ބައެއް ފިލްމް ތަކާއި ޑްރާމާ އަދި ލަވަތަކުން ފެނިގެން ގޮސްފައިވާ އެކްޓަރު އަހުމަދު އާސިމްގެ ކުރު ފިލްމު "ހަދީޖާ" އަންނަ މަހު އޮލިމްޕަހަށް ގެންނަން ނިންމައި އޭގެ ޓްރެއިލާ ވެސް ދައްކާލައިފި އެވެ.
ސާޅީސް މިނިޓްގެ ކުރު ފިލްމް "ހަދީޖާ" އަކީ ފިލްމީ ތަރި އާސިމް ލިޔެ، ޑައިރެކްޓްކުރި އެއްޗެކެވެ. މީގެ ކާސްޓްގައި ރަވީ ފާރޫގް، ނަތާޝާ ޖަލީލު އަދި އަހުމަދު ނިމާލު ހިމެނެ އެވެ.
ކުރު ފިލްމު “ޚަދީޖާ”ގެ ރަސްމީ ޓްރެއިލާއެއް މިމަހު 24 ވަނަ ދުވަހުުު ޔޫޓިއުބްގައި އާއްމުކޮށްފައިވެއެވެ. މި ޓްރެއިލާއިން ފެނިގެންދަނީ ދިވެހި މުޖުތަމަޢުގައި އެންމެނަށް އެނގޭ ބޮޑު ސިއްރެއްގެ ގޮތުގައި ސިއްރުކުރެވިފައިވާ މައްްސަލައެއެކެވެ.
މި ފިލްމު އޮލިމްޕަހުގައި ޕްރީމިއާކުރަން ނިންމާފައި ވަނީ އަންނަ މަހުގެ 1 ގަ އެވެ. އެގޮތުން ދައްކަން ހަމަޖެހިފައި ވަނީ ލިމިޓެޑް ޝޯތަކެވެ. މާޗް 1-3 އަށް ފިލްމުގެ ޖުމްލަ 8 ޝޯ ދައްކަން ހަމަޖެހިފައިވެ އެވެ. އެއީ 1 ވަނަ ދުވަހު ދެ ޝޯ އާއި 2 އާއި 3 ވަނަ ދުވަހު ކޮންމެ ދުވަހަކު ތިން ޝޯ ދައްކާ ގޮތަށެވެ.
މި ފިލްމުގެ ޓިކެޓް ވިއްކަން ފަށާނީ 28 ފެބްރުއަރީ 2024 ވަނަ ދުވަހުން ފެށިގެން އޮލިމްޕަހުގެ ޓިކެޓް ކައުންޓަރުންނެވެ. ނަމަވެސް މިހާރުވެސް ޓިކެޓް ބުކިން ހެއްދުމުގެ ފުރުޞަތުވަނީ ހުޅުވައިލެވިފައެވެ.
އެގޮތުން 7755569 ނަންބަރަށް ގުުޅައިގެން ނުވަތަ ތުރުކަސް ފިލްމްސް ގެ ފޭސްބުކް ޕޭޖަށް ޑައިރެކްޓް މެސެޖްކޮށްގެން ބުކިން ހަދައިލެވޭނެ އެވެ.
