ޣައްޒާގައި ހިނގަމުންދާ ހަގުރާމަ މިހާރުން މިހާރަށް ހުއްޓާލުމަށް ގޮވާލައި ސަލާމަތީ މަޖިލީހުގެ އެހެން ހުރިހާ މެމްބަރުންނާއި އެހެނިހެން އެތައް ގައުމެއްގެ ތާއީދު ލިބިގެން ހުށަހެޅި ގަރާރު އެމެރިކާއިން ވީޓޯކޮށްފިއެވެ. މިގަރާރަށް ތާއީދު ކުރި ފަރާތްތަކާއި ގާއުމުތަކުން ވަނީ މި ހަނގުރާމަ ތިން ވަނަ މަހަށް ދާއިރު އާންމުން މަރުވެ ހަލާކުވެދާނެ ކަމުގެ އިންޒާރު ދީފަ އެވެ.

15 މެމްބަރުންގެ މައްޗަށް އެކުލެވޭ ޔޫއެންގެ ސެކއިއުރިޓީ ކައުންސިލްގައި ނެގި ވޯޓުގައި ގަރާރަށް ތާއީދުކޮށް 13 ގައުމަކުން ވޯޓު ދީފައިވާއިރު ދެކޮޅަށް ވޯޓު ދީފައިވަނީ އެމެރިކާ އެކަންޏެވެ. އެގައުމުން ވަނީ މި ގަރާރު ވީޓޯ ކޮށްފައެވެ. އިނގިރޭސިވިލާތުން އެ ވޯޓުގައި ބައިވެރިވެފައެއް ނުވެއެވެ.

މި ވޯޓުގައި އެމެރިކާގެ އެކަހެރި ސްޓޭންޑުން ދައްކުވައިދެނީ އިސްރާއީލުން ޣައްޒާއަށް އެތައް މަހެއްވަންދެން ދެމުންދާ ބޮމުގެ ހަމަލާތަކާ ގުޅިގެން ވޮޝިންޓަނާއި އެގައުމުގެ އެންމެ ގާތް ބައެއް ބައިވެރިންނާ ދެމެދު އުފެދިފައިވާ ނުތަނަވަސްކަން އިތުރުވަމުން ދާކަންކަ ކަމުގައި މަސްރަހު ދިރާސާކުރާ ފަރާތްތަކުން ބުނެފައި ވެއެވެ. ހަނގުރާމަ ހުއްޓާލުމަށް ގޮވާލި ގޮވާލުމަށް ތާއީދުކުރި ގައުމުތަކުގެ ތެރޭގައި ފްރާންސާއި ޖަޕާން ހިމެނެ އެވެ.

ހަނގުރާމަ ހުއްޓާލުމަށް ގޮވާލުމާއި، ދެކޮޅު ވެރިކަން ދޫކޮށްލުމަށް ބައިޑަންގެ ސަރުކާރަށް ބާރުއެޅުމުގެ ގޮތުން މިސްރު، އުރުދުން، ފަލަސްތީނު އޮތޯރިޓީ، ގަތަރު، ސައުދީ އަރަބިއްޔާ އަދި ތުރުކީގެ ޚާރިޖީ ވަޒީރުން ހުކުރު ދުވަހު ވޮޝިންޓަންގައި ތިއްބެވި އެވެ. ނަމަވެސް އެމެރިކާގެ ސެކްރެޓަރީ އޮފް ސްޓޭޓް އެންޓަނީ ބްލިންކެންއާ އެ ބޭފުޅުންނަށް ބައްދަލުކުރެއްވުމުގެ ފުރުސަތު ލިބުނީ އދ.ގެ ވޯޓަށް ފަހުއެވެ.

