މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ހުސްވެފައިވާ މެންބަރުކަމަށް ރާއްޖެ ޓީވީގެ ކުރީގެ ޕްރެޒެންޓަރު އައިމިނަތު ނުޒުހާ އައްޔަން ކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
ބްރޯޑްކޮމްގެ މެންބަރު ކަމުގެ މަގާމު ހުސްވެފައި ވަނީ މިދިޔަ އަހަރު ޖެނުއަރީ މަހު 8 ގައި އެ ކޮމިޝަންގެ މެންބަރު އަހުމަދު ގައިސް އިސްތިއުފާ ދެއްވުމުންނެވެ.
އެ މަގާމަށް ފަސް ބޭފުޅެއްގެ ނަން ރައްޔިތުންގެ މަޖިލިހަށް ފޮނުވީ މިދިޔަ އަހަރުގެ ފެބްރުއަރީ މަހުއެވެ. އޭގެތެރެއިން ކޮމިޓީން ދިރާސާކުރުމަށްފަހު މަޖިލީހުގެ ތަޅުމަށް ތިން ނަމެއް ފޮނުވާފައިވެއެވެ.
އެއީ:
- އައިމިނަތު ނުޒުހާ – ރިވޯޑް، ހއ. ހޯރަފުށި
- ހުސެއިން އަމްރު – ވ. ރޯޝަން
- މަރިޔަމް ނަރީމާން ޝަރީފް – މުޝްތަރީގެ، ގދ. ތިނަދޫ
ބްރޯޑްކޮމްގެ މެންބަރު ކަމަށް ނުޒުހާ އައްޔަން ކުރުމަށް މަޖިލީހުން ފާސްކޮށްފައިވަނީ 34 މެންބަރުންގެ އިއްތިފާގުންނެވެ. . އޭނާގެ ނަން ފާސްވުމާ ގުޅިގެން އިތުރު ބޭފުޅެއްގެ ނަން ފާސްކުރަން ވޯޓަށް އަހާފައެއް ނުވެއެވެ. ނުޒުހާއަށް ރުހުން ދޭން ނެގި ވޯޓުގައި ބައިވެރިވީ ހަމައެކަނި އިދިކޮޅު އެމްޑީޕީ އާއި ޑިމޮކްރެޓްސް ޕާޓީގެ މެމްބަރުންނެވެ. ޕީޕީއެމް/ޕީއެންސީގެ މެމްބަރުން އެ ވޯޓުގައި ބައިވެރިވެވަޑައެއް ނުގަންނަވައެވެ.
ބްރޯޑްކޮމްގެ މިހާރުގެ ރައީސަކީ މަރިޔަމް ވަހީދާ އެވެ. ނައިބު ރައީސަކީ މުހައްމަދު ފަޒީން އެވެ. ދެން އެ ކޮމިޝަންގައި ތިއްބަވަނީ އަލީ ޔޫސުފާއި އާމިނަތު އަމީނާއި ޝިފްލާ އިބްރާހިމް އަދި ސޮފާ ޝަފީގެވެ.
