ރައްޔިތުންގެ މަޖިލީހުގެ ހުސްވެފައިވާ ނައިބު ރައީސް ކަމުގެ މަގާމަށް އެމްޑީޕީގެ ފަރާތުން ހޯރަފުށީ ދާއިރާގެ މެންބަރު އަހުމަދު ސަލީމް ވާދަކުރައްވާ ގޮތަށް އެ ޕާޓީގެ ޕާލަމެންޓްރީ ގުރޫޕުން މިއަދު ފާސްކޮށްފިއެވެ.
އެގޮތަށް ފާސް ކުރީ މިއަދު ހަވީރު ނެގި އެމްޑީޕީގެ ޕާލަމެންޓްރީ ގްރޫޕްގެ ސިއްރު ވޯޓަކުންނެވެ.
މަޖިލިހުގެ ނައިބު ރައީސްކަމަށް ވާދަކުރައްވަން ޝައުގުވެރިކަން ދެން ފާޅުކުރެއްވީ ސަލީމްގެ އިތުރުން އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި ކާށިދޫ ދާއިރާގެ މެންބަރު އަބްދުﷲ ޖާބިރެވެ. ސިއްރު ވޯޓުގައި، ވޯޓުލުމުގެ ހައްގު ލިބިގެންވާ 55 މެންބަރުން ވޯޓު ދެއްވި އިރު، ސަލީމަށް ވޯޓު ދެއްވީ 26 ބޭފުޅެކެވެ.
ރޮޒައިނާއަށް ލިބިވަޑައިގަތީ 23 ވޯޓެވެ. ޖާބިރަށް ހަތަރު ވޯޓު ލިބިވަޑައިގެންނެވިއިރު، ދެ މެންބަރުންގެ ވޯޓު ބާތިލެވެ.
މަޖިލިހުގެ އާ ނައިބު ރައީސް އިންތިހާބުކުރުމަށް ބާއްވާ ޖަލްސާ އޮންނާނީ މިރޭ އަށެއް ޖަހާއިރުއެވެ.
މަޖިލީހުގެ ނައިބު ރައީސް ކަމުގެ މަގާމު ހުސްވީ އެ މަގާމުގައި ހުންނެވި ގަލޮޅު އުތުރު ދާއިރާގެ މެންބަރު އީވާ އަބްދުﷲ މިއަދު އިސްތިއުފާ ދެއްވުމާ ގުޅިގެންނެވެ.
