އިންސާނީ ނަފްސު އިސްލާހުކުރުމުގެ ޖިހާދެއް ފަށަން ޖެހިފައިވާކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
މިއަދު ޚުތުބާގައި ވިދާޅުވެފައިވަނީ އިންސާނީ މުޖްތަމަޢާއި މުޅި ގައުމު އިސްލާހުވެ، އަމާންކަމާއި، މިނިވަންކަން ލިބި، ފަރުދުންގެ ގުޅުންތައް ބަދަހިވެ، ތިޔާގިކަމާއި، އިފާފާގަތިކަން ލިބުން އޮތީ ތިމާމެންގެ އަމިއްލަ ނަސްސުތައް އިސްލާހު ކުރުމުން ކަމުގައިވާހިނދު، މިގައުމުގެ ކޮންމެ ފަރުދަކުމެ އަމިއްލަ ޙާލާމެދު، އަދި އަމިއްލަ ނަފްސުގެ އުނިކަމާމެދު ފިކުރުކޮށްލުން އެއީ ކުރަންޖެހިފައިވާ ކަމެއް ކަމުގައެވެ.
"ގައުމު އިސްލާހުވުން އޮތީ ނަފްސުތައް އިސްލާހު ވެގެންނެވެ." މި މައުޟޫއަށް ޚާއްސަ ކުރެވިގެންދިޔަ މިއަދުގެ ޚުޡުބާގައި ވިދާޅުވެފައިވަނީ އެންމެ މުހިންމު ވެގެންވަނީ ހަވާނަފްސުގެ މައްޗަށް ގަދަވެގަނެ ތިމާއަށް އަމުރުކުރާ ފަރާތަކީ ތިމާގެ ހަވާނަފްސު ކަމުގައި ވިޔަނުދީ، ނަފްސާ އިދިކޮޅަށް ގަދައަޅާ މަސައްކަތް ކުރުމުގައި ކާމިޔާބު ހޯދުން ކަމުގައެވެ.
މިފަދަ މީހުންނަކީ، ހަގީގީ މާނާގައި ހިދާޔަތު ލިބިގަތުމަށް ޖިހާދުކުރާ މީހުންނެވެ. މާތް ﷲގެ ތަނަވަސްވެގެންވާ ރަޙުމަތާއި ފާފަ ފުއްސެވުމުގައި މިންނެތް އިނާޔަތުގައި ދެމިތިބުމަށް ގަދައަޅާ މަސައްކަތްކުރާ މީހުންނެވެ. އެފަދަ މީހުންނަށް މާތް ﷲ ހެޔޮގޮތް ދައްކަވާނެކަމީ ޝައްކެއް އޮތްކަމެއް ނޫނެވެ. އެއީ އެމީހެއްގެ ނަފްސުގައިވާ ނޭއްގާނީކަން ދުރުކޮށް، ޝައިޡާނީ ވަސްވާސްތަކަށް ހެއްލިގެންދިޔަ ނުދިނުމަށް ހަވާނަފްސާއި ޖިހާދުކުރި ކޮންމެ މީހަކަށް ކަނޑައެޅިފައި އޮތް ގޮތެވެ.
މިއަދު ޚުޡުބާގައި ވިދާޅުވެފައި ވެއެވެ.
ޚުޡުބާގައި ވިދާޅުވި ގޮތުގައި މުޅި ގައުމު އިސްލާހުވާން އޮތީ ކޮންމެ ފަރުދެއްގެ އަމިއްލަ ނަފްސުގައި ހުރިނަމަ ހުރި ނުބައިކަމަކާއި ދުރުވެގެން ކަމުގައެވެ. އަދި މިކަމަށް އޮތް ހަމައެކަނި މަގަކީ އެހެން މީހުންގެ ކިބާގައިހުރި އުނިކަންތަކާ އައިބުތަކުގެ ވާހަކަ ދެއްކުމުގައި ވަގުތު ބޭކާރުނުކޮށް، އަމިއްލަ ނަފްސާމެދު ޚިޔާލުކުރުމަށް ވަގުތު ހުސްކޮށްލުންކަމުގައިވެސް ޚުޡުބާގައި ބަޔާން ކުރައްވާފައި ވެއެވެ.
