މި ސަރުކާރުގެ އަމާޒަކީ ފަސް އަހަރުގެ ދުވަހުގެ ތެރޭގައި ފުށިދިއްގަރު ފަޅުގައި މީހުން އާބާދު ކުރުން ކަމުގައި އާބަންކޯގެ އެމްޑީ ފަޒުލް ރަޝީދު ވިދާޅުވެއްޖެއެވެ.
ސަރުކާރުން މިހާރު ހިއްކަން ފަށާފައިވާ ފުށިދިއްގަރު ފަޅުގެ މަޝްރޫޢާއި ގުޅޭގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފަޒުލް ވިދާޅުވީ އާބަންކޯއާއި އާބަންކޯގެ ހުރިހާ މުވައްޒަފުންގެވެސް އަމާޒަކީ އެ އަމާޒަށް ވާސިލްވުން ކަމުގައެވެ.
އަދި އޭނާ ވިދާޅުވީ އެ ފަޅު ހިއްކުމަށް ކުރެވެމުންދާ މަސައްކަތުގެ ތެރޭގައި ގަވާއިދާ ގާނުނާ ޚިލާފް އެއްވެސް ކަމެއް ހިނގާފައިވާކަމަށް ޝައްކު ކުރެވޭއްނަމަ މައްސަލަ އޭސީސީއަށް ހުށަހެޅުއްވުމަށް އޭނާ އެދޭކަމުގައާއި، ގާނޫނާ ޚިލާފް އެއްވެސް ކަމެއް ހިނގާފައި ނުވާނެކަމުގެ ޔަގީންކަން އޮތް ކަމުގައެވެ.
މިހާރު ވެސް އޭސީސީއަށް މައްސަލައެއް ހުށަހަޅާފައި އެބައޮތް ރައްޔިތަކު އެ ބޭފުޅެއްގެ ކަންބޮޑުވުން ހިއްސާކުރައްވައި. އެކަމަށް މަރުހަބާ ދަންނަވަން. މީގަ އެބޭފުޅުން ވެސް ވަޑައިގަންނަވަނީ އަދި އަޅުގަނޑުމެން މި ހިސާބާ ހަމައަށް އައުމަށް ކުރި މަސައްކަތްތައް ދިރާސާކުރައްވަންވީ.
ފަޒުލް ވިދާޅުވިއެވެ.
މި ސަރުކާރުން ކުރިއަށްގެންދާނެ އެންމެ ބޮޑު އެއް މަޝްރޫއު ކަމަށްވާ ދެކުނު މާލެ އަތޮޅުގައި އޮންނަ ފުށިދިއްގަރު ފަޅު ހިއްކުމުގެ މަޝްރޫޢު، 'ރަސް މާލެ' މަޝްރޫއުގެ ފަޅު ހިއްކުމުގެ މަސައްކަތް ކުރިޔަށް ގެންދަނީ، ހުޅުމާލޭން 10 ހެކްޓަރުގެ ބިމާއި ފުށިދިއްގަރުފަޅުން ހިއްކާ ބިމުން 60 ހެކްޓަރު ސީއެމްސީއަށް ދީގެން ކަމަށް އާބަންކޯ އިން ވަނީ ބުނެފައެވެ.
މިއަދު އޮތް ނޫސްވެރިންގެ ބައްދަލުވުމުގައި އާބަންކޯގެ އެމްޑީ ފަޒުލް ރަޝީދު ވިދާޅުވީ ހުޅުމާލެއިން ދޫކުރާ 10 ހެކްޓަރު, އަދި ރަސްމާލެއިން ދޫކުރާ 60 ހެކްޓަރު ދީގެން އޭގެ ބަދަލުގައި އާބަންކޯއަށް 1093 ހެކްޓަރު ބިން ނުވަތަ އެސެޓް އެކުންފުންޏަށް ލިބިގެންދާ ކަމަށެވެ.
ފުށިދިއްގަރުފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެ ފަޅުން ހިއްކުމަށް ހަމަޖެހިފައިވަނީ 1153 ހެކްޓަރެވެ.
