މޯލްޑިވްސް އިސްލާމިކް ބޭންކް (އެމްއައިބީ) އިން ނަގާފައިވާ ފައިނޭންސިން ފެސިލިޓީއަކަށް ގަވައިދުން ފައިސާ ނުދައްކައިގެން ހަ މަސް ދުވަހުގެ ތެރޭގައި ހަތަރު މިލިއަނަށް ވުރެ ގިނަ ރުފިޔާ ބޭންކަށް ދައްކަން ސިވިލް ކޯޓަށް ކުރި ހުކުމާ ގުޅިގެން އޭނާ ކުރައްވާ މަސައްކަތަށް މަޑުޖެހުމެއް ނާންނާނެ ކަމަށާއި ފަހަތަށް ވެސް ޖެހިވަޑައިނުގަންނަވާނެ ކަމަށް ޕީޕީއެމް/ޕީއެންސީގެ ޓިކެޓުގައި މާލޭގެ މޭޔަރު ކަމަށް ވާދަކުރައްވާ ކުރީގެ ބަންޑާރަ ނައިބު އައިޝަތު އާޒިމާ ޝުކޫރު ވިދާޅުވެއްޖެއެވެ.

އާޒިމާ މިރޭ ނެރުއްވި ބަޔާނެއްގައި ވިދާޅުވީ ސިވިލް ކޯޓުން އޭނާގެ މައްޗަށް އެ ހުކުމް ކުރީ ޣައިރު ހާޒިރުގައި ކަމަށެވެ. މި ހުކުމް ކުރި ކަން އޭނާ އަށް އެނގުނީ މީޑިއާ މެދުވެރިކޮށް ކަމަށް ވެސް އާޒިމާގެ ބަޔާނުގައިވެއެވެ. އޭނާ ވިދާޅުވި ގޮތުގައި މި ފެސިލިޓީއަކީ ހުޅުމާލޭގައި އޭނާ ދިރިއުޅުއްވާ ފްލެޓު ގަތުމަށް 2016 ގައި ނެގި ލޯނެކެވެ.

އާޒިމާ ވިދާޅުވީ އޭނާ އަށް އާމްދަނީ ލިބެމުން ދިޔަ ދުވަސްތަކުގައި ގަވައިދުން އެ ފެސިލިޓީއަށް ފައިސާ ދައްކަމުން ދިޔަ ކަމަށާއި ނަމަވެސް ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން އޭނާގެ މައްޗަށް ކުރި ދައުވާއާ އެކު ދަސްކޮށްގެން ހުރި މަސައްކަތް ކަމުގައިވާ ގާނޫނީ ވަކީލްކަމުގެ މަސައްކަތް ކުރުމަށް ހުރަސްތަކެއް ކުރިމަތިވި ކަމަށެވެ.

އަދި ރާއްޖެ އިން ބޭރުން ލިބުނު ވަޒީފާގެ ފުރުސަތު ވެސް ބަންދުވި ކަމަށް އާޒިމާގެ ބަޔާނުގައިވެއެވެ.

"އަޅުގަނޑަކީ އަމިއްލަ މަސައްކަތުން ދިރިއުޅޭ މަޔަކަށްވުމުން ދިރިއުޅުމުގެ ހަރަދުތައް ހަމަޖައްސަނީ އަމިއްލަ މަސައްކަތުންނެވެ. ނަމަވެސް ކޮވިޑްގެ ހާލަތާ އެކުގައި ވަޒީފާއެއް ނެތި އާމްދަނީއެއް ހޯދުމަށް ކުރި ތަފާތު މަސައްކަތްތަކުން ލޯން ދެއްކުމުގައި އެކަށީގެންވާ ކުރިއެރުމެއް ވަނީ ނުލިބިފައެވެ،" އާޒިމާ ވިދާޅުވިއެވެ.

އާޒިމާ ވިދާޅުވީ މި ފަހުން ފައިސާ ދެއްކުމަށް ތާވަލެއް އެކުލަވާލައި ލޯން ރީސްޓްރަކްޗާ ކުރުމަށް ބޭންކަށް ހުށަހެޅުއްވި ކަމަށެވެ. ލޯން ރީސްޓްރަކްޗާ ކުރުމުގެ މަޝްވަރާތައް ޑިސެމްބަރު މަހުގައި ވެސް ކުރިއަށް ދިޔަކަން ފާހަގަ ކުރައްވައި އާޒިމާ ވިދާޅުވީ މި ހާލަތުގައި މި މަޝްވަރާ ކުރިއަށް ދަނިކޮށް ހުކުމް އައުމުން ވަކީލުންގެ މަޝްވަރާ އާ އެކު ހުކުމް ރިވިއު ކުރުމަށާއި އިސްތިއުނާފް ކުރުމަށް ނިންމައި ކޯޓަށް ހުށަހެޅުމުގެ މަސައްކަތް ކުރަމުންދާ ކަމަށެވެ.

"މި ދަނޑިވަޅުގައި ދިވެހި ރައްޔިތުންނަށް އަޅުގަނޑު ދޭ އޮތް ޔަގީންކަމަކީ އަޅުގަނޑަކީ ދައުލަތުގެ ބާރުގަދަ އެތައް މަގާމެއް އެތައް ފަހަރެއްގައި އަދާކުރި މީހަކަށްވީ ނަމަވެސް އަޅުގަނޑުގެ މުސާރަ ފިޔަވައި އެހެން އެއްވެސް ފައިސާއެއް ދައުލަތުން ނަގާފައި ނުވާނެ ކަމެވެ. އެހެންކަމުން އަޅުގަނޑުގެ ގެދޮރު މައްސަލަ މި ހިސާބަށް ދިޔަ އިރުގައި ވެސް ފައިސާ ދެއްކުމުގެ މަސައްކަތް ކުރެވޭތޯ މި ބަލަނީ ލިބިފައި ހުރި ތައުލީމްގެ މައްޗަށް ބިނާކޮށް ކުރާ މަސައްކަތުންނެވެ،" އާޒިމާ ވިދާޅުވިއެވެ.

އާޒިމާ ވިދާޅުވީ މިފަދަ ދަނޑިވަޅެއްގައި ކުއްލިއަކަށް ހުކުމެއް ނެރުމުގެ ސަބަބުން ކުރައްވަމުން ގެންދަވާ މަސައްކަތަށް މަޑުޖެހުމެއް އައިސް ފަހަތަށް ޖެހިވަޑައިނުގަންނަވާނެ ކަމަށް ވިދާޅުވެފައެވެ. މާލޭގެ މޭޔަރު ކަމަށް އިންތިހާބުވުމަށް ކުރައްވާ މަސައްކަތް މިއަދުން ފަށައިގެން ކުރިއަށްދާނީ އިހުނަށް ވުރެ ބާރަށް ކަމަށް އޭނާ ވިދާޅުވިއެވެ.