ޕީއެންސީގެ ނައިބް ރައީސް އަދި ހުޅުމާލެ ދާއިރާގެ ކައުންސިލަރު އިބްރާހިމް ޝުޖާ ރާއްޖޭގެ މަޝްހޫރު ވިޔަފާރި ވެރިޔާ މުހައްމަދު މޫސާ (އުއްޗު) އާއި ބައްދަލު ކުރައްވައިފިއެވެ.
ޝުޖާ އުއްޗު އާއި ބައްދަލު ކުރައްވާފައި މިވަނީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ބާރަށު ދާއިރާއަށް ވާދަ ކުރައްވާނެކަން އިއުލާން ކުރައްވާފައިވާ ދަނޑިވަޅެއްގައެވެ. ޝުޖާއަކީ ރާއްޖޭގެ ސިޔާސީ މަސްރަހުގައި އެންމެ ފާހަގަކޮށްލެވޭ ބޭފުޅުންގެ ތެރޭގައި ހިމެނޭ އަދި މިހާރުގެ ވެރިކަން ކުރާ ސަރުކާރު ދެމެހެއްޓައި ސަރުކާރު ގެނައުމަށް އެންމެ ބޮޑަށް މަސައްކަތް ކުރެއްވި އެއްބޭފުޅާއެވެ.
ޝުޖާ ވިދާޅުވީ އުއްޗުއާއި ބައްދަލު ކުރުމަކީ ލިބޭ ބޮޑު އުފަލެއް ކަމަށެވެ. އުއްޗުއަކީ އަބަދުވެސް ކަންކަމުގައި ހެޔޮ ނަސޭހަތް ދެއްވާ ޤައުމާއި ރައްޔިތުންނަށް ނުހަނު ހެޔޮ އިހުލާސްތެރި ބޭފުޅެއް ކަމުގައި ޝުޖާ ވިދާޅުވިއެވެ.
އުއްޗު އާއި ބައްދަލުވުމަކީ އަބަދުވެސް އަޅުގަނޑަށް ލިބޭ ހިތްހަމަޖެހުމަކާއި އުފަލެއް. އުއްޗު ދެއްވާ ނަސޭހަތް އަބަދުވެސް އަޅުގަނޑު އަހަން. ދެއްވި ހިތްވަރަށް ވަރަށް ބޮޑަށް ޝުކުރު ދަންނަވަން. އުއްޗުއަށް ފުރިހަމަ ސިއްހަތަކާއި އުފާވެރި ދުވަސްތަކަކަށް އެދެން.
– ޝުޖާ ވިދާޅުވިއެވެ.
ނިމިގެން މިދާ ވެރިކަމުގެ ދައުރުގައި ޕީޕީއެންސީގެ ނައިބް ރައީސެއްގެ ގޮތުގައި ހުންނަވައި، ސަރުކާރު ޖަވާބުދާރީކޮށް ޒިންމާދާރު ކުރުމަށް ކުރި ވަރުގަދަ މަސައްކަތުގައި އެންމެ އިސްކޮށް ހަރަކާތްތެރިވި އެއްބޭފުޅުންގެ ތެރޭގައި ޝުޖާ ހިމެނެއެވެ. 10 ވަރަކަށް މީހުންނާއިއެކީ ފެށި މަގުމަތީ ހަރަކާތްކާއި އެއްވުންތައް ފުޅާކޮށް، ޕީޕީއެމް/ޕީއެންސީ އެންމެ ނިކަމެތިވި ދުވަސްވަރު ހުރިހާ ވަގުތެއް ޝުޖާވަނީ ޕާޓީއަށް ހުސްކުރައްވާފައެވެ. ނަތީޖާއަކަށް ވެގެންދިިޔައީ 5 ފަހަރެއްގެ މަތީން ޖަލަށްލައި އެކި އަނިޔާތައް ލިބިގެން ދިއުމެވެ.
ސިޔާސީ އިސްލާހީ މަސައްކަތުގައި ކުރި ވަރުގަދަ މަސައްކަތާއިއެކު ރައްޔިތުންނަށް ޚިދުމަތް ކުރުމަށް ލިބޭ އެކި ފުރުސަތުތަކުގައި ޝުޖާ ދަނީ ބޭނުން ހިފަމުންނެވެ. އެގޮތުން އެމްޑީޕީއަށް މާލޭގައި އޮތް ބޮޑު ތާއީދުގެ ތަސައްވަރު ގެއްލުވާލީ މިހާރުގެ އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއިއެކު އެއް ޓީމެއްގައި ނިކުމެ މާލެ ސިޓީގެ ކައުންސިލް ބޮޑު ޢައުލަބިއްޔަތުން ޕީޕީއެމް/ޕީއެންސީން ކާމިޔާބު ކުރުމުންނެވެ. ޝުޖާއަކީ މި އިންތިޚާބުގައި ހުޅުމާލެ ދާއިރާ ބޮޑު ތަފާތަކުން ކާމިޔާބުކޮށް މާލެ ސިޓީ ކައުންސިލުން ޖާގަ ހޯއްދަވާފައެވެ. މިހާރުވެސް ހުންނެވީ މާލެ ސިޓީ ކައުންސިލްގެ މެމްބަރު ކަމުގައެވެ.
ޝުޖާއަކީ އިންތިޚާބު ވުމަށްފަހުވެސް އެންމެ ގާތުން ރައްޔިތުންނާއިއެކު މަސައްކަތް ކުރައްވާ އެއް ކައުންސިލަރެވެ. ޝުޖާގެ ޤައުމީ ޚިދުމަތުގައި ވަކި ދާއިރާއެއް ޚާއްސަ ނުވިނަމަވެސް، މިއަދު އޭނާގެ އެހީތެރިކަމަށް އަނެއްކާވެސް އެދި ގޮވަމުންދަނީ އަމިއްލަ އުފަން ދާއިރާއިންނެވެ. މަޖިލިސް އިންތިޚާބުގައި ބާރަށު ދާއިރާއަށް ވާދަކޮށް، އިންތިޚާބުގެ ބޮޑުބަދަލެއް ގެނައުމަށެވެ.
އިންތިޚާބީ ރައީސްގެ ކެމްޕޭންގައިވެސް މުޅި ރާއްޖޭގައި ކުރި ވަރުގަދަ ކެމްޕޭންގައި އެންމެ އިސްކޮށް ހަރަކާތްތެރިވި ޝުޖާ ވަނީ އިންތިޚާބީ ރައީސް ޑރ. މުއިއްޒުގެ ސަރުކާރު ނަގަހައްޓައި ދެމެހެއްޓުމަށް ކުރަންޖެހުނު ކޮންމެ މަސައްކަތެއް ކުރާނެ ކަމުގެ ޔަގީންކަން ދެއްވާފައެވެ. އަދި ރައްޔިތުން އެދޭ ތަރައްޤީ ހާސިލް ކޮށް ދެއްވުމުގައި 24 ގަޑިއިރު މިސަރުކާރަށް އެއްބާރުލުން ދީގެން މަސައްކަތް ކުރާނެކަމުގެ ޔަގީންކަން ޝުޖާ ވަނީ ދެއްވާފައެވެ.
