އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބުގައި ޖުމްހޫރީ ޕާޓީ (ޖޭޕީ) ގެ ޓިކެޓުގައި ވާދަކުރަން ޝައުގުވެރިވާ މީހުން ކުރިމަތިލުމުގެ މުއްދަތު އިތުރުކޮށްފިއެވެ.
ޖޭޕީން މިއަދު ނެރުނު ބަޔާނެއްގައި ބުނީ މި ދުވަސްވަރަކީ ސްކޫލް ބަންދު ދުވަސް ވަރަކަށްވުމާ ގުޅިގެން ގިނަ ބަޔަކު ރާއްޖެއިން ބޭރަށާއި ރާއްޖޭގެ އެކި ރަށްރަށަށް ދަތުރުކުރާ ދުވަސްވަރެއް ކަމުން ޖޭޕީގެ ޓިކެޓުގައި މަޖިލީހަށް ވާދަކުރަން ބޭނުންވެފައިވާ ފަރާތްތަކަށް ކުރިން ހުޅުވާލި މުއްދަތުގައި ފޯމު ހުށަހެޅުމަށް ވަރަށް ގިނަ ބަޔަކަށް ދަތިތަކެއް ކުރިމަތިވެފައިވާ ކަމަށެވެ.
އެޕާޓީ ޓިކެޓުގައި އެކި ދާއިރާތަކަށް ވާދަކުރައްވަން ބޭނުންވާ މީހުންނަށް އެ ފުރުސަތު ދިނީ މި މަހުގެ 17 އިން އިއްޔެގެ ނިޔަލަށެވެ. ނަމަވެސް މިހާރު އެ މުއްދަތު އަންނަ މަހުގެ 25 ވަނަ ދުވަހާ ހަމައަށް އިތުރުކޮށްފައިވާ ކަމަށް ޖޭޕީން ބުނެފައިވެއެވެ.
ކުރިމަތިލާ މެންބަރުން އެކަމަށް ހާއްސަކޮށްފައިވާ ފޯމާއެކު ސިވީ އަދި ތައުލީމީ ސެޓްފިކެޓްތަކުގެ ކޮޕީ އައިޑީކާޑާއެކު އެޕާޓީގެ މައި މަރުކަރު މ.ކުނޫޒަށް ސިޓީއަކުން ނުވަތަ އީމެއިލް [email protected] އަށް އީމެއިލް ކުރުމަށް އެޕާޓީން ވަނީ ބުނެފައެވެ.
ޖޭޕީން ބުނީ ކުރިމަތިލާ މެންބަރުންގެ ކެންޑިޑެންސީ ކަށަވަރު ވާނީ އިންތިހާބުގައި ވާދަ ކުރުމަށް އެދި ހުށަހަޅާ ފަރާތްތަކުގެ މައުލޫމާތުގެ ސައްހަކަމާއި ގާބިލުކަން ބެލުމަށް ފަހު، ޕާޓީގެ ކައުންސިލުން ނުވަތަ އެކަަމަށްޓަކައި ކަނޑައަޅާ ކޮމިޓީއަކުން ބެލުމަށް ފަހު ކަމަށެވެ.
