ރައްޔިތުންގެ މަޖިލިހުގެ ނައިބު ރައީސްގެ މަގާމުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ދެންމެ އިސްތިއުފާ ދެއްވައިފިއެވެ.
މަޖިލިހުގެ އެޖެންޑާގައި މިއަދު އޮތީ މަޖިލިހުގެ ނައިބު ރައީސް ކަމުން އީވާ ވަކި ކުރަން ހުށަހަޅާފައި އޮތް މައްސަލައާ މެދުގައި ގޮތެއް ނިންމުމެވެ. އެމްޑީޕީގެ 49 މެމްބަރަކާއި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) ގެ ސޮޔާއެކު މަޖިލިހުގެ މިއަދުގެ ޖަލްސާ އަށް ގަރާރު ހުށަހެޅުއްވީ ދުވާފަރު ދާއިރާގެ މެމްބަރު އިސްމާއިލް އަހުމަދެވެ. އެ ގަރާރަށް ބަހުސް ކުރަން ހުޅުވާލި ފުރުސަތުގައި އެންމެ ފުރަތަމަ ވެސް ވާހަކަ ދެއްކެވީ އީވާއެވެ.
އީވާގެ ވާހަކަ ނިންމަވާލެއްވި ތަނުން، އޭނާ ވަނީ އިސްތިއުފާގެ ސިޓީ މަޖިލިހުގެ އިދާރީ މޭޒާ ހަވާލުކޮށްފައެވެ. އެ ސިޓީގައި ބުނެފައި ވަނީ ރާއްޖޭގެ ގާނޫނުއަސާސީގެ 82 ވަނަ މާއްދާގެ (ނ) ގެ ދަށުން މިއަދުން ފެށިގެން މަޖިލިހުގެ ނައިބު ރައީސްގެ މަގާމުން އިސްތިއުފާ ދެއްވައި އެކަން މަޖިލިހުގެ ރައީސް މުހައްމަދު އަސްލަމަށް އަންގަވާ ކަމަށެވެ.
އެއާއެކު، އެމްޑީޕީގެ މެމްބަރު ނިޒާމީ މައްސަލަ ނަންގަވައި ވިދާޅުވީ މަޖިލިހަށް ކަމެއް ހުށަހެޅިއްޖެ ނަމަ، އެކަމާ މެދުގައި ގޮތެއް ނިންމަން ޖެހޭނީ މެމްބަރުންގެ މެދުގައި ބަހުސްކޮށް ވޯޓަކަށް ގޮސްގެން ކަމަށާއި އީވާ އިސްތިއުފާ ދެއްވާ ހިސާބުން އެ މައްސަލަ ކުރިއަށް ނުގެންގޮސް ނިންމާލަން ޖެހޭ ކަމަށް ފެނިވަޑައިނުގަންނަވާ ކަމަށެވެ.
"ޖަވާބުދާރީވެއްޖެ ނަމަ، ދިފާއުގައި ވާހަކަ ދެއްކުމުގެ ހައްގު އޮންނަން ޖެހޭނެ. އަދި ވޯޓަކުން މި މައްސަލަ ނިމިގެން ދާން ޖެހޭނީ،" މަޖިލިހުގެ ކެލާ ދާއިރާގެ އެމްޑީޕީގެ މެމްބަރު އިބްރާހިމް ޝަރީފް ވިދާޅުވިއެވެ.
ޝަރީފްގެ ނިޒާމީ މައްސަލައާ ގުޅިގެން ރިޔާސަތުގައި އިންނެވި މަޖިލިހުގެ ރައީސް އަސްލަމް ވިދާޅުވީ މެމްބަރުން ފާހަގަ ކުރައްވާ މާއްދާއެއް މަޖިލިހުގެ ގަވައިދުގައި ނެތް ކަމަށެވެ. އަދި މަޖިލިހުގެ ގަވައިދުގައި އެފަދަ މާއްދާއެއް އޮތް ނަމަ، އެ މާއްދާއެއް ރިޔާސަތުގެ ސަމާލުކަމަށް ގެންނެވުމަށް އެދޭ ކަމަށް އަސްލަމް ވިދާޅުވިއެވެ.
"މަޖިލިހުގެ ގަވައިދު ބަޔާންކުރާ ގޮތުން އިސްތިއުފާގެ ސިޓީއެއް މަޖިލިހުގެ ރައީސަށް ލިބުމުން އެ އިސްތިއުފާ ދެވުނީ. އިސްތިއުފާ ދިނުމަށް ފަހު ދެން އެ އިސްތިއުފާ އާ ގުޅޭ މައްސަލައެއް ކުރިއަށް ގެންދެވިދާނެ ކަމަކަށް ފެންނަން ނެތް ވާހަކަ ދަންނަވަން،" އަސްލަމް ވިދާޅުވިއެވެ.
