އުމުރަށް ޖަލަށް ލި އަބުޗާއަށް ޕެރޯލް ލިބިއްޖެ

އައްޑުއަށް މަސްތުވާތަކެތި ވަދެކޮށް ވިއްކާ ނެޓްވޯކެއްގެ ވެރިޔާ ކަމަށް ކޯޓުން ކަނޑައަޅާ، އުމުރަށް ޖަލަށް ލާފައިވާ އަބްދުﷲ އިބްރާހީމް (އަބުޗާ)، އޮކްޓޫބަރު 1 ވަނަ ދުވަހު ޕެރޯލްގައި ދޫކޮށްލައިފިއެވެ.

ކަރެކްޝަނަލް ސާވިސްއިން ބުނީ، ޤާނޫނުގައިވާ ޝަރުތުތައް ފުރިހަމަވުމުން ޕެރޯލް ބޯޑުން އަބުޗާއަށް މި ފުރުސަތު ދިން ކަމަށެވެ. ނަމަވެސް ޝަރުތުތަކުގެ ތަފްސީލު ހާމަކޮށްފައި ނުވެއެވެ. އެ ޝަރުތުތަކާ ޚިލާފުވެއްޖެނަމަ ބާކީ ހުކުމް އަނބުރާ ތަންފީޒުކުރެވޭނެއެވެ.

އަބުޗާ ހައްޔަރުކުރީ 2020 ވަނަ އަހަރުގެ އޮކްޓޫބަރުގައި، 61 ކިލޯ ޑައަމޯފިނާއި ގާތްގަނޑަކަށް 18 ކިލޯ މެޓަމްފެޓަމިން ރެސިން ޑިންގީއެއްގައި ގެންދަނިކޮށެވެ. ފުލުހުން ހުއްޓުވަން އުޅުނުއިރު ތަކެތި ކަނޑަށް އުކާލި ނަމަވެސް، ފުލުހުން ފީނައިގެން އެ ތަކެތި ހޯދިއެވެ. މި އޮޕަރޭޝަނުގައި ޖުމްލަ 18 މީހަކު ހައްޔަރުކުރިއެވެ.

ޓްރެފިކިންގެ ދެ ދައުވާއަކަށް އިއުތިރާފުވެ ދައުލަތާ އެއްބަސްވުމެއް ހެދުމުން، 50 އަހަރުގެ ހުކުމް 25 އަހަރަށް ކުޑަކޮށް، މިދިޔަ އަހަރުގެ މެއި މަހު އޭނާއަށް އުމުރަށް ޖަލު ހުކުމް އިއްވިއެވެ. ހައްޔަރުކުރިއްސުރެ އޭނާ ހަ އަހަރު ބަންދުގައި ހޭދަކޮށްފައިވެއެވެ.

ޤާނޫނަށް ފަހުން ގެނައި ބަދަލުތަކާއެކު ޓްރެފިކިން މައްސަލަތަކުގައި ޕެރޯލް ނުލިބޭ ނަމަވެސް، އަބުޗާގެ ހުކުމް އިއްވީ އެ ބަދަލުގެ ކުރިންނެވެ.

އަބުޗާ މީގެ ކުރިން ވެސް މަސްތުވާތަކެތީގެ މައްސަލަތަކުގައި އަށް ފަހަރު ހައްޔަރުކޮށްފައިވާއިރު، ޖަމާޢަތެއްގެ ގޮތުގައި ރޭޕްކުރުމުގެ މައްސަލައެއްގައި ވެސް ހައްޔަރުކޮށްފައިވެއެވެ.