މާފަންުނު ކޮޅު އައިޖީއެމްއެޗް ކައިރިން ތޫނު އެއްޗަކުން ހަމަލާދީ މަރާލާފައިވާ އާދަމް ހަސަންފުޅުގެ މަރުގެ މައްސަލާގައި ދައުވާލިބޭ ކުޑަކުއްޖާގެ މައްޗަށް ކުށް ސާބިތުވި ނަމަވެސް، އޭނާއަށް މަރުގެ އަދަބު ނުދޭން ހައި ކޯޓުން މިއަދު ހުކުމް ކޮށްފިއެވެ.
މަރުގެ ހާދިސާ ހިނގިއިރު ކުށްކުރި މީހާއަށް 18 އަހަރު ފުރިފައި ނުވާތީ އެންމެ ފުރަތަމަ އޭނާގެ މައްސަލަ ބަލާފައިވަނީ ޖުވެނައިލް ކޯޓުންނެވެ. އަދި އެ މައްސަލާގައި އޭނާގެ މައްޗަށް ޖުވެނައިލް ކޯޓުން އިއްވާފައިވަނީ މަރުގެ ހުކުމެވެ. އެހެންކަމުން މަރުގެ މައްސަލަތައް ކޯޓުގެ 3 މަރުހަލާއިން ނިންމަޖެހޭތީ އެމައްސަލާގެ އެންމެ ފަހުން ކުރިޔަށް ގެންގޮސްފައިވަނީ ހައިކޯޓުގެ އިސްތިއުނާފް މަރުހަލާއެވެ.
ހައިކޯޓުގައި މައްސަލަ ބެއްލެވުމަށްފަހު ކޮށްފައިވާ ހުކުމުގައި ބުނެފައިވަނީ މަރުގެ ކުށް ސާބިތުވާނަމަ، އިސްލާމީ ޝަރީއަތުގައި ވާގޮތުން، ވާރިސުންގެ ރުހުން އޮތްނަމަ މަރަށް މަރު ހިފަން ޖެހޭނަމަވެސް، މިހާރު އަމަލު ކުރަމުންދާ ކުޑަކުދިންގެ އަދުލުގެ ގާނޫނުގައި ވާގޮތުން އެ ހުކުމް ކުޑަކުއްޖެއްގެ މައްޗަށް ނީއްވޭނެ ކަމުގައެވެ.
ހައިކޯޓުގެ ތިން ފަނޑިޔާރުން ކުރި ހުކުމުގައި ވަނީ ކުށް ސާބިތުވާކަމަށް ޖުވެނައިލް ކޯޓުން ކުރި ހުކުމަށް ތާއީދުކޮށް، އަދަބު ކަނޑައެޅުމުގެ ބައި ޖުވެނައިލް ކޯޓުގައި އަލުން ކުރިޔަށް ގެންދިއުމަށެވެ.
މިމައްސަލަ ބެއްލެވި ބެންޗުގެ ރިޔާސަތު ބެލެހެއްޓެވީ ފަނޑިޔާރު މުހައްމަދު ފައިސަލެވެ. ބެންޗުގައި ދެން ތިއްބެވީ ފަނޑިޔާރު މުހައްމަދު ސަލީމާއި ފަނޑިޔާރު މުހައްމަދު ނިޔާޒެވެ.
ނޫރު މަރާލާފައިވަނީ 2015 ވަނަ އަހަރު އައިޖިއެމްއެޗް ކައިރީގައި، ސައިކަލުތަކެއްގައި ދިޔަ ބަޔަކު އޭނާއަށް ތޫނު އެއްޗަކުން ހަމަލާދީގެންނެވެ. އެމައްސަލާގައި ދައުވާ އުފުލާފައިވަނީ 4 މީހެއްގެ މައްޗަށެވެ. އޭގެ ތެރޭގައި 18 އަހަރު ނުފުރޭ 2 ކުޑަކުދިން ހިމެނެއެވެ. އަނެއް ކުއްޖާގެ މައްޗަށް އިއްވާފައިވަނީ 10 އަހަރުގެ ޖަލު ހުކުމެކެވެ.
މިމައްސަލާގައި ދެން ދައުވާ އުފުލާފައިވަނީ ޏ. ފުވައްމުލައް، ޝައިނީ، މުހައްމަދު ސަމީހް އަދި ޏ. ފުވައްމުލައް، ނޯވެލް، މުހައްމަދު ޝަމްލުގެ މައްޗަށެވެ. އެ ދެމީހުންގެ މައްޗަށްވެސް ކުރަމުންދާ ދައުވާއަކީ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގައި ބައިވެރިވިކަމުގެ ދައުވާއެވެ. މި އަދަބަށް ގާނޫނުގައި ދޭން އޮންނަ އެންމެ ބޮޑު އަދަބަކީ 25 އަހަރުގެ ޖަލު ހުކުމަކަށް ވާއިރު، މި ދެމީހުންވެސް ކުރިމިނަލް ކޯޓުން ވަނީ 25 އަހަރަށް ޖަލަށް ލާން ހުކުމް ކޮށްފައެވެ.
