މިހާރު ރައީސް ޔާމީން އެކުޅުއްވަނީ ބަތްކައްކާކަމަށާއި، އިހްތިޔާރުކުރައްވަނީ އެކަނިވެރިކަންކަމަށް ދީނީ ޢިލްމުވެރިޔާ ޝައިޚް ޢަލީ ޒައިދު ވިދާޅުވެއްޖެއެވެ. ޝައިޚް މިހެން ވިދާޅުވީ، ރައީސް ޔާމީން ޕީޕީއެމް ދޫކުރައްވާ އައު ސިޔާސީ ޕާޓީއެއް އުފެއްދެވުމުގެ މަސައްކަތް ފަށްޓަވާފައިވަނިކޮށެވެ. ރައީސް ޔާމީން ސިޔާސީ ޕާޓީއެއް ުފެއްދެވުމުގެ މަސައްކަތް ފެއްޓެވިނަމަވެސް، އެޕާޓީގެ ލީޑާޝިޕް އޮތީ ރައީސް މުޢިއްޒުގެ ފަހަތްޕުޅުގައެވެ.

ޝައިޚް ޒައިދު ވިދާޅުވީ، މިހާރު ރައީސް ޔާމީން އެ ކުޅުއްވަނީ ސީދާ ބަތްކައްކާކަމަށެވެ. މިހާރު އެ އިޚްތިޔާރުކުރައްވަނީ ޖަމާޢަތް ދޫކޮށް އެކަނިވެރިކަންކަމަށްވެސް ޝައިޚް ވިދާޅުވިއެވެ.

އަޅުގަނޑުގެ އަންދާޒާ އަކީ ރނ އަށް ވީވަރުވެސް ހިޔެއްނުވޭ މިހާރު އެއުޅުއްވާާ ފާޑުން ވެދާނެ ހެނެއް! ވަޒީރުކަން ނުލިބުނު ދެތިންބޭފުޅަކު ވެގެން ރޔ އެ މަގުމަތި ކޮށްލައްވަނީ!

– ޝައިޚް ޒައިދު

ވެރިކަން ކުރާ ކޯލިޝަންގެ އެންމެ ބޮޑު ޕާޓީ ކަމުގައިވާ ޕީޕީއެމްގެ ލީޑަރޝިޕްގެ ގިނަ ބޭފުޅުން ރައީސް ޔާމިން އާ ޕާޓީއެއް އުފެއްދެވުމާއި ދެކޮޅު ހައްދަވާ، ރައީސް މުއިއްޒުއަށް ތާއީދު އޮތްކަން ދަނީ ހާމަކުރައްވަމުންނެވެ.

އިއްޔެރޭ ރައީސް ޔާމިން ޕީޕީއެމް ދޫކޮށް، އާ ޕާޓީއެއް އުފެއްދެވުމުގެ މަސައްކަތް ފައްޓަވާފައިވަނިކޮށް، ޕީޕީއެމްގެ ލީޑަރޝިޕްގައި ހިމެނިވަޑައިގަންނަވާ ގިނަ ބޭފުޅުން ވަނީ ރައީސް މުއިއްޒުއަށް ތާއީދުކުރައްވާކަން ހާމަކޮށް ޓުވީޓު ކޮށްފައެވެ.

އެގޮތުން ރައީސް މުއިއްޒުއަށް ތާއީދު އޮތްކަން ހާމަކޮށް މިހާތަނަށް ޓުވީޓު ކޮށްފައިވާ ބޭފުޅުންގެ ތެރޭގައި، ޕީޕީއެމްގެ ނާއިބު ރައީސްކަމުގެ މަގާމުގައި ހުންނެވި މިހާރުގެ ޑިފެންސް މިނިސްޓަރ ޢައްސާން މައުމޫންއާއި، ޕީޕީއެމްގެ ނާއިބު ރައީސް އަދި މިހާރުގެ ފިޝަރީޒް މިނިސްޓަރ އަހުމަދު ޝިޔާމްވެސް ހިމެނިވަޑައިގަންނަވައެވެ.

ރައީސް ޔާމިން އާ ޕާޓީއެއް އުފެއްދެވުމުގެ މަސައްކަތް ކުރައްވަމުން ގެންދަވާއިރު، ޕީޕީއެމްއިން ދަނީ މިރޭ އެ ޕާޓީގެ ސެނެޓްގެ ބައްދަލުވުމަށް ބޭވުމަށެވެ. ރައީސް ޔާމިން ޕީޕީއެމް ދޫކޮށްލެއްވީ އެ ޕާޓީ ހިންގަން އެމަނިކުފާނު ސްޓިއަރިން ކޮމިޓީއެއް ހަމަޖެއްސެވުމާއި ގުޅިގެން ޕާޓީގެ އެތެރެ ހޫނުވެ އެ މަސައްކަތުގައި އުޅުއްވި ބައެއް ފަރާތްތައް ޕާޓީ ކަނޑާލުމަށް ޕީޕީއެމްއިން ނިންމާފައި ވަނިކޮށެވެ.