އީވާ ވަކި ކުރަން މަޖިލިހަށް ހުށަހެޅި ގަރާރުގައި ބުނެފައި ވަނީ އެމްޑީޕީގެ ފަރާތުން މެމްބަރު ކަމަށް ވާދަކުރެއްވި ކެންޑިޑޭޓުންގެ ތެރޭގައި ހިމެނިވަޑައިގެން އީވާ މަޖިލިހަށް އިންތިހާބުވެވަޑައިގަތީ އެމްޑީޕީ ޓިކެޓުގައި ވާދަކުރާ ކެންޑިޑޭޓުންގެ އިގްރާރުގައި ސޮއިކޮށްގެން ކަމަށާއި އިންތިހާބުވެއްޖެ ނަމަ، އެމްޑީޕީގެ މެމްބަރެއްގެ ގޮތުގައި ދެމިހުންނަވާނެ ކަމަށް އެ އިގްރާރުގައި ބަޔާންކޮށްފައި ވަނިކޮށް އީވާ އަމިއްލަ އަށް އެދިގެން ޕާޓީން ވަކިވެފައިވާތީ އެ އަމަލަކީ އިގްރާރާ ހިލާފުވުން ކަމަށެވެ.
ރައްޔިތުންގެ މަޖިލިހުގެ ނައިބު ރައީސް ކަމަށް އީވާ އިންތިހާބުކޮށްފައި ވަނީ އެމްޑީޕީގެ ޕާލަމެންޓްރީ ގްރޫޕްގައި ނެގި ވޯޓެއްގައި ފާސްކޮށް އެމްޑީޕީގެ ފަރާތުން މަޖިލިހަށް ހުށަހަޅައި އެ ޕާޓީގެ ހުރިހާ މެމްބަރުންގެ ވޯޓާ އެކުގައި ކަމަށް ގަރާރުގައިވެއެވެ. މިކަމުގައި އެމްޑީޕީގެ މެމްބަރުން ވޯޓު ދެއްވާފައި ވަނީ އެމްޑީޕީން ރައްޔިތުންނަށްވީ ވައުދުތައް ހާސިލްކޮށްދިނުމާ އެކު، ނައިބު ރައީސްގެ ހައިސިއްޔަތުން ފުރިހަމަ އަށް އެއްބާރުލުން ދިނުމާއި އެމްޑީޕީގެ ސިޔާސަތުތައް ކުރިއެރުވުން މަތީ ދެމިހުރުމާއެކު އެމްޑީޕީ އަށް އިހްލާސްތެރި ވާނެ ކަމަށް އިތުބާރުކޮށްގެން ކަމަށް ވީ ނަމަވެސް އީވާ އަމިއްލަ އަށް އެދިގެން ޕާޓީން ވަކިވެވަޑައިގެންފައިވާތީ އީވާ އަށް ކުރަމުންދިޔަ އިތުބާރު ގެއްލިފައިވާ ކަމަށް ވެސް ގަރާރުގައިވެއެވެ.
ގަރާރުގައި ބުނީ މަޖިލިހުގެ ނައިބު ރައީސް ކަމުގެ މަގާމުގައި އީވާ ހުންނަވައި، ރައްޔިތުންގެ މަޖިލިހުގެ ކުރީގެ ރައީސް މުހައްމަދު ނަޝީދު މަގާމުން ވަކިކުރުމުގެ މައްސަލަ އެޖެންޑާކޮށްފައިވާ ޖަލްސާ އަށް ގަސްދުގައި ހުރަސް އެޅުއްވި ކަން އެމްޑީޕީގެ ޕާލަމެންޓްރީ ގްރޫޕަށް އެއްބަސްވެވޭ ކަމަށެވެ.
"އީވާ އަބްދުﷲ އަކީ ނަޝީދުގެ ދެބެންގެ ދެދަރި ބޭފުޅެއް ކަމާއި އީވާގެ އާއިލީ އަދި ޒާތީ މަސްލަހަތު ހިމާޔަތްކޮށް އެ އިއްޒަތްތެރި މެމްބަރާ ހާއްސަ ގުޅުމެއް އޮތް އާއިލީ ބޭފުޅެއްގެ މަސްލަހަތު ކުރިއެރުވުމަށް މަޖިލިހުގެ ރައީސްގެ މަގާމުން ވަކި ކުރުމުގެ މައްސަލައިގެ ރިޔާސަތާ ހަވާލުވެ، އެ މައްސަލަ އިން ތަނާޒަލްވާން އިންކާރުކޮށްފައި ވަނީ ގާނޫނުއަސާސީގެ 75 ވަނަ މާއްދާއާ ކަނޑައެޅިގެން ހިލާފަށް،" ގަރާރުގައި ބުނެފައިވެއެވެ.
މަޖިލިހުގެ ރައީސް ކަމުން ނަޝީދު ވަކި ކުރަން މަޖިލިހަށް ހުށަހެޅުމުން އެމަނިކުފާނު ވެސް ދާދި ފަހުން ވަނީ އިސްތިއުފާ ދެއްވައިފައެވެ.
