މާލޭގެ އިންތިހާބީ މޭޔަރު އާދަމް އާޒިމް، މާލެ އަށް ބޭނުންވާ ހިދުމަތްތައް ފޯރުކޮށްދެއްވާނެ ކަމުގެ ޔަގީން ކަން އޮތް ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) ގެ ސީއީއޯ ޑރ. މަރިޔަމް ޒުލްފާ މިއަދު ވިދާޅުވެއްޖެއެވެ.
ޒުލްފާ "އެކްސް" ގައި ކުރެއްވި ޕޯސްޓެއްގައި ވިދާޅުވީ އިންތިހާބީ އާ މޭޔަރު އާޒިމަށް ހޫނު މަރުހަބާއެއް ދަންނަވާ ކަމަށެވެ. އަދި މާލެ އަށް ބޭނުންވާ ހިދުމަތްތައް އާޒިމް ފޯރުކޮށްދެއްވާނެ ކަމުގެ ފުރިހަމަ ޔަގީންކަން އެބައޮތް ކަމަށް ޒުލްފާ ވިދާޅުވިއެވެ.
ޒުލްފާ ވިދާޅުވި ގޮތުގައި އެލްޖީއޭ އިން އޮތީ މާލެ ސިޓީ ކައުންސިލްގެ ޕްލޭނާއި ޕްރޮގްރާމްތައް ހިންގައި މާލެ ސިޓީ ތަރައްގީ ކުރުމަށް އެހީވެ ދިނުމަށް ތައްޔާރަށެވެ.
އިލެކްޝަންސް ކޮމިޝަން (އީސީ) ގެ ވަގުތީ ނަތީޖާ ދައްކާ ގޮތުގައި މާލޭގެ މޭޔަރަކަށް އިންތިހާބުވެވަޑައިގަތީ އެމްޑީޕީގެ ޓިކެޓުގައި ނުކުންނެވި އެމްޓީސީސީގެ ކުރީގެ ސީއީއޯ އާދަމް އާޒިމެވެ. އާޒިމަށް 7،621 ވޯޓު ލިބިވަޑައިގެންނެވި އިރު، އޭނާ އާ ވާދަކުރެއްވި ޕީއެންސީގެ ކެންޑިޑޭޓު އައިޝަތު އާޒިމާ ޝަކޫރަށް ލިބިވަޑައިގަތީ 5،031 ވޯޓެވެ.
ވަގުތީ ނަތީޖާ ދައްކާ ގޮތުން ތިން ވަނަ އަށް ދިޔަ ދަ ޑިމޮކްރެޓްސްގެ ކެންޑިޑޭޓު މުހައްމަދު ސައިފަށް 2،343 ވޯޓު ލިބިވަޑައިގަތެވެ. އަމިއްލަ ގޮތުން ވާދަކޮށްގެން ހަތަރު ވަނަ އަށް ދިޔަ ކުރީގެ ޕޮލިސް ކޮމިޝަނަރު ހުސެއިން ވަހީދަށް 1،888 ވޯޓު ލިބިވަޑައިގަތެވެ. އަދި އަމިއްލަ ގޮތުން ވާދަކޮށްގެން ފަސް ވަނަ އަށް ދިޔަ ޝުއައިބު އަލީ އަށް 125 ވޯޓު ލިބިވަޑައިގެންނެވި އެވެ.
މި ބައި އިލެކްޝަންގައި 54،680 މީހުންނަށް ވޯޓުލުމުގެ ހައްގު ލިބިދިން ނަމަވެސް ވޯޓުލާފައި ވަނީ 17،008 މީހުންނެވެ. ބާތިލް ވޯޓުގެ ގޮތުގައި 402 ވޯޓު ގުނާފައިވެ އެވެ.