ޔޫއެންގެ ވޯޓަށްފަހު، އެމެރިކާގެ ޑެޕިއުޓީ އެމްބެސެޑަރު ރޮބަޓް ވުޑް ވަނީ މި ގަރާރަކީ "ހަމަހަމަކަމެއް ނެތް" ގަރާރެއް ކަމަށް ސިފަކުރައްވާފައެވެ. އޭނާ ވިދާޅުވެފައިވަނީ ހަމާސް ޖަމާއަތުން އޮކްޓޯބަރު މަހުގެ 7 ވަނަ ދުވަހު އިސްރާއީލަށް ދިން ހަމަލާ މި ގަރާރުން ކުށްވެރިކޮށްފައި ނުވާއިރު، ހަނގުރާމަވެރިން 1،200 އެއްހާ މީހުން މަރާލި އިރު، އޭގެ ތެރޭގައި ގިނައީ އާންމުންކަމަށެވެ. އަދި އޭނާވަނީ މިގަރާރުން އަމިއްލައަށް ދިފާއުވުމަކީ އިސްރާއީލަށް ލިބިގެންވާ ހައްގެއް ގަބޫލު ކޮށްފައި ނުވާކަމަށްބުނެ، މި ވޯޓަށް ފަހު ކައުންސިލަށް ވަރަށް ބޮޑަށް ފާޑުވިދާޅުވެފަ އެވެ. އަދި އަސްކަރީ ފިޔަވަޅުތައް ހުއްޓާލުމުން ހަމާސް އަށް ޣައްޒާގައި ވެރިކަން ކުރުމުގައި ދެމިތިބުމުގެ ފުރުސަތު ލިބިގެންދާނެ ކަމަށާއި "ހަނގުރާމަ ކުރިއަށް ގެންދުމަށް ހިތްވަރު ލިބޭނެ" ކަމަށްވެސް އޭނާ ވިދާޅުވި އެވެ.

"ދެމެހެއްޓެނިވި ސުލްހައެއް ހޯދުމަށް، ދެ ދައުލަތުގެ ހައްލެއް ހޯދުމަށް ހަމާސްގެ އެއްވެސް ޝައުގެއް ނެތް،" ވޯޓުގެ ކުރިން ވުޑް ވިދާޅުވި އެވެ. "އެ ސަބަބަށްޓަކައި އިޒްރޭލާއި ފަލަސްތީނަށް ވެސް އަމާންކަމާއެކު ދިރިއުޅެވޭނެ ދެމެހެއްޓެނިވި ސުލްހައަކަށް އެމެރިކާ އިން ވަރަށް ބޮޑަށް ތާއީދުކުރާއިރު، ވަގުތުން ހަނގުރާމަ ހުއްޓާލުމަށް ގޮވާލާ ގޮވާލުންތަކަށް ތާއީދެއް ނުކުރަމެވެ."

އިސްރާއީލުން ދިން ބޮމުގެ ހަމަލާތަކުގައި ޣައްޒާގައި މިހާތަނަށް 17،400 އަށް ވުރެ ގިނަ މީހުން މަރުވެފައިވާ ކަމަށާއި އޭގެ ތެރެއިން 70 ޕަސެންޓަކީ އަންހެނުންނާއި ކުޑަކުދިން ކަމަށް ފަލަސްތީނުގެ ސަރަހައްދުގެ ސިއްހަތާ ބެހޭ ވުޒާރާއިން ބުނެއެވެ. މަދަނީ މީހުންނާއި ހަނގުރާމަވެރި މަރުތައް، މި ހިސާބުތަކުގައި ޢައްޒާގެ މިނިސްޓްރީން ތަފާތެއް ކޮށްފައެއް ނުވެއެވެ.

އެމެރިކާގެ ވީޓޯއަށްފަހު ރަޝިޔާއިން އދ.އަށް ކަނޑައަޅާފައި ހުންނަވާ ޑެޕިއުޓީ އެމްބެސެޑަރު ޑިމިޓްރީ ޕޮލިއަންސްކީ ވަނީ މި ވޯޓަކީ މެދުއިރުމަތީގެ ތާރީހުގައި ވެސް އެންމެ އަނދިރި އެއް ދުވަސް ކަމަށް ސިފަކުރައްވައި، އެމެރިކާއިން "ފަލަސްތީނާއި އިސްރާއީލުގައި އަންހެނުންނާއި ކުޑަކުދިން ހިމެނޭ ގޮތަށް އެތައް ހާސް އާންމުންނެއް ނޫން ނަމަ އެތައް ހާސް ބަޔަކަށް މަރުގެ ހުކުމެއް އިއްވަމުން ގެންދަވާ" ކަމަށް ތުހުމަތު ކުރައްވާފައެވެ.

