ދުނިޔޭގައި ކޮންމެ އިންސާނަކުވެސް ބަލިވާނެ ކަމަށާއި، ތަދާއި، ވޭނާއި ކެކުޅުންފަދަ ކަންކަމަކީ މާތް ރަސްކަލާންގެ ކުރިމަތި ކުރައްވާ އިމްތިޙާންތަކެއް ކަމަށާއި އެކަންކަން ތަހައްމަލް ކުރަން ނުޖެހޭ އެއްވެސް މީހަކު ނުހުންނާނެ ކަމުގައި މިއަދުގެ ހުކުރު ޚުޡުބާގައި ވިދާޅުވެއްޖެއެވެ.
"ބަލިމީހުންނަށް ޒިޔާރަތް ކުރުން" މިމައުޟޫއަށް ޚާއްސަ ކުރެވިގެންދިޔަ މިއަދުގެ ހުކުރު ޚުުބާގައި ވިދާޅުވީ ބަލިމަޑުކަމާއި ކުރިމަތިވުން ނޫނީ ދުޅަހެޔޮކަމާއި ޢާފިޔަތުގެ އަގު ވަޒަން ނުކުރެވޭނެ ކަމުގައެވެ.
އިންސާނާއާއި ކުރިމަތިކުރައްވާ ބޮޑެތި އިމްތިޚާންތަކާއި، މުސީބާތްތަކުގެ ތެރޭގައި ބަލިވުން ހިމެނެއެވެ. މާތް ރަސްކަލާންގެ އަށް އަދާކުރަންޖެހޭ ވާޖިބުތަކާއި، ތިމާ އަދާކުރަންޖެހޭ ޙައްގުތައް އަދާކުރެވޭނީ ސިއްޙަތާއި ދުޅަހެޔޮކަން ލިބިގެންނެވެ. އެހެންކަމުން ސިއްޙަތާއި ދުޅަހެޔޮ ކަމަކީ މާތް ރަސްކަލާންގެ ދެއްވާ އަގުބޮޑު ނިއުމަތެކެވެ.
މިއަދު ޚުޡުބާގައި ވިދާޅުވެފައި ވެއެވެ.
ޚުޡުބާގައި އިތުރަށް ވިދާޅުވެފައިވަނީ ބަލިމަޑުކަމަކީ މާތް ރަސްކަލާންގެ ކުރިމަތި ކުރައްވާ އިމްތިޙާނެއް ކަމަށާއި، އެއީ އަޖުމަބެލުމެއް ކަމުގައެވެ. އަދި އެކަމަށް ކެތްތެރިވާ މީހާއަށް މަތިވެރި ސަވާބާއި ދަރުމަ ލިބިގެންވާކަމަށްވެސް މިއަދުގެ ޚުޡުބާގައި ބަޔާން ކުރައްވާފައި ވެއެވެ.
މިއަދުގެ ޚުޡުބާގައި ވިދާޅުވެފައިވަނީ ބަލި މީހުންނަށް ގޮވާލަން ދިއުމަކީ އެކަމުގެ ގިނަގުނަ ފައިދާތަކެއް ހިމެނޭ ކަމެއް ކަމުގައެވެ. އަދި އެކަމުން އިސްލާމީ އުޚުތްވަތްތެރިކަމުގެ ރޫޙު އާލާވެ، އެކަމުގެ ސަބަބުން ބަލިމީހާގެ ވޭންތަކާއި ކެކުޅުންތަކަށް ލުއިކަމެއް ލިބި، ބަލީގެ ސަބަބުން ލިބިފައިވާ ނިކަމެތިކަން ކުޑަވެގެންދާނެ ކަމަށްވެސް މިއަދު ޚުޡުބާގައި ވިދާޅުވެފައި ވެއެވެ.
