޭއްވުމަށް ހަމަޖެހިފައިވަނީ މިހާރުވަނީ އަންނަ އެޕްރިލްމަހުގެ 21 ވަނަ ދުވަހުއެވެ.
