ސަރުކާރުން އިންތިޒާމްކޮށްގެން މިއަދު ދުބާއީގައި ބޭއްވި އިންވެސްޓްމަންޓް ފޯރަމްގައި 130 ކުންފުންޏަކުން 290 މަންދޫބުން ބައިވެރިވި ކަމަށް މިނިސްޓްރީން ބުނެފި އެވެ. މި ފޯރަމް އިންތިޒާމްކުރީ މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުންނެވެ.
މި ފޯރަމްގައި ބައިވެރިވި ބޭރުގެ ފަރާތްތަކުގެ އަދަދު މަދުވެގެން ސޯޝަލް މީޑިއާގައި ބައެއް ފަރާތްތަކުން ފާޑުކިޔަމުން ދަނިކޮށް އިކޮނޮމިކް މިނިސްޓްރީން ނެރުނު ބަޔާނެއްގައި ބުނެފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޝަރަފުވެރިކޮށްދެއްވި މި ފޯރަމްގައި އިކޮނޮމިކް މިނިސްޓަރު މުހައްމަދު ސައީދު އާއި ފޮރިން މިނިސްޓަރު މޫސާ ޒަމީރު އަދި އެންވަޔަރަމަންޓް މިނިސްޓަރު ތާރިގް އިބްރާހިމް ވަނީ ބައިވެރިވެވަޑައިގެންފަ ވާކަމަށެވެ.
އަދި މި ފޯރަމްގައި އަބޫދާބީ ފަންޑު ފޯ ޑިވެލޮޕްމަންޓް ޑިރެކްޓާ ޖެނެރަލް ވެސް ބައިވެރިވެވަޑައިގެން ވާހަކަ ދެއްކެވި ކަމަވެސް ބަޔާނުގައި ބުނެފައި ވެއެވެ.
އިކޮނޮމިކް މިނިސްޓްރީގެ ބަޔާނުގައި ބުނެފައިވަނީ، މި ފޯރަމްގައި އެކިއެކި ވިޔަފާރިތަކާއި ދެމެދު ފަސޭހަ މާހައުލެއްގައި ވާހަކަދެއްކެވި ގުޅުން ބަދަހި ކުރުމަށް މަގުފަހި ކުރުމުގެ ގޮތުން ބޭއްވި މި ފޯރަމްގައި ސަރުކާރުގެ މުހިންމު އިސްތިރާޖީ މަޝްރޫތަކަށް އަލި އަޅުއްވާލެވުނު ކަމަށެވެ.
އެގޮތުން މި ފޯރަމްގައި 290 އަށްވުރެ ގިނަ ފަރާތްތަކުން ބައިވެރިވެފައިވާކަމަށްވެސް އިކޮނޮމިކް މިނިސްޓްރީގެ ބަޔާނުގައި ބުނެފައި ވެއެވެ.
އޭގެ ތެރޭގައި ޕޯޓު އަދި ލޮޖިސްޓިކްސް، އިއާދަކުރަނިވި ހަކަތަ، ރިއަލް އެސްޓޭޓް، ފަތުރުވެރިކަން އަދި ބިނާވެރިކަން ފަދަ އެކިއެކި ދާއިރާތަކުގައި ހަރަކާތްތެރިވާ 130 ކުންުފުނި ތަމްސީލުވެފައިވާކަމަށްވެސް އިކޮނޮމިކް މިނިސްޓްރީން ބުނެފައި ވެއެވެ.
މި ފޯރަމްގައި އިންވެސްޓްމަންޓް ޑެސްޓިނޭޝަނެއްގެ ގޮތުގައި ރާއްޖެ ކުރިއަށް ދިޔުމަށް އޮތް ތަސައްވުރާއި ބައިނަލްއަގުވާމީ ބައިވެރިންނާއިއެކު އިންވެސްޓްމަންޓް ޕާޓްނާޝިޕްތައް ގާއިމު ކުރުމުގެ މުހިންމުކަން ފާހަގަ ކުރައްވައި ރައީސް މުއިއްޒު ވާހަކަދެއްކެވި އެވެ.
