ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ އާ މެމްބަރެއްގެ ގޮތުގައި ހ. މީނާޒް، ޝަމްއޫން ހަމީދު ރައީސް ޑރ. މުހައްމަދު މުއިއްޒު މިއަދު އައްޔަންކުރައްވައިފި އެވެ.
ރައީސް އޮފީހުގައި ހެނދުނު ބޭއްވި ރަސްމިއްޔާތެއްގައި އައްޔަންކުރެއްވުމުގެ ލިޔުން ހަވާލުކުރެއްވުމަށްފަހު، ޝަމްއޫނަށް ހުވާ ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ.
ޝަމްއޫން އަކީ މި ކޮމިޝަނުގައި ކުރިން ވެސް ތަޖުރިބާ ހޯދާފައިވާ ބޭފުޅެކެވެ. 2010 އިން 2012 އަށް އިންވެސްޓިގޭޝަން ޑިޕާޓްމަންޓުގެ ޑިރެކްޓަރުކަމާއި، 2012 އިން 2016 އަށް ސެކްރެޓަރީ ޖެނެރަލްކަން ވެސް އެކަލޭގެފާނު ކުރައްވާފައިވެ އެވެ. ޔޫޕީއާރު ރިޕޯޓިންގގައި ކޮމިޝަނުގެ ފޯކަލް ޕޮއިންޓެއްގެ ގޮތުގައި މަސައްކަތް ކުރެއްވުމުގެ އިތުރުން، ކުޑަކުދިންގެ ހައްގުތަކާއި ނުކުޅެދުންތެރިކަން ހުންނަ ކުދިންގެ ތައުލީމާ ގުޅޭ ގައުމީ ދިރާސާތަކުގައި ވެސް ޝަމްއޫން މުހިންމު ދައުރެއް އަދާކުރައްވާފައިވެ އެވެ.
މި މަގާމަށް އައްޔަންކުރެއްވުމުގެ ކުރިން ޝަމްއޫން ހުންނެވީ ދިވެހިބަހާއި ސަގާފަތާ ބެހޭ މިނިސްޓްރީގެ ޕާމެނެންޓް ސެކްރެޓަރީގެ މަގާމުގަ އެވެ.
ކޮމެންޓު ފޮނުވާ