ޤައުމަށް ހެޔޮ އެދޭނަމަ މިއީ އެމްޑީޕީގެ މަޖިލިސް މެންބަރުން ދަ ޑިމޮކްރެޓްސްއާއި ގުޅެންވީ ވަގުތުކަމަށް ދަ ޑިމޮކްރެޓްސްގެ ރަނިންމޭޓަކަށް ރިޔާސީ އިންތިޚާބުގައި ނިކުންނެވި އަދި އެސްޓީއޯގެ ކުރީގެ މެނޭޖިންގ ޑިރެކްޓަރ ޙުސައިން ޢަމްރު ވިދާޅުވެއްޖެއެވެ.
"އެކްސް"ގައި އަމްރު ކުރެއްވި ޕޯސްޓެއްގައި އަމްރު ވިދާޅުވީ، ޤައުމަށް ހެޔޮ އެދިވަޑައިގަންނަވާ، ޤައުމުގެ ސިޔާސީ ހަމަޖެހުމަށް އެންމެ އިސްކަންދެއްވާ، ޤައުމީ މަސައްކަތުގަ ތިއްބެވި އެމްޑީޕީގެ މަޖިލިސް މެންބަރުން ދަ ޑިމޮކްރެޓްސްއާ ގުޅިވަޑައިގަންނަވާ ވަގުތަކީ މީއީކަމަށެވެ.
ސިޔާސީ ހަލަބޮލިކަމަށް ނިމުން އަންނަން ޖެހޭ ރައްޔިތުންނަށް ހަމަ ނޭވާއެއް ލެވެން ޖެހޭ.
– ޙުސައިން އަމްރު ވިދާޅުވިއެވެ.
19 ވަނަ ރައްޔިތުންގެ މަޖިލީހުން އެމްޑީޕީއަށް 65 ގޮނޑި ލިބުނެވެ. ނަމަވެސް އެމްޑީޕީގެ ރިޔާސީ ޕްރައިމަރީއަށްފަހު ޕާޓީ ތެރޭގައި އުފެދުނު ޚިޔާލުތަފާތުވުންތަކާއެކު އެޕާޓިން ބައެއް މެންބަރުން ވަނީ ވަކިވެވަޑައިގެންފައެވެ. އޭގެ ތެރޭގައި އެމްޑީޕީގެ އެންމެ އިސް ސަފުގައި ގިނަ ދުވަސްވީ މެންބަރުންވެސް ހިމެނިވަޑައިގަންނަވައެވެ. އޭގެ ތެރޭގައި މަޖިލީހުގެ ރައީސް މުޙައްމަދު ނަޝީދާއި، ނާއިބު ރައީސް އީވާ ޢަބްދުﷲ ވެސް ހިމެނިވަޑައިގަންނަވައެވެ.
އެމްޑީޕީން ވަކިވި މެންބަރުން ވަނީ ދަ ޑިމޮކްރެޓްސްގެ ނަމުގައި ސިޔާސީ ޕާޓީއެއް އުފައްދާފައެވެ. އެޕާޓިއަކީ މިހާރު މަޖިލީހުގެ މައިނޯރިޓީއެވެ.
އެމްޑީޕީގެ މިހާރު މަޖިލީހުގައި ތިއްބެވީ 55 މެންބަރުންނެވެ.