ފަލަސްތީނުގެ އދ.އަށް ކަނޑައަޅާފައި ހުންނަވާ ސަފީރު ރިޔާދު މަންސޫރު ކައުންސިލަށް ވިދާޅުވީ އިސްރާއީލުގެ މަގުސަދަކީ "ޣައްޒާގެ ނަސްލު ނައްތާލުމާއި" ފަލަސްތީނުގެ ރައްޔިތުން މަޖުބޫރުކޮށްގެން ގެދޮރުން ނެރެލުން ކަމުގައެވެ. ވޯޓަށްފަހު އޭނާ ވަނީ އެމެރިކާއިން ވީޓޯ ކުރުމަކީ ނުރައްކާތެރިކަމެއްގެ ގޮތުގައި ސިފަކޮށް، މިއީ ހިތާމަވެރި ދުވަހެއް ކަމަށް ސިފަކުރައްވައި، މިއީ ސަލާމަތީ މަޖިލީހަށް ވަރަށް ނުރައްކާތެރި ދުވަހެއް ކަމަށް ވިދާޅުވެފައެވެ.

ވޮޝިންޓަންގައި ހުންނެވި އުރުދުންގެ އިސް ޑިޕްލޮމެޓް ނޫސްވެރިންނާ ވާހަކަ ދައްކަވަމުން ވިދާޅުވީ އިސްރާއީލުން ޣައްޒާއަށް ބޮން އެޅުމާއި އަދި ގާޒާ ހިސޯރުކޮށް، ފަލަސްތީނުގެ އާންމުން މަރަމުން ދިއުމަކީ ހަނގުރާމައިގެ ޖަރީމާތަކެއް ކަމަށާއި، އޭގެ ނަތީޖާއެއްގެ ގޮތުން ކުރިއަށް އޮތް އަހަރުތަކުގައި އެ ސަރަހައްދާއި އެމެރިކާ އަދި ދުނިޔެ ހަލަބޮލިކޮށްލާނެ ކަމުގެ އިންޒާރު އޭނާވަނީ ދީފައެވެ.

އެމްނެސްޓީ އިންޓަނޭޝަނަލްގެ ސެކްރެޓަރީ ޖެނެރަލް އެގްނެސް ކަލަމާޑް ވަނީ އިޒްރޭލުގެ ސަރުކާރަށް ހަތިޔާރު ފޯރުކޮށްދިނުމުގެ މަސައްކަތް އެމެރިކާއިން ކުރިއަށް ގެންދާތީ އެކަމަށް ވަރަށް ބޮޑަށް ފާޑުވިދާޅުވެފައެވެ.

އޭގެ އިތުރުން ހިއުމަން ރައިޓްސް ވޮޗްގެ އދގެ ޑިރެކްޓަރު ލުއީ ޗާބޯނައު ވިދާޅުވީ އިސްރާއީލަށް ހަތިޔާރާއި ޑިޕްލޮމެޓިކް ހިމާޔަތް އެމެރިކާއިން ފޯރުކޮށްދިނުމުން "ޣައްޒާގައި ދިރިއުޅޭ ފަލަސްތީނުގެ އާންމު އާބާދީއަށް އެންމެން ގުޅިގެން އަދަބު ދިނުން ފަދަ ޖަރީމާތައް ހިންގަމުންދާއިރު، އެމެރިކާއިން ހަނގުރާމައިގެ ޖަރީމާތަކުގައި ބައިވެރިވާކަމުގައި ބެލެވެން އެބައޮތް" ކަމުގައެވެ.

އޭގެ އިތުރުންވެސް، ހަގުރާމަ ހުއްޓާލުމަށް ގޮވާލާ ގަރާރު އެމެރިކާއިން ވީޓޯ ކުރުމުން ދުނިޔޭގެ ގިނަ ގައުމުތަކެއްގެ ފާޑުކިޔުން އެގައުމަށް ވަނީ އަމާޒު ވެފައެވެ.