ވާރޭ ވެހުމުން ހުޅުމާލޭ ސަހަރާގައި ފެންބޮޑުވެ މީހުން ވަޅުނުލެވޭ މައްސަލަ ޙައްލުކުރުމުގެ ގޮތުން ވެލިއަޅައި، ޑްރެއިން ސިސްޓަމެއް ގާއިމްކުރަން މާލެ ސިޓީ ކައުންސިލުން ނިންމައިފިއެވެ. އެކައުންސިލުން ވަނީ ދޮޅު ފޫޓަށް ވެލި އުޅުމަށް ނިންމާފައެވެ.
މާލެއަށް ދާދިފަހުން ކުރި ވިއްސާރައާއި ގުޅިގެން ހުޅުމާލޭ ސަހަރާގައި ފެންބޮޑުވެ ވަގުތީގޮތުން ވަނީ މީހުން ވަޅުލުން މެދުކަނޑާލާފައެވެ. އަދި މަރުވާ މީހުން ވަޅުލަނީ އާސަހަރާގައެވެ.
މިކަމަށް ދާއިމީ ޙައްލެއް ގެނައުމުގެ ގޮތުން މާލެ ސިޓީ ކައުންސިލްގެ ބައްދަލުވުމަށް ޙައްލު ހުށައެޅުއްވީ ހުޅުމާލެ ދާއިރާގެ މެންބަރު އިބްރާޙިމް ޝުޖާއުއެވެ.
އެގޮތުން ހިނަވާގެއާއި ސަހަރާގެ ޚިދުމަތްތައް ލުއިފަސޭހަކުރުމަށާއި، ސަހަރާގައި ފެން ހިންދާ ނިޒާމެއް ޤާއިމުކުރުމަށާއި، ފާޚާނާ ބަރިއަކާއި ވުޟޫ ކުރުމަށް ޚާއްސަ ސަރަޙައްދު އަދި ތުއްތު ކުދިން ގޮވައިގެން އުޅޭ މީހުންނަށް ލުއިފަސޭހަކުރުމަށް ބޭބީ ކެއަރ ރޫމެއް ހެދުމަށް އޭނާ ހުށައެޅުއްވިއެވެ. އެއީ ސަހަރާ މިސްކިތާއި ވަކިން، ކަށު ނަމާދާއި ޖަނާޒާގެ ކަންކަމުގައި ބައިވެރިވުމަށް އަންނަ މީހުންނަށް ޚާއްސަކޮށް، އަންހެނުންނަށް 2 ފާޚާނާއާއި ފިރިހެނުންނަށް 2 ފާޚާނާ ހެދުމަށެވެ.
އަދި އެ މައްސަލަ ހައްލު ކުރަން މައްޗަންގޮޅި މެދު ދާއިރާގެ ކައުންސިލަރު އަހުމަދު ޒަމީރު ހުށަހެޅުއްވީ ސަހަރާ އަށް ދޮޅުފޫޓަށް ވެލިއެޅުމަށްވެސް ވަނީ ހުށައަޅާފައެވެ. ސަހަރާގެ މަރާމާތުގައި އިތުރު ކަންކަން ހިމަނައި އެކަން ފާސްކުރީ ބައްދަލުވުމުގައި ބައިވެރިވެވަޑައިގެންނެވި ހުރިހާ މެމްބަރުންގެ އިއްތިފާގުންނެވެ.
މޫނު ބެލުމާއި ކަށުނަމާދަށް ފުރޮޅުލީ ގޮނޑީގައި އަންނަ މީހުންނަށް ފަސޭހައިން ބައިވެރިވެވޭގޮތަށް، ވީލް ޗެއަރ އެކްސެސް ޤާއިމުކުރުމަށްވެސް ހުށައެޅިއެވެ.
