މާލެސިޓީ ކައުންސިލް ބައި-އިލެކްޝަން 2024އާ ގުޅޭގޮތުން ބައެއް މީޑިއާތަކަށް ދެއްވި އިންޓަވިޔުއެއްގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ ހުކުރު ދުވަހުގެ މޫސުން ވަރަށް ބޮޑަށް ގޯސްވުމާއި ގުޅިގެން މާލެއަށް އަންނަން ޖެހޭ ބައެއް މީހުންނަށް ނާދެވުމާއި ގުޅިގެން ވަރަށް ގިނަބަޔަކު ވޯޓުލާ ވަގުތު އިތުރުކޮށްދިނުމަށް އެދުނު ކަމަށެވެ. އެހެންކަމުން ވޯޓުލެވޭ ވަގުތު ހަވީރު 4:00ށް އޮތް ނަމަވެސް 5:00ށް ބަދަލުކޮށްފައިވާ ކަމަށް ހަބީބު ވިދާޅުވިއެވެ.

ވޯޓުލާން އަންނަ މީހުންގެ އަދަދު ވަރަށް މަދުކަން ފާހަގަކުރައްވައި ހަބީބު ވިދާޅުވީ މެންދުރުފަހުން ގިނަ ބަޔަކު ވޯޓުލުމަށް ނުކުންނާނެ ކަމަށް ބެލެވޭ ކަމަށެވެ. މީހުން ވޯޓުލުމަށް ނެރުމުގެ މަސައްކަތުގައި ކެންޑިޑޭޓުންނާއި ސަޕޯޓަރުން އުޅޭކަން އޭނާ ފާހަގަކުރެއްވިއެވެ.

މާލެ ސިޓީ ކައުންސިލްގެ ބައި އިލެކްޝަނުގެ އިތުރުން މ.މުލަކު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި އިލެކްޝަން ވެސް ވަނީ ފަށާފައެވެ.

ހަބީބު ވިދާޅުވީ ވޯޓުލުމުގެ ހުރިހާ ކަމެއް ވަރަށް ސުލްހަމަސަލަސްކަމާއެކު ކުރިއަށްދާ ކަމަށާއި، 8:25 ކުރިން އެންމެ ވޯޓު ފޮއްޓެއް ފިޔަވައި ހުރިހާ ވޯޓު ފޮއްޓެއްގައި ވޯޓުލުން ފެށި ކަމަށެވެ.

މާލޭގެ މޭޔަރާއި އެ ކައުންސިލުން ހުސްވެފައިވާ ތިން ގޮނޑިއަކަށް މެމްބަރުން އިންތިހާބު ކުރުމަށް ބާއްވާ ބައި އިލެކްޝަންގެ ވޯޓުލުން އިލެކްޝަންސް ކޮމިޝަން (އީސީ) އިން ފެށީ މިއަދު ހެނދުނު 8:00 ގައެވެ. މި އިންތިހާބުގެ ވޯޓުލުން މިއަދު ހަވީރު 5:00 އަށް ކުރިއަށް ގެންދިއުމަށް ވަނީ ހަމަޖެހިފައެވެ.

މާލޭގެ މޭޔަރަކު ހޮވުމަށް ބާއްވާ ބައި އިލެކްޝަންގައި އާޒިމާ އާއި އާޒިމްއާ އެކުގައި ފަސް ކެންޑިޑޭޓުން ވާދަކުރައްވައެވެ. ދެން މި އިންތިހާބުގައި ވާދަކުރައްވަނީ ޑިމޮކްރެޓްސްގެ ފަރާތުން ކައުންސިލްުގެ ގަލޮޅު އުތުރު ދާއިރާގެ މެންބަރު ސައިފް ފާތިހް (އައިކޮ) އާއި އަމިއްލަ ގޮތުން ކުރީގެ ޕޮލިސް ކޮމިޝަނަރު ހުސެން ވަހީދާއި ޝުއައިބު އަލީ އެވެ.

މާލޭގެ މޭޔަރުގެ ގޮނޑި ހުސްވީ އެ މަގާމުގައި ހުންނެވި ރައީސް ޑރ. މުހައްމަދު މުއިއްޒު ރައީސް ކަމަށް އިންތިހާބުވެވަޑައިގެން، ވެރިކަމުގެ ހުވާ ކުރެއްވުމުންނެވެ. އަދި ސިޓީ ކައުންސިލްގެ ތިން ގޮނޑި ހުސްވީ އެ މަގާމުތަކުގައި ތިއްބެވި ބޭފުޅުން ސަރުކާރުގެ މަގާމުތަކަށް ވަޑައިގަތުމުންނެވެ.