ރައްޔިތުން މަޖިލީހުގެ މިއަދުގެ ޖަލްސާގެ ކޯރަމް ހަމަނުވެ ޖަލްސާ ފެށޭ ގޮތެއް ނުވިއެވެ.
މަޖިލިހުގެ ވެބްސައިޓުގައި އާންމުކޮށްފައިވާ ގޮތުން މިއަދު ދެ ޖަލްސާއެއް ބޭއްވުމަށް ވަނީ ހަމަޖެހިފައެވެ. ފުރަތަމަ ޖަލްސާ އޮތީ ހެނދުނު 9:00 ގައެވެ. އެ ޖަލްސާގައި އެޖެންޑާކޮށްފައި އޮތީ އަންނަ އަހަރަށް ލަފާ ކުރާ ދައުލަތުގެ ބަޖެޓް ހުށައެޅުމާއި ސަޕްލިމަންޓަރީ ބަޖެޓް ހުށަހެޅުމެވެ. މިޖަލްސާ ބޭއްވުމަށް މަޖިލީހުގެ ރިޔާސަތުގައި އިންނެވި އީވާ ވިދާޅުވީ މަޖިލީހުގެ މެޖޯރިޓީ ޕާޓީ އެމްޑީޕީގެ ގިނަ އަދަދެއްގެ މެމްބަރުން މަޖިލިސް ކުޑަ ދަށުގައި ތިބި ކަމަށާއި، ނަމަވެސް ޖަލްސާގެ ކޯރަމް ހަމަ ކުރަން އެބޭފުޅުން ދެކޮޅު ހައްދަވާ ކަމަށެވެ.
އީވާ ވިދާޅުވީ ޖަލްސާގެ ކޯރަމް ހަމަވޭތޯ ބަލަން މަސައްކަތް ކުރައްވާނެކަމަށެވެ. މީގެ އިތުރުން އީވާ ވިދާޅުވީ އަންނަ އަހަރަށް ލަފާކުރާ ދައުލަތުގެ ބަޖެޓާއި މި އަހަރުގެ ބަޖެޓަށް އިތުރުކުރާ ސަޕްލިމަންޓްރީ ބަޖެޓު ހުށަހަޅަން ތާވަލުކޮށްފައިވާ ޖަލްސާއަށް ބަލި ހާލަތު ހުރި ގޮތުން ވަޑައިގެންނެވެން ނެތް ކަމަށް ފިނޭންސް މިނިސްޓަރު އިބްރާހިމް އަމީރު މަޖިލީހަށް އަންގަވާފައިވާކަމަށެވެ.
މިކަމުގައިވެސް ވަކި ގޮތެއް ނިންމޭނީ ޖަލްސާގެ ކޯރަމް ހަމަވެ މަޖިލީހުން ވަކި ގޮތެއް ނިންމައިގެން ކަމަށް އީވާ ވިދާޅުވިއެވެ. މަޖިލީހުގެ ދެވަނަ ޖަލްސާ ބޭއްވުމަށް އެޖެންޑާކޮށްފައި ވަނީ މިއަދު ހެނދުނު 11 ޖަހާއިރުއެވެ. އެ ޖަލްސާގެ އެޖެންޑާގައި އޮތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ހުށަހަޅާފައިވާ ގަރާރާ މެދުގައި ގޮތެއް ނިންމުމެވެ.
ނަޝީދުގެ ގަރާރުގެ މައްސަލަ ދެވަނަ ޖަލްސާ އަށް އެޖެންޑާ ކުރިއިރު، އެމްޑީޕީން ތަކުރާރުކޮށް ބުނަމުން އަންނަނީ ނަޝީދުގެ އިތުބާރު ނެތް ކަމުގެ މައްސަލައިގައި ގޮތެއް ނުނިންމާ މަޖިލިހުގެ ތަޅުމުގައި އިތުރު މައްސަލައެއް ކުރިއަށް ގެންދަން ފުރުސަތު ނުދޭނެ ކަމަށެވެ.
މާލިއްޔަތު ޤާނޫނޫނާއި މަޖިލީހުގެ ޤަވާއިދުގައި ބަޔާންކުރަނީ ކުރިއަށް އޮތް އަހަރަށް ދައުލަތުން ލަފާކުރާ ބަޖެޓު، ކޮންމެ އަހަރެއްގެ އޮކްޓޫބަރުމަހުގެ ނިޔަލަށް ރައްޔިތުންގެ މަޖިލީހަށް ހުށައަޅަންވާނެކަމަށެވެ. އަދި ބަޖެޓު ހުށައަޅަންވާނީވެސް ފިނޭންސް މިނިސްޓަރުކަމަށެވެ. މަޖިލީހުގެ ޤަވާއިދުގައި ވާގޮތުން އަންނަ އަހަރަށް ލަފާކުރާ ބަޖެޓުގެ މަސައްކަތް ނޮވެމްބަރު މަހުގެ ނިޔަލަށް ނިންމަވައި މެންބަރުން ބޮޑު ޗުއްޓީއަށް ވަޑައިގަންނަވާނެއެވެ.
