ކުރިޔަށް އޮތް ރައްޔިތުންގެ މަޖިލިހުގެ އިންތިޚާބު ރޯދައިގެ ފަހަށް ލަސްކުރުމަށް، ރައްޔިތުންގެ މަޖިލިހުން ގާނޫނަށް ގެނެސްފައިވާ އިސްލާހު ތަސްދީގު ކުރުމަށް އެމްޑީޕީގެ ޗެއަރޕާސަން ފައްޔާޒު އިސްމާއިލް ރައީސް މުއިއްޒުއަށް ގޮވާލައްވައިފިއެވެ.
ކުރިއަށް އޮތް ރޯދަ މަސް ނިމޭތާ 10 ދުވަސް ފަހުން ރައްޔިތުންގެ މަޖިލީހުގެ އިންތިހާބު ބާއްވާ ގޮތަށް، އިންތިހާބުތަކާ ބެހޭ އާއްމު ގާނޫނަށް ހުށަހެޅި އިސްލާހު މަޖިލިހުން ފާސްކޮށްފައިވަނީ މިމަހުގެ 11 ވަނަ ދުވަހުއެވެ.
އެހެންނަމަވެސް މިއަދާއި ހަމައަށް އައިއިރުވެސް ރައީސް މުއިއްޒު މި އިސްލާހު ތަސްދީގު ކޮށްފައެއް ނުވެއެވެ.
މިއިސްލާހު ތަސްދީކު ލަސްވަމުން ދިއުމުގެ ކަންބޮޑުވުން ފާޅު ކުރައްވަމުން ފައްޔާޒު ކުރެއްވި އެކްސް ޕޯސްޓެއްގައި ވިދާޅުވީ އިންތިޚާބުތައް ބާއްވަންވާނީ ރައްޔިތުންގެ ބައިވެރިވުން ބޮޑު ވާނޭ ގޮތް ބަލައިގެންކަމަށާއި، ރައްޔިތުންގެ ވަކީލުން ހޮވުމުގެ އިންތިޚާބު ރަމަޟާންމަހު ބޭއްވީމާ އެ ދަތިކުރެވެނީ ވޯޓުދިނުމުގެ އަސާސީ ޙައްޤުގެ ބޭނުންކުރުމަށް ކަމަށެވެ. އަދި އިންތިޚާބު ފަސްކުރުމަށް ފާސްކުރި ބިލް ވަގުތުން ތަސްދީޤުކުރަންޖެހޭ ކަމަށް ފައްޔާޒު ވިދާޅުވެފައި ވެއެވެ.
އިންތިޚާބުތައް ބާއްވަންވާނީ ރައްޔިތުންގެ ބައިވެރިވުން ބޮޑު ވާނޭ ގޮތް ބަލައިގެން. ރައްޔިތުންގެ ވަކީލުން ހޮވުމުގެ އިންތިޚާބު ރަމަޟާންމަހު ބޭއްވީމާ އެ ދަތިކުރެވެނީ ވޯޓުދިނުމުގެ އަސާސީ ޙައްޤުގެ ބޭނުންކުރުމަށް. އިންތިޚާބު ފަސްކުރުމަށް ފާސްކުރި ބިލް ވަގުތުން ތަސްދީޤުކުރަންޖެހޭ.
— Fayyaz Ismail (@faya_i) February 19, 2024
އިލެކްޝަންސް ކޮމިޝަން (އީސީ) އިން ކުރިން ހާމަކޮށްފައިވާ ގޮތުގައި ރައްޔިތުންގެ މަޖިލިހުގެ އިންތިހާބު އޮންނާނީ އަންނަ މަހުގެ 17 ގައެވެ. ނަމަވެސް އެ ދުވަހު އިންތިހާބު ބޭއްވުމަށް ބޮޑެތި ބައެއް ސިޔާސީ ޕާޓީތަކުން ވަނީ ދެކޮޅު ހަދައިފައެވެ. އޭގެ ތެރޭގައި އެމްޑީޕީ އާއި ޕީޕީއެމް އަދި ޑިމޮކްރެޓްސް އައި ޕީޕަލްސް ނެޝަނަލް ފްރަންޓް (ޕީއެންއެފް) ހިމެނެއެވެ. ގައުމީ ލަފާ ދޭ ކޮމިޓީން ބޭއްވި ބައްދަލުވުމެއްގައި ޕީޕީއެމްގެ ނައިބު ރައީސް އަދި ފިޝަރީޒް މިނިސްޓަރު އަހުމަދު ޝިޔާމް ވެސް ވިދާޅުވެފައި ވަނީ ޕީޕީއެމުން ރޯދަ މަސް ތެރޭގައި މަޖިލިސް އިންތިހާބު ބާއްވަން އެއްވެސް އިރެއްގައި ތާއީދުކޮށްފައި ނުވާނެ ކަމަށެވެ.
މަޖިލިހުގެ އިހަވަންދޫ ދާއިރާގެ އެމްޑީޕީގެ މެމްބަރު މުހައްމަދު ޝިފާއު ހުށަހެޅުއްވި އިސްލާހުގައި ވަނީ ރޯދަމަހުގެ ތެރޭގައި އެއްވެސް އިންތިހާބެއް ބާއްވައިގެން ނުވާނެ ކަމަށެވެ. އިންތިހާބު ބާއްވަންޖެހޭ ތާރީހު ރޯދަމަހުގެ ދުވަހަކާ ދިމާވާ ނަމަ އެ އިންތިހާބެއް ބާއްވަން ވާނީ ރޯދަމަސް ނިމުމުގެ 10 ދުވަސް ފަހުން ކަމަށް އިސްލާހުގައިވެއެވެ.
އިންތިހާބަކާ ގުޅޭ ހާއްސަ ގާނޫނު ނުވަތަ އާންމު ގާނޫނުގެ ދަށުން އެކި ކަންކަމަށް ކަނޑައަޅާފައިވާ މުއްދަތުތަކަށް އަމަލު ކުރެވެން ނެތް ހާލަތެއް ކުރިމަތިވެއްޖެ ނަމަ، ރޯދަމަހު އިންތިހާބު ނުބޭއްވުމަށްޓަކައި ގާނޫނުގައި ބުނާ މުއްދަތުތަކަށް ބަދަލު ގެނެސް، އިލެކްޝަން ކޮމިޝަނުން އަލުން މުއްދަތުތައް ކަނޑައަޅަން ވާނެ ކަމަށް އިސްލާހުގައިވެއެވެ.
މީގެއިތުރުން ޝިފާއުގެ އިސްލާހުގައި ވޯޓު ކަރުދާހުގައި ކެންޑިޑޭޓުގެ ނަމާ ދިމާލުގައި ސައްހަ ފާހަގައެއް ޖަހާފައިވާ ނަމަ، އެއީ ރަނގަޅު ވޯޓެއްގެ ގޮތުގައި ބެލުމަށް ވެސް ހިމަނާފައިވެއެވެ. މި އިސްލާހުތައް މަޖިލިހުން ފާސްވީ ވޯޓުގައި ބައިވެރިވެވަޑައިގެންނެވި 46 މެމްބަރުންގެ އަޣުލަބިއްޔަތުންނެވެ. އެކަމާ ދެކޮޅަށް ވޯޓު ދެއްވާފައި ވަނީ ފަސް މެމްބަރުންނެވެ. މި ބިލް މަޖިލިހުން ފާސް ކުރީ ސަރުކާރަށް ތާއީދު ކުރައްވާ މެމްބަރުންގެ ވޯޓާ ނުލައެވެ.
ކޮމެންޓު ފޮނުވާ