ރައްޔިތުންގެ މަޖިލީހުގެ ނައިބު ރައީސްގެ މަގާމުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަކިކުރަން މަޖިލިހަށް މިއަދު ހުށަހަޅައިފިއެވެ.
އީވާގެ މައްޗަށް އިތުބާރު ނެތް ކަމަށް ނިންމައި އެ މައްސަލަ މަޖިލިހަށް ހުށަހެޅުއްވީ އެމްޑީޕީގެ 49 މެމްބަރުންނާއި އަމިއްލަ ގޮތުން މަޖިލިހަށް ވާދަކުރެއްވި ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ ގެ ސޮޔާއެކުގައެވެ.
މަޖިލިހަށް ހުށަހެޅި ގަރާރުގައި ބުނެފައި ވަނީ އެމްޑީޕީގެ ފަރާތުން މެމްބަރު ކަމަށް ވާދަކުރެއްވި ކެންޑިޑޭޓުންގެ ތެރޭގައި ހިމެނިވަޑައިގެން އީވާ މަޖިލިހަށް އިންތިހާބުވެވަޑައިގަތީ އެމްޑީޕީ ޓިކެޓުގައި ވާދަކުރާ ކެންޑިޑޭޓުންގެ އިގްރާރުގައި ސޮއިކޮށްގެން ކަމަށާއި އިންތިހާބުވެއްޖެ ނަމަ، އެމްޑީޕީގެ މެމްބަރެއްގެ ގޮތުގައި ދެމިހުންނަވާނެ ކަމަށް އެ އިގްރާރުގައި ބަޔާންކޮށްފައިވަނިކޮށް އީވާ އަމިއްލަ އަށް އެދިގެން ޕާޓީން ވަކިވެފައިވާތީ އެ އަމަލަކީ އިގްރާރާ ހިލާފުވުން ކަމަށެވެ.
ރައްޔިތުންގެ މަޖިލިހުގެ ނައިބު ރައީސް ކަމަށް އީވާ އިންތިހާބުކޮށްފައި ވަނީ އެމްޑީޕީގެ ޕާލަމެންޓްރީ ގްރޫޕްގައި ނެގި ވޯޓެއްގައި ފާސްކޮށް އެމްޑީޕީގެ ފަރާތުން މަޖިލިހަށް ހުށަހަޅައި އެ ޕާޓީގެ ހުރިހާ މެމްބަރުންގެ ވޯޓާ އެކުގައި ކަމަށް ގަރާރުގައިވެއެވެ. މިކަމުގައި އެމްޑީޕީގެ މެމްބަރުން ވޯޓު ދެއްވާފައި ވަނީ އެމްޑީޕީން ރައްޔިތުންނަށްވީ ވައުދުތައް ހާސިލްކޮށްދިނުމާ އެކު، ނައިބު ރައީސްގެ ހައިސިއްޔަތުން ފުރިހަމަ އަށް އެއްބާރުލުން ދިނުމާއި އެމްޑީޕީގެ ސިޔާސަތުތައް ކުރިއެރުވުން މަތީ ދެމިހުރުމާއެކު އެމްޑީޕީ އަށް އިހްލާސްތެރި ވާނެ ކަމަށް އިތުބާރުކޮށްގެން ކަމަށް ވީ ނަމަވެސް އީވާ އަމިއްލަ އަށް އެދިގެން ޕާޓީން ވަކިވެވަޑައިގެންފައިވާތީ އީވާ އަށް ކުރަމުންދިޔަ އިތުބާރު ގެއްލިފައިވާ ކަމަށް ވެސް ގަރާރުގައިވެއެވެ.
ގަރާރުގައި ބުނީ މަޖިލިހުގެ ނައިބު ރައީސް ކަމުގެ މަގާމުގައި އީވާ ހުންނަވައި، ރައްޔިތުންގެ މަޖިލިހުގެ ރައީސް މުހައްމަދު ނަޝީދު މަގާމުން ވަކިކުރުމުގެ މައްސަލަ އެޖެންޑާކޮށްފައިވާ ޖަލްސާ އަށް ގަސްދުގައި ހުރަސް އަޅުއްވަމުން ގެންދަވާ ކަން އެމްޑީޕީގެ ޕާލަމެންޓްރީ ގްރޫޕަށް އެއްބަސްވެވޭ ކަމަށެވެ.
"އީވާ އަބްދުﷲ އަކީ ނަޝީދުގެ ދެބެންގެ ދެދަރި ބޭފުޅެއް ކަމާއި އީވާގެ އާއިލީ އަދި ޒާތީ މަސްލަހަތު ހިމާޔަތްކޮށް އެ އިއްޒަތްތެރި މެމްބަރާ ހާއްސަ ގުޅުމެއް އޮތް އާއިލީ ބޭފުޅެއްގެ މަސްލަހަތު ކުރިއެރުވުމަށް މަޖިލިހުގެ ރައީސްގެ މަގާމުން ވަކި ކުރުމުގެ މައްސަލައިގެ ރިޔާސަތާ ހަވާލުވެ، އެ މައްސަލަ އިން ތަނާޒަލްވާން އިންކާރުކޮށްފައި ވަނީ ގާނޫނުއަސާސީގެ 75 ވަނަ މާއްދާއާ ކަނޑައެޅިގެން ހިލާފަށް،" ގަރާރުގައި ބުނެފައިވެއެވެ.
އީވާގެ އިތުބާރު ނެތް ކަމުގެ މައްސަލައެއް މަޖިލިހަށް ހުށަހެޅި އިރު، މަޖިލިހުގެ ރައީސް ނަޝީދު އެ މަގާމުން ވަކިކުރަން ވެސް މަޖިލިހަށް ގަރާރެއް ހުށަހަޅާފައިވެއެވެ. އެ ގަރާރާ ގުޅިގެން މަޖިލިހުގެ ޖަލްސާތައް ކުރިއަކަށް ނުދެއެވެ.
