ގދ. ތިނަދޫ ސިޓީގެ މޭޔަރު ސައުދު އަލީގެ މައްޗަށް، އެ ރަށަށް ސިޓީގެ ދަރަޖަ ހޯދުމަށް އާބާދީ އޮޅުވާލި ކަމުގެ ތުހުމަތުގައި އުފުލާފައިވާ ދައުވާތަކުގެ ޝަރީއަތުގެ އަޑުއެހުންތައް އޮކްޓޫބަރު 5 ގައި ފަށަން ތާވަލުކޮށްފިއެވެ.
ޕީޖީ އޮފީހުން ސައުދުގެ މައްޗަށް ދައުވާކޮށްފައިވަނީ އެނގިހުރެ ސައްހަ ނޫން ލިޔުމެއް ދިނުމާއި، ރަސްމީ އިދާރާއަކަށް ދޮގު މައުލޫމާތު ދިނުމުގެ ތުހުމަތުގައެވެ. ދައުވާގައިވާ ގޮތުން، 2021 ވަނަ އަހަރުގެ މޭ މަހުގެ 17 ގައި ތިނަދޫ ކައުންސިލްގެ ރައީސްގެ މަގާމުގައި ހުރެ، ސިޓީގެ ދަރަޖައަށް ޝަރުތުކުރާ 10،000 މީހުންގެ އާބާދީ ހަމަވާކަމަށް ދައްކަން އެލްޖީއޭއަށް ފޮނުވި ސިޓީގައި، މަރުވެފައިވާ މީހުންނާއި ސައްހަކަން ކަށަވަރު ނުކުރެވޭ މައުލޫމާތު ހިމަނާފައިވެއެވެ.
ސައްހަ ނޫން ލިޔުމެއް ދިނުމުގެ ދައުވާ ސާބިތުވެއްޖެނަމަ އެއް އަހަރާއި ހަތް މަހުގެ ޖަލު ހުކުމެއް ލިބިދާނެއެވެ. ދޮގު މައުލޫމާތު ދިނުމުގެ ދައުވާއަށް ލިބޭނީ ހަތަރު މަހާއި 24 ދުވަހުގެ ހުކުމެކެވެ. ލާމަރުކަޒީ ގާނޫނުގެ ދަށުން އެއް އަހަރަށް ވުރެ ދިގު ހުކުމެއް ލިބިއްޖެނަމަ ސައުދަށް މޭޔަރުކަމުގެ މަގާމު ގެއްލޭނެއެވެ.
ތިނަދޫއަށް ސިޓީގެ ދަރަޖަ ލިބުނީ 2023 ވަނަ އަހަރުގެ ރިޔާސީ އިންތިހާބުގެ ކުރިން، ރައީސް އިބްރާހިމް މުހައްމަދު ސާލިހްގެ ސަރުކާރުގެ ތެރޭގައެވެ. ދެން ވެރިކަމަށް އައި ސަރުކާރުން ވެސް ތިނަދޫ ސިޓީއެއްގެ ގޮތުގައި ބެހެއްޓުމަށް ނިންމިއެވެ.
ކޮމެންޓު ފޮނުވާ