ރައީސް ޢަބްދުﷲ ޔާމީން ޢަބްދުލްޤައްޔޫމް ޖަލުގައި އޮންނެވިއިރު މަގުމަތީގައި ކުރެއްވި ކަންކަން ކުރުމުގެ އެ ހިތްވަރު އަދިވެސް އެބަހުރިކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ. އާދަމް ޝަރީފް މިހެން ވިދާޅުވީ، ރައީސް ޔާމީންމިނިވަން ކުރުމަށް މީގެ ކުރިން ނިކުތް ޕާޓީގެ ބައެއް އިސްބޭފުޅުން މިހާރު ނުފެންނަ ކަމަށް އެމަނިކުފާނު ވިދާޅުވުމާއި ގުޅިގެންނެވެ.
މަގާމުތައް ލިބުނީމާ ފިނި ކޮޓަރި އަށް ވަދެ ކަންކަން ހަނދާން ނެތޭ ބޭފުޅުން ވަރަށް ގިނަ ކަމަށާއި ނަމަވެސް، އެ މަނިކުފާނު ދެކެ ލޯބިވާ އާންމު ރައްޔިތުން ތިބޭނީ ގައުމުގެ ހައްގުގައި މަގުމަތީގައި ކަމަށް ރައީސް ޔަމީން ރޭ ވަނީ ވިދާޅުވެފައެވެ.
މިކަމާއި ގުޅިގެން އާދަމް ޝަރީފް ވިދާޅުވީ، ރައީސް ޔާމީން ޖަލުގައި އޮންނެވިއިރު، ޕީޕީއެމް ޕީއެންސީން މުޒާހަރާ ރޭވުމާއި ސަޕޯޓަރުން ކުރި ހުރިހާ މުޒާހަރާއެއްގައި އަމަލީގޮތުން ބައިވެރިވިކަމަށެވެ.
– އާދަމް ޝަރީފް ވިދާޅުވިއެވެ.
ހުޅުމާލޭ ކެމްޕެއިން ޓީމު އެމަނިކުފާނަށް ފަރިވަޅެއް އެރުވުމަށް ރޭ ބޭއްވި ހަރަކާތުގައި ގެކޮޅުގައި ހުންނަވައިގެން ސަޕޯޓަރުންނާއި މުހާތަބު ކުރައްވައި ވާހަކަފުޅު ދައްކަވަމުން ރައީސް ޔާމީން ވިދާޅުވީ އެމަނިކުފާނު މިނިވަންކޮށް ދެއްވުމުގައި ވީހާވެސް ގިނަ ބޭފުޅުންގެ ބައިވެރިވުން އޮތުމަކީ އެދިވަޑައި ގަންނަވާ ކަމެއް ކަމަށެވެ. މިހާރު މަގުމަތީ ހަރަކާތްތައް ހިންގައިގެން ފުލުހުންނާއި ސިފައިން މީހުން ނަގައި އަނިޔާވެރިވާން ނާންނާނެކަމަށް ރައީސް ޔާމީން ވިދާޅުވިއެވެ.
އަޅުގަނޑުގެ ޕާޓީގެ ބޭފުޅުން ވެސް ތިބޭފުޅުން ވެސް މަސައްކަތް ކުރަންވީ ދެން މިހާރު މަގުމަތީގައި ހިންގާ ހަރަކާތްތައް މިއަށްވުރެ ވަރުގަދަކުރަން. މިހާރު ތިބޭފުޅުން ނަގާ އުކާލާކަށް ފުލުހުންނެއް ނާންނާނެ. ސިފައިން ނާންނާނެ. މިހާރު ނުކެރޭނެ އަންނާކަށް. އޭރުވެސް އައީ އަންނަން ބޭނުންވެގެންނެއް ނޫން. ދަންނަވާލަން ބޭނުންވަނީ މި އަދަދުތައް ގިނަ ކުރައްވާށޭ މަސައްކަތް ވަރުގަދަ ކުރައްވާށޭ.
– ރައީސް ޔާމީން ވިދާޅުވިއެވެ.
ރައީސް ޔާމީން ވަނީ އެމަނިކުފާނު މިނިވަން ކުރުމަށް މީގެ ކުރިން ނިކުތް ޕާޓީގެ ބައެއް އިސްބޭފުޅުން މިހާރު ނުފެންނަ ކަމަށް ވިދާޅުވެފައެވެ. އެމަނިކުފާނު ވަނީ އެބޭފުޅުން މިހާރު އަމަލު ކުރަމުންދާ ގޮތަށް ދިވެހި ހަރު ބަހެއް ވިދާޅުވެ ވާހަކަ ކުރު ކޮށްލައްވާފައެވެ.
އާންމުކޮށް މުހާވިރާ ބަހެއްގައި މި އޮންނަނީ ކުދި ސޯބު އެނބުރޭނީ ބޮޑު ސޯބު އެނބުރޭ ގޮތަށޭ. އެހެންވީމަ ބޮޑު ސޯބުތައް އެބުރެންޖެހޭ. މި ކުދި ސޯބުތައް މިއަށް ވުރެ ބާރަށް އެބުރެން. އެކަން ކުރީމަ އަޅުގަނޑުމެންނަށް ފޯރިގަދަ ކުރެވޭނީ. އެކަން ކުރީމަ ސަރުކާރަށް ދޫކޮށްލަން ފަސޭހަވާނީ އަޅުގަނޑު.
– ރައީސް ޔާމީން ވިދާޅުވިއެވެ.
މަނީލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް ޔާމީން ޢަބްދުލްޤައްޔޫމް ގެއަށް ބަދަލުކުރެއްވުމާއި ގުޅިގެން، އެކަމުގެ އުފާފާޅުކޮށް، އެމަނިކުފާނަށް މަރުޙަބާ ކިޔުމަށް ޕީޕީއެމް ޕީއެންސީ ކޯލިޝަންގެ ގިނަ އަދަދެއްގެ ސަޕޯޓަރުން އެމަނިކުފާނުގެ ގެކޮޅު ހ. ދޫވެހި ހިމެނޭ ސަރަޙައްދަށް މިދިޔަ އާދީއްތަ ދުވަހުވެސް ޖަމާވިއެވެ.
ރައީސް ޔާމީން ގެކޮޅަށް ވަޑައިގެންނެވުމާއެކު އެމަނިކުފާނަށް އެ ސަރަޙައްދުން އިންތިޚާބީ ރައީސް ޑރ. މުޙައްމަދު މުޢިއްޒާއި، އިންތިޚާބީ ނާއިބު ރައީސް ޙުސައިން މުޙައްމަދު ލަޠީފާއި ޕީޕީއެމް ޕީއެންސީ ސެނެޓް މެމްބަރުންނާއި، ކޯލިޝަން ލިޑަރޝިޕްގެ ބޭފުޅުން ވަނީ ބައްދަލުކުރައްވާފައެވެ.
