ކުރިއަށް އޮތް 2024 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބުގައި ބާރަށު ދާއިރާ ތަމްސީލް ކުރައްވުމަށް އެދާއިރާގެ ގިނަ އަދަދެއްގެ ރައްޔިތުން އެދުނު އެދުން ގަބޫލް ކުރައްވާ އެދާއިރާ ތަމްސީލް ކުރެއްވުމަށް މަޖިލިސް އިންތިޚާބުގައި ވާދަ ކުރެއްވުމަށް ޕީއެންސީގެ ނައިބް ރައީސް އިބްރާހިމް ޝުޖާ ނިންމަވައިފިއެވެ.
ބާރަށު ދާއިރާއަށް މިހާތަނަށް ތަރައްޤީގެ އެންމެ ބޮޑު ބަދަލެއް އައީ 18 ވަނަ ރައްޔިތުންގެ މަޖިލީހުގައި ޝުޖާ އެދާއިރާ ތަމްސީލް ކުރެއްވި ދައުރުގައެވެ. ޝުޖާގެ ދައުރަށްފަހު އެދާއިރާއަށް ރައްޔިތުން އުންމީދުކުރި ބަދަލު ނާންނާތީ ގިނަ އަދަދެއްގެ ރައްޔިތުން ދަނީ ޝުޖާ އަލުން އެދާއިރާގެ މަޖިލިސް ގޮޑިއަށް ވާދަކޮށް ދެއްވުމަށް އެދެމުންނެވެ.
ޝުޖާ ވަނީ ރައްޔިތުންގެ އުންމީދުތަކާއި ރައްޔިތުންގެ ހާލަތު ބަދަލު ކުރުމަށް ސަރުކާރުގެ ތެރެއިން ކުރަންޖެހޭ ކަންކަން ކޮށްދީ ބާރަށު ދާއިރާއަށް ކުރިމަތި ލެއްވުމަށް ނިންމަވާފައެވެ.
އަޅުގަނޑު (އިބްރާހީމް ޝުޖާޢު، ސައުދީމަންޒިލް، ހއ.ބާރަށް) ކުރިއަށްއޮތް ރައްޔިތުންގެ މަޖިލިސް އިންތިޚާބުގައި ބާރަށު ދާއިރާގެ ގޮނޑިއަށް ވާދަކުރުމަށް ނިންމައިފިން. އަޅުގަނޑުގެ އިޚްލާޞްތެރި އެދުމަކީ އަޅުގަނޑުގެ މިމަސައްކަތައް ތިޔަ ލޮބުވެތި ރައްޔިތުންގެ ތާޢީދާއި އެއްބާރުލެއްވުން ދެއްވުން.
– ޝުޖާ ވިދާޅުވިއެވެ.
ނިމިގެން މިދާ ވެރިކަމުގެ ދައުރުގައި ޕީޕީއެންސީގެ ނައިބް ރައީސެއްގެ ގޮތުގައި ހުންނަވައި، ސަރުކާރު ޖަވާބުދާރީކޮށް ޒިންމާދާރު ކުރުމަށް ކުރި ވަރުގަދަ މަސައްކަތުގައި އެންމެ އިސްކޮށް ހަރަކާތްތެރިވި އެއްބޭފުޅުންގެ ތެރޭގައި ޝުޖާ ހިމެނެއެވެ. 10 ވަރަކަށް މީހުންނާއިއެކީ ފެށި މަގުމަތީ ހަރަކާތްކާއި އެއްވުންތައް ފުޅާކޮށް، ޕީޕީއެމް/ޕީއެންސީ އެންމެ ނިކަމެތިވި ދުވަސްވަރު ހުރިހާ ވަގުތެއް ޝުޖާވަނީ ޕާޓީއަށް ހުސްކުރައްވާފައެވެ. ނަތީޖާއަކަށް ވެގެންދިިޔައީ 5 ފަހަރެއްގެ މަތީން ޖަލަށްލައި އެކި އަނިޔާތައް ލިބިގެން ދިއުމެވެ.
ސިޔާސީ އިސްލާހީ މަސައްކަތުގައި ކުރި ވަރުގަދަ މަސައްކަތާއިއެކު ރައްޔިތުންނަށް ޚިދުމަތް ކުރުމަށް ލިބޭ އެކި ފުރުސަތުތަކުގައި ޝުޖާ ދަނީ ބޭނުން ހިފަމުންނެވެ. އެގޮތުން އެމްޑީޕީއަށް މާލޭގައި އޮތް ބޮޑު ތާއީދުގެ ތަސައްވަރު ގެއްލުވާލީ މިހާރުގެ އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒާއިއެކު އެއް ޓީމެއްގައި ނިކުމެ މާލެ ސިޓީގެ ކައުންސިލް ބޮޑު ޢައުލަބިއްޔަތުން ޕީޕީއެމް/ޕީއެންސީން ކާމިޔާބު ކުރުމުންނެވެ. ޝުޖާއަކީ މި އިންތިޚާބުގައި ހުޅުމާލެ ދާއިރާ ބޮޑު ތަފާތަކުން ކާމިޔާބުކޮށް މާލެ ސިޓީ ކައުންސިލުން ޖާގަ ހޯއްދަވާފައެވެ. މިހާރުވެސް ހުންނެވީ މާލެ ސިޓީ ކައުންސިލްގެ މެމްބަރު ކަމުގައެވެ.
ޝުޖާއަކީ އިންތިޚާބު ވުމަށްފަހުވެސް އެންމެ ގާތުން ރައްޔިތުންނާއިއެކު މަސައްކަތް ކުރައްވާ އެއް ކައުންސިލަރެވެ. ޝުޖާގެ ޤައުމީ ޚިދުމަތުގައި ވަކި ދާއިރާއެއް ޚާއްސަ ނުވިނަމަވެސް، މިއަދު އޭނާގެ އެހީތެރިކަމަށް އަނެއްކާވެސް އެދި ގޮވަމުންދަނީ އަމިއްލަ އުފަން ދާއިރާއިންނެވެ. މަޖިލިސް އިންތިޚާބުގައި ބާރަށު ދާއިރާއަށް ވާދަކޮށް، އިންތިޚާބުގެ ބޮޑުބަދަލެއް ގެނައުމަށެވެ.
އިންތިޚާބީ ރައީސްގެ ކެމްޕޭންގައިވެސް މުޅި ރާއްޖޭގައި ކުރި ވަރުގަދަ ކެމްޕޭންގައި އެންމެ އިސްކޮށް ހަރަކާތްތެރިވި ޝުޖާ ވަނީ އިންތިޚާބީ ރައީސް ޑރ. މުއިއްޒުގެ ސަރުކާރު ނަގަހައްޓައި ދެމެހެއްޓުމަށް ކުރަންޖެހުނު ކޮންމެ މަސައްކަތެއް ކުރާނެ ކަމުގެ ޔަގީންކަން ދެއްވާފައެވެ. އަދި ރައްޔިތުން އެދޭ ތަރައްޤީ ހާސިލް ކޮށް ދެއްވުމުގައި 24 ގަޑިއިރު މިސަރުކާރަށް އެއްބާރުލުން ދީގެން މަސައްކަތް ކުރާނެކަމުގެ ޔަގީންކަން ޝުޖާ ވަނީ ދެއްވާފައެވެ.